استانادا قاربالاس ۋاقىتتا جۇك كولىكتەرىنىڭ قوزعالىسىنا شەكتەۋ ەنگىزىلۋى مۇمكىن, دەپ حابارلايدى Egemen.kz استانا اكىمدىگىنىڭ ءباسپاسوز قىزمەتىنە سىلتەمە جاساپ.
بۇگىن قالا اكىمى جەڭىس قاسىمبەك قر كولىك مينيسترلىگىنىڭ, قالا پوليتسياسىنىڭ, تاسىمالداۋشى كومپانيالاردىڭ جانە قۇرىلىس كومپانيالارىنىڭ وكىلدەرىمەن كەزدەسۋ وتكىزدى. كەزدەسۋدە جۇك كولىكتەرىنىڭ سالماعىن باقىلاۋ شارالارى تالقىلانىپ, قاربالاس ۋاقىتتا اۋىر جانە ءىرى كولەمدى كولىك قۇرالدارىنىڭ قوزعالىسىنا شەكتەۋلەر ەنگىزۋ جوسپارلانىپ وتىرعانى ايتىلدى.
«اۋىر جانە ءىرى كولەمدى كولىك قۇرالدارى جۇرگىزۋشىلەرىنىڭ كوپشىلىگى جۇكتىڭ سالماق پارامەترلەرىن ساقتامايدى. مىسالى, 25 توننانىڭ ورنىنا 100 تونناعا دەيىن, ءتىپتى ودان دا كوپ جۇك تاسىمالداپ ءجۇرۋى مۇمكىن. بۇل بىرقاتار قولايسىزدىق تۋدىرادى: جول قوزعالىسىنىڭ وزگە قاتىسۋشىلارىنا قيىندىق تۋدىرادى, ءارى جولعا ۇلكەن جۇكتەمە تۇسىرەدى», دەپ حابارلادى قالا اكىمدىگىنىڭ ءباسپاسوز قىزمەتى.
ەسكە سالا كەتەيىك, قىركۇيەك ايىنان باستاپ ەلوردادا اۆتوكولىك ولشەيتىن اۆتوماتتاندىرىلعان جۇيە ىسكە قوسىلادى. جۇيە قازىردىڭ وزىندە سىناق رەجيمىندە جۇمىس ىستەپ جاتىر. اۆتوماتتاندىرىلعان ولشەۋ جۇيەسى قالاعا نەگىزگى كىرەبەرىستەردە – پاۆلودار, قاراعاندى, قوستاناي, كوكشەتاۋ, قوسشى قالالارى, سونداي-اق قاراوتكەل جانە مالوتيموفەەۆكا اۋىلدارى تۇسىندا ورناتىلعان.
«سوڭعى ايدا 10 مىڭنان استام زاڭبۇزۋشىلىق تىركەلدى. بۇل جۇيە جۇك كولىكتەرىنىڭ سالماعىن باقىلاۋعا, قالانىڭ كولىك ينفراقۇرىلىمىنىڭ جالپى دەڭگەيىن جاقسارتۋعا, وزگە دە كولىكتەردىڭ كەدەرگىسىز ءجۇرۋى ءۇشىن نەعۇرلىم قولايلى جاعدايلار جاساۋعا مۇمكىندىك بەرەدى», دەپ ناقتىلادى اكىمدىك.
ايتا كەتەيىك, اۋىر جانە ءىرى كولەمدى كولىك قۇرالدارىنىڭ رۇقسات ەتىلگەن سالماعى مىنا مولشەردەن اسپاۋى كەرەك:
ءۇش ءوستى (م3 ساناتىنداعى بۋىندى اۆتوبۋستاردى قوسپاعاندا) – 25 توننا; ءتورت ءوستى, ونىڭ ىشىندە ەكى باسقارىلاتىن ءوسى بار – 32 توننا; بەس ءوستى – 38 توننا; التى نەمەسە ودان دا كوپ وستەرى بار – 44 توننا.وسىلايشا, جالپى سالماق جۇكتىڭ دە, كولىكتىڭ دە سالماعىن قامتيدى. ارتىق سالماق بولعان جاعدايدا 3 ميلليون 700 مىڭ تەڭگەگە دەيىن ايىپپۇل سالىنادى. ايىپپۇل مولشەرى وسكە شاققانداعى سالماقتىڭ ارتۋ دارەجەسىنە جانە كاسىپكەرلىك تۇرىنە بايلانىستى – شاعىن, ورتا نەمەسە ءىرى – 40 اەك-تەن (147 مىڭ 680 تەڭگە) 1000 اەك-كە (3 ملن 692 مىڭ تەڭگە) دەيىن وزگەرۋى مۇمكىن.