اقتاۋدا ەڭ وزەكتى ماسەلەنىڭ ءبىرى – اۋىزسۋ. اسىرەسە جازدا, اپتاپ ىستىقتا قيىن. قالا اكىمىنىڭ مىندەتىن اتقارۋشى نۇرتاس ساليدىڭ ايتۋىنشا, وزەكتى ماسەلەنى جەڭىلدەتۋ ءۇشىن اقتاۋ قالاسىندا 6 جوبا جۇزەگە اسىرىلىپ جاتىر. «ماەك» جشس جازعى ماۋسىمدا تاۋلىگىنە شامامەن 52 000 تەكشە مەتر اۋىزسۋمەن قامتاماسىز ەتەدى. جاز ايلارىندا قوسىمشا قاجەتتى اۋىزسۋ كولەمى شامامەن 20-25 مىڭ تەكشە مەتردى قۇرايدى.
«اقتاۋ قالاسىنىڭ اۋىزسۋ تاپشىلىعىن جويۋ باعىتىندا 6 جوبا ىسكە اسىرىلىپ جاتىر. ولاردىڭ قاتارىندا «كاسپي» سۋ تۇشىتۋ زاۋىتىن تاۋلىگىنە 20 000 تەكشە مەتردەن 40 000 تەكشە مەترگە دەيىن كەڭەيتۋ» جوباسى بار. بۇل جوبا ىسكە اسىرىلعاننان كەيىن, قالاعا جاز مەزگىلىندە تاۋلىگىنە قوسىمشا 6 000 تەكشە مەتر اۋىزسۋ بەرىلەدى دەپ كۇتىلىپ وتىر. سونىمەن قاتار جەكە ينۆەستور كومەگىمەن «الەكا» جشس تاراپىنان قۋاتتىلىعى تاۋلىگىنە 4 000 تەكشە مەتر سۋ تۇشىتۋ قوندىرعىسىن ورناتۋ» جوباسى جۇزەگە اسىرىلىپ, ماۋسىم ايىندا ىسكە قوسىلدى. ال «ماەك» جشس «وسجت-2» اۋماعىندا ونىمدىلىگى تاۋلىگىنە 6 000 تەكشە مەتر سۋ تۇشىتۋ قوندىرعىلارىن سالۋ» جوباسىن ىسكە قوسۋ جۇمىستارى وسى جىلدىڭ شىلدە ايىنا جوسپارلانعان. اۋىزسۋ ماسەلەسىن شەشۋ باعىتىنداعى جوبالاردىڭ ءبىرى – «ماەك» جشس-دا قۋاتتىلىعى تاۋلىگىنە 4 000 تەكشە مەتر ديستيللياتسيالىق تۇشىتۋ قوندىرعىلارى (دتق) جابدىعىن اۋىستىرۋ». بۇل جوبانى 2025 جىلدىڭ ءبىرىنشى جارتىجىلدىعىندا ىسكە اسىرۋ جوسپارلانعان», دەيدى قالا اكىمىنىڭ مىندەتىن اتقارۋشى نۇرتاس سالي.
سونداي-اق جەكە ينۆەستور «سك-ا-ستروي» جشس ەسەبىنەن «اقتاۋ قالاسىندا سۋ تۇشىتۋ زاۋىتىنىڭ قۇرىلىسىن سالۋ» جوباسى بار. اتالعان جوبا اياسىندا سۋ تۇشىتۋ زاۋىتى جىل سوڭىندا تاۋلىگىنە 3 500 تەكشە مەتر اۋىزسۋ ءوندىرىپ, بيىل شىلدە ايىندا زاۋىت قۋاتىن تاۋلىگىنە 7 000 تەكشە مەترگە دەيىن ارتتىرۋ كوزدەلىپ وتىر.
«ماەك» جشس اۋماعىندا كەرى وسموس قولدانۋ ارقىلى تاۋلىگىنە 24 000 تەكشە مەتر سۋ ءوندىرۋ قوندىرعىلارىن سالۋ» جوباسىنا ءتيىستى تۇزەتۋلەر ەنگىزىلىپ جاتىر.
اتالعان جوبالار تولىق جۇزەگە اسقان جاعدايدا قالاداعى اۋىزسۋ ماسەلەسىندەگى ءبىراز ءتۇيىن تارقاتىلادى دەگەن ءۇمىت بار. تۇرعىن سانى جىلدان-جىلعا ارتىپ, سۋ تۇشىتۋ, جەتكىزۋ جابدىقتارى ەسكىرگەن قالا بۇل باعىتتا ءالى تالاي يدەيالاردىڭ تۋىنداپ, جوبالار مەن جوسپارلاردىڭ باتىل ىسكە اسۋىن قاجەت ەتەدى.
ماڭعىستاۋ وبلىسى