اقمولا وبلىسىنىڭ اقمول اۋىلىندا ورنالاسقان «Capital projects ltd» جشس جىلىنا 20 مىڭ توننا قۋاتتىلىقپەن تاۋىق ەتىن ءوندىرىپ كەلە جاتىر. كاسىپورىننىڭ «كۋروچكا ريابا» برەندىمەن شىعاراتىن ونىمدەرى تۇتىنۋشىلاردىڭ اۋقىمدى سۇرانىسىنا يە. مەملەكەتتىك قولداۋدىڭ كومەگىمەن جاقىن ارادا ءوندىرىس قۋاتىن 30 مىڭ تونناعا دەيىن ارتتىرۋ جوسپارلانىپ وتىر.
كاسىپورىن تاۋىق ەتى مەن جۇمىرتقا ءوندىرىسىنىڭ تولىق تسيكلىن (انالىق مال – ينكۋباتسيالىق جۇمىرتقا – ينكۋباتور – رەپرودۋكتور – تاۋىق ەتى جانە جۇمىرتقا – تاراتۋ) قۇرعان «شاڭىراق» كومپانيالار توبىنا كىرەدى. سونىمەن قاتار جەم ءوندىرۋ جانە ەكسپورتتاۋ ءۇشىن اۋىل شارۋاشىلىعى داقىلدارىن وسىرەدى. كاسىپورىن ەڭ از قالدىقپەن جۇمىس ىستەيدى, ءتىپتى تاۋىق سىڭعىرىعى دا داقىل وسىرۋدە پايدالانۋ ءۇشىن ورگانيكالىق تىڭايتقىش رەتىندە وڭدەلەدى.
قازىرگى ۋاقىتتا سالىنىپ جاتقان مايلى داقىلداردى قايتا وڭدەۋ جەلىسى جەمشوپ ءوندىرىسىن 25 پايىزعا ارزانداتۋعا مۇمكىندىك بەرەدى. بۇل تاۋىق جۇمىرتقاسى مەن قۇس ەتىنىڭ باعاسىنا وڭ اسەر ەتەدى, ويتكەنى جەم وسى ونىمدەردىڭ وزىندىك قۇنىنىڭ نەگىزگى جانە ەڭ قىمبات قۇرامداس بولىگى بولىپ سانالادى.
كاسىپورىن تاۋلىگىنە 1 ملن جۇمىرتقا وندىرەتىن پاستەرلەنگەن سۇيىق جانە قۇرعاق جۇمىرتقا ونىمدەرىن شىعارۋمەن اينالىسادى. بۇل تاۋىق جۇمىرتقاسىن وڭدەيتىن ەلىمىزدەگى العاشقى زاۋىت بولماق. كاسىپورىن قازىردىڭ وزىندە تەحنولوگياسى ەلىمىزدە بەلگىلەنەتىن, جۇمىرتقا ونىمدەرىن ءوندىرۋ بويىنشا الەمدىك كوشباسشى «تhornico» (Sanovo) كومپانياسىمەن ەكسكليۋزيۆتى كەلىسىمگە قول قويدى. جوبانى كەلەسى جىلى جەڭىلدەتىلگەن نەسيەلەۋ تۇرىندە مەملەكەتتىڭ قولداۋىمەن جۇزەگە اسىرۋ جوسپارلانىپ وتىر.
تاياۋدا كاسىپورىنعا ۆيتسە-پرەمەر سەرىك جۇمانعارين دە بارىپ, ءوندىرىس ۇدەرىسىمەن تانىسىپ قايتقان ەدى. ۆيتسە-پرەمەر اتالعان جوبانى قولداپ, ونىڭ ەلىمىزدەگى اگروونەركاسىپ كەشەنى سالاسىندا تەرەڭ قايتا وڭدەۋدى دامىتۋدا ماڭىزدى رولگە يە بولاتىنىن ايتتى.
كاسىپورىندا ىلعال استىقتى ساقتاۋدىڭ جاڭا ءارى قولجەتىمدى ادىستەرى قولدانىلادى. مۇندا 8 جىلدان بەرى ىلعالدىعى 18-20 پايىز بولاتىن استىقتى ساقتاۋعا ارنالعان پلاستيك قاپشىقتار پايدالانىلادى. بۇل پىشىندە ونى 6 اي بويى قاۋىپسىز ساقتاۋعا, كوكتەمدە اشىپ, كەپتىرىپ, ءارى قاراي ساقتاۋعا بولادى. كاسىپورىن باسشىسى ماكسيم بوجكونىڭ ايتۋىنشا, وتتەگىنىڭ بولماۋىنا بايلانىستى استىق جىل بويىنا وتە جاقسى ساقتالادى.