اقوردا ءباسپاسوز قىزمەتى مەملەكەت باسشىسى قاسىم-جومارت توقاەۆتىڭ V دۇنيەجۇزىلىك كوشپەندىلەر ويىندارىنىڭ اشىلۋ سالتاناتىندا سويلەگەن ءسوزىن جاريالادى, دەپ حابارلايدى Egemen.kz.
قادىرلى قاۋىم!
قۇرمەتتى سپورتشىلار!
بۇگىن كوپتەن كۇتكەن بايراقتى باسەكە – V دۇنيەجۇزىلىك كوشپەندىلەر ويىندارى باستالادى. بارشاڭىز قازاق جەرىنە قوش كەلدىڭىزدەر!
بۇل – الەمدىك اۋقىمدا ءوتىپ جاتقان ايرىقشا ماڭىزدى ءىس-شارا. قازاقستانعا كەلگەن باۋىرلاس مەملەكەتتەردىڭ باسشىلارىنا زور ريزاشىلىعىمدى بىلدىرەمىن. مارتەبەلى مەيماندارعا جانە سپورتشىلارعا شىنايى العىس ايتامىن.
كوشپەندىلەر وركەنيەتى – دۇنيەجۇزى تاريحىندا وشپەس ءىز قالدىرعان وركەنيەت. ۇلى دالا كوشپەندىلەرى ەجەلدەن بايتاق ەۋرازيانى مەكەن ەتكەن. ولار جاھاندىق دامۋ ۇدەرىسىنە تۇبەگەيلى وزگەرىس اكەلدى, سول زامانداعى وزىق تەحنولوگيانىڭ يەسى بولدى. كوشپەندىلەر بەس مىڭ جىل بۇرىن جىلقىنى قولعا ۇيرەتتى. دۇنيەنى دۇبىرلەتكەن سالت اتتىلار مادەنيەتىن قالىپتاستىردى. قۋاتتى قارۋ-جاراق پەن عاجايىپ زەرگەرلىك بۇيىمدار جاساپ شىعاردى. ساق ءداۋىرىنىڭ التىن ادامدارى – سونىڭ ايقىن دالەلى.
قازاق جەرىنەن ءال-فارابي, قوجا احمەت ياساۋي سىندى عۇلامالار شىققان. ولار ءىلىم-عىلىمنىڭ دامۋىنا وراسان زور ۇلەس قوستى.
ءبىزدىڭ بابالارىمىز الىپ مەملەكەتتەر قۇردى, ۇلكەن قالالار سالدى. ۇلى دالادا وتىرار, تۇركىستان, تاراز, سارايشىق سياقتى ساۋلەتتى شاھارلار بوي كوتەردى. كوشپەندى جۇرت باتىس پەن شىعىسقا كوپىر بولىپ, ءتۇرلى مادەنيەتتىڭ جاقىنداسۋىنا اسەر ەتتى.
وسى جەردە ەجەلگى عۇن يمپەرياسى, ودان سوڭ تۇرىك قاعاناتى سالتانات قۇردى. ولاردىڭ داڭقتى جولىن التىن وردا مەن قازاق حاندىعى جالعاستىردى.
كوشپەندىلەر وركەنيەتى – ناعىز كونەكوز وركەنيەت. شىن مانىندە, كوشپەندى حالىقتار بارلىق قۇرلىقتا بار. ولاردىڭ ءىزىن ەۋروپا مەن ازيادان, افريكا مەن امەريكادان كورۋگە بولادى.
كوشپەندىلەردىڭ مادەنيەتى, رۋحاني قازىناسى, قۇندىلىقتارى – ورتاق. كوشپەندى حالىق – ەڭ الدىمەن, رۋحى ازات جۇرت. كوشپەندىلەر ءۇشىن ءومىر – ماڭگىلىك قوزعالىس. ولاردىڭ ءار قادامى – جاڭا الەمگە جاسالعان جاسامپاز قادام.
ءبىز – ەجەلدەن قوناقجاي حالىقپىز. جاڭالىققا – جانى قۇمار, ءتۇرلى مادەنيەتكە – اشىق جۇرتپىز. ءبىزدىڭ ءومىر سالتىمىز تابيعاتپەن ەرەكشە ۇيلەسىم تاپقان. كوشپەندىلەر – تۋمىسىنان قايسار حالىق. كوشپەندىلەردىڭ ۇلى كوشى ەشقاشان توقتامايدى.
مىڭداعان جىلعا جالعاسقان وسى كوش قازىر باسقاشا سيپاتقا يە بولدى.
كوشپەندى ءومىر سالتى قايتا جاڭعىردى. جاھاندانۋ داۋىرىندە ەشقانداي شەكارا جوق. ءبىر سوزبەن ايتساق, قازىر زاماناۋي كوشپەندىلەر پايدا بولدى. ءبىز ءبىلىم الۋ, جۇمىس ىستەۋ ءۇشىن قونىس اۋدارامىز, باسقا ەلدەرگە ساياحات جاسايمىز. بۇل داۋىردە ءبىز ەركىندىك رۋحىن ساقتاي ءبىلۋىمىز كەرەك. جاڭا زاماننىڭ جاقسى قاسيەتتەرىن بويعا ءسىڭىرۋ قاجەت. ءبىز – داڭقتى كوشپەندىلەردىڭ مۇراگەرىمىز, باتىر بابالاردىڭ ۇرپاعىمىز. ولار ەل مەن جەردى قورعاپ, ۇلان-عايىر دالانى بىزگە امانات ەتتى. وسى قاستەرلى مۇرانى كوزدىڭ قاراشىعىنداي ساقتاپ, جاس بۋىنعا تابىستاۋ – بارىمىزگە ورتاق پارىز.
كوشپەندىلەر ويىندارى – وسىنداي يگى ماقساتتان تۋعان بىرەگەي جوبا. ون جىل بۇرىن وسى جارىستى العاش ۇيىمداستىرعان قىرعىز باۋىرلارعا العىس ايتامىن. بۇل – ۇلتتىق سپورت تۇرلەرىنەن وتەتىن الەمدەگى ەڭ ءىرى دودا. ونى كوشپەندىلەر وليمپياداسى دەۋگە بولادى. بۇل ويىندار دالا وركەنيەتىن جەر جاھانعا پاش ەتەدى. سپورت – ءوزارا قۇرمەت پەن سىيلاستىق سيمۆولى.
سپورتتىڭ باستى ميسسياسى – حالىقتار دوستىعىن نىعايتۋ. قازاقستان بۇكىل الەمگە بەيبىتشىلىك پەن كەلىسىم مەكەنى رەتىندە تانىمال. ەلىمىزدە ءتۇرلى ەتنوس وكىلدەرى تاتۋ-ءتاتتى ءومىر ءسۇرىپ جاتىر. ءبىز الىس-جاقىن شەتەلدىڭ بارىمەن تىعىز بايلانىس ورناتتىق. باسقا مەملەكەتتەر دە ءوزارا دوستىق قاتىناستا بولعانىن قالايمىز. سوندىقتان كوشپەندىلەر ويىندارى ىنتىماعىمىزدى بەكەمدەي تۇسپەك.
قۇرمەتتى دوستار!
« ۇلى دالا ءدۇبىرى» – ەلىمىز ءۇشىن تاريحي وقيعا. سارىارقانىڭ سايىن دالاسى 5 كۇن بويى دۇبىرگە تولادى. كۇللى الەم جۇرتى ناعىز كوشپەندىلەردىڭ بولمىسىنا كۋا بولادى. بۇل – بىرلىك پەن تاتۋلىقتىڭ تويى. دوستىعىمىز ماڭگى بولسىن!
V دۇنيەجۇزىلىك كوشپەندىلەر ويىندارىن اشىق دەپ جاريالايمىن!