بۇگىن, 18 قىركۇيەكتە قر پرەزيدەنتى جانىنداعى ادام قۇقىقتارى جونىندەگى كوميسسيا ەۋروپالىق وداقتىڭ قازاقستانداعى وكىلدىگىنىڭ, «تالدىقورعان قۇقىق قورعاۋ ورتالىعى» قب, «ورتالىق ازياداعى حالىقارالىق تۇرمە رەفورماسى» وكىلدىگىنىڭ جانە «ادام قۇقىقتارى جانە زاڭدىلىقتى ساقتاۋ جونىندەگى قازاقستاندىق حالىقارالىق بيۋرو» قب قاتىسۋىمەن «ازاپتاۋعا قارسى ۇلتتىق الدىن الۋ تەتىگىن جەتىلدىرۋ» تاقىرىبىندا دوڭگەلەك ۇستەل وتكىزدى, دەپ حابارلايدى Egemen.kz.
«دوڭگەلەك ۇستەل» جۇمىسىنا قۇقىق قورعاۋ, ارنايى جانە سوت ورگاندارىنىڭ, ورتالىق جانە جەرگىلىكتى مەملەكەتتىك ورگانداردىڭ, ادام قۇقىقتارى جونىندەگى ۇلتتىق مەكەمەلەردىڭ, ادۆوكاتۋرا ينستيتۋتىنىڭ, قۇقىق قورعاۋ ۇەۇ, ءبىلىم بەرۋ, دەنساۋلىق ساقتاۋ جانە حالىقتى الەۋمەتتىك قورعاۋ ۇيىمدارىنىڭ, باق-تىڭ وكىلدەرى, سونداي-اق قۇقىقتانۋشى عالىمدار قاتىستى.
جيىنعا قاتىسۋشىلارعا ەۋروپالىق وداقتىڭ قازاقستانداعى وكىلدىگىنىڭ باسشىسى يوحاننەس باۋر مىرزا, قر پرەزيدەنتى جانىنداعى ادام قۇقىقتارى جونىندەگى كوميسسيا توراعاسىنىڭ ورىنباسارى تاستەمىر ابىشەۆ, تالدىقورعان قۇقىق قورعاۋ ورتالىعى ديرەكتورىنىڭ ورىنباسارى جانار نۇرمۇحانوۆا, «ادام قۇقىقتارى جانە زاڭدىلىقتى ساقتاۋ جونىندەگى قازاقستاندىق حالىقارالىق بيۋرو» قب ديرەكتورىنىڭ ورىنباسارى روزا اقىلبەكوۆا قۇتتىقتاۋ ءسوز سويلەدى.
«دوڭگەلەك ۇستەلدە» قازاقستاندا ازاپتاۋدى جانە جابىق مەكەمەلەردەگى قاتىگەزدىكتىڭ باسقا دا تۇرلەرىن بولدىرماۋعا باعىتتالعان ۇلتتىق الدىن الۋ تەتىگىن (ۇات) نىعايتۋدىڭ وزەكتى ماسەلەلەرى, قازاقستانداعى ۇات ينستيتۋتىنىڭ تيىمدىلىگىن تالداۋ ناتيجەلەرى, سونداي-اق ادام قۇقىقتارى سالاسىنداعى حالىقارالىق ستاندارتتارعا جانە ازاپتاۋعا قارسى كونۆەنتسيا مەن ونىڭ فاكۋلتاتيۆتىك حاتتاماسى ەرەجەلەرىنە سايكەس ۇات ينستيتۋتسيونالدىق الەۋەتىن نىعايتۋ جونىندەگى ۇسىنىمدار تالقىلاندى.
جيىن بارىسىندا ادام قۇقىقتارى جونىندەگى كوميسسيا توراعاسىنىڭ ورىنباسارى تاستەمىر ابىشەۆ قر پرەزيدەنتىنىڭ تاپسىرماسى بويىنشا ەلدە ازاپتاۋمەن جانە قاتىگەزدىكتىڭ باسقا دا تۇرلەرىمەن بايلانىستى قۇقىق بۇزۋشىلىقتاردى جويۋ بويىنشا قاجەتتى جانە شۇعىل شارالار قابىلدانعانىن, 2023 جىلعى 1 قاڭتاردان باستاپ پروكۋراتۋرا ورگاندارىنا ازاپتاۋلاردى تەرگەۋ بويىنشا زاڭنامالىق دەڭگەيدە ايرىقشا تەرگەۋ جۇرگىزۋ قۇقىعى بەرىلگەنىن اتاپ ءوتتى.
بۇدان ءارى ول دوڭگەلەك ۇستەلگە قاتىسۋشىلاردىڭ نازارىن ازاپتاۋعا قارسى كونۆەنتسيانىڭ فاكۋلتاتيۆتىك حاتتاماسى نورمالارىنا سايكەس ۇات قاتىسۋشىلارىنىڭ جابىق مەكەمەلەردەگى ازاپتاۋدى بولدىرماۋ جونىندەگى ءتيىمدى الدىن الۋ شارالارىنا اۋداردى.
ايتا كەتۋ كەرەك, ەلىمىزدىڭ بارلىق وڭىرلەرىندە ارنايى موبيلدىك توپتار قۇرىلدى, ولار ازاپتاۋ تۋرالى بەلگى تۇسكەن كەزدە قىلمىس جاسالعان جەرگە بارىپ, شۇعىل تەرگەۋ ارەكەتتەرىن جۇرگىزەدى.
2023 جانە 2024 جىلدارى پروكۋرورلار ازاپتاۋ تۋرالى تەرگەپ-تەكسەرىلەتىن ىستەر شەڭبەرىندە قپك-ءنىڭ 200-بابى تارتىبىمەن ۋاكىلەتتى ورگانداردىڭ اتىنا قىلمىستىق قۇقىق بۇزۋشىلىق جانە باسقا دا زاڭ بۇزۋشىلىقتار جاساۋعا ىقپال ەتكەن ءمان-جايلاردى جويۋ جونىندە 107 ۇسىنىس ەنگىزدى.
بۇۇ ازاپتاۋعا قارسى كوميتەتىنىڭ 2023 جىلعى 10 مامىرداعى قازاقستاننىڭ ءتورتىنشى كەزەڭدىك بايانداماسىن تالقىلاۋ ناتيجەلەرى بويىنشا شىعارىلعان قورىتىندى ەسكەرتۋلەرىن ىسكە اسىرۋ شەڭبەرىندە ۇكىمەت پەن ۋاكىلەتتى مەملەكەتتىك ورگاندار كوميتەتتىڭ ۇسىنىمدارىن ىسكە اسىرۋ جونىندە شارالار قابىلداپ جاتىر.
ماسەلەن, مەملەكەتتىك ورگاندار ازاپتاۋدى ايقىنداۋ بولىگىندە زاڭنامانى جەتىلدىرۋ جونىندە شارالار قابىلداپ جاتىر, پارلامەنت ءماجىلىسىنىڭ قاراۋىنا «قىلمىستىق, قىلمىستىق-پروتسەستىك جانە قىلمىستىق-اتقارۋ كودەكستەرىن وڭتايلاندىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسى ەنگىزىلدى.
بۇۇ ازاپتاۋعا قارسى كوميتەتىنىڭ ۇسىنىمىن ىسكە اسىرۋ شەڭبەرىندە جانە ازاماتتاردىڭ قۇقىقتارىنىڭ قورعالۋ كەپىلدىكتەرىن ارتتىرۋ ماقساتىندا قازاقستاننىڭ قۇقىق قورعاۋ ورگاندارىنىڭ باسشىلارى قىلمىستىق پروتسەستە جانە جازانى ورىنداۋ كەزىندە ازاماتتاردىڭ كونستيتۋتسيالىق قۇقىقتارى مەن بوستاندىقتارىنىڭ ساقتالۋىن قامتاماسىز ەتۋ جونىندەگى نۇسقاۋلىقتى بەكىتتى.
جيىنعا قاتىسۋشىلاردىڭ باياندامالارى مەن سويلەگەن سوزدەرىندە حالىقارالىق قۇقىق نورمالارىن ودان ءارى يمپلەمەنتاتسيالاۋدىڭ, سوت تورەلىگى جۇيەسى مەن سوتتان تىس قۇرالداردى قوسا العاندا, قازاقستاندا ادام قۇقىقتارىن قورعاۋدىڭ حالىقارالىق جانە ۇلتتىق تەتىكتەرىن جەتىلدىرۋدىڭ وزەكتى ماسەلەلەرى قوزعالدى.
ساراپشىلار ازاپتاۋعا قارسى كونۆەنتسيانىڭ فاكۋلتاتيۆتىك حاتتاماسىنىڭ ەرەجەلەرىنە سايكەس قازاقستانداعى ازاپتاۋعا قارسى قولدانىستاعى ۇلتتىق الدىن الۋ تەتىگى ينستيتۋتىن جەتىلدىرۋدى ۇسىندى.
جيىندا ءسوز سويلەگەن ساراپشىلار قۇقىق قورعاۋ جانە ارناۋلى ورگاندار قىزمەتكەرلەرىنىڭ, سونداي-اق بارلىق جابىق مەكەمەلەر قىزمەتكەرلەرى مەن ۇات قاتىسۋشىلارىنىڭ ادام قۇقىقتارى سالاسىنداعى بىلىكتىلىگى مەن قۇقىقتىق مادەنيەتىن ارتتىرۋ بويىنشا تۇراقتى جۇمىس ىستەيتىن وقىتۋ كۋرستارىن وتكىزۋدىڭ ماڭىزدىلىعى مەن قاجەتتىلىگىن اتاپ ءوتتى.