سەنات دەپۋتاتى سەرگەي كارپليۋك رۋدنىي قالاسىنا بارىپ, شاھاردىڭ جىلۋ ماۋسىمىنا دايىندىق بارىسىمەن تانىستى. بيىل مۇندا جىلۋ جەلىلەرىندەگى جۇمىس كولەمى ايتارلىقتاي ارتقان. جاڭارتىلعان ماگيسترالدىق جەلىلەردىڭ ۇزىندىعى 18 كم-ءدى قۇرايدى. بۇل وتكەن جىلمەن سالىستىرعاندا 5 كم-گە ارتىق.
اتقارىلعان جۇمىستىڭ ناتيجەسىندە كەيىنگى ەكى جىلدا ماگيسترالدىق جىلۋ جەلىلەرىنىڭ توزۋ دەڭگەيى 31 پايىزعا, ال توقساندىق جەلىلەردىڭ توزۋ دەڭگەيى 66 پايىزعا دەيىن تومەندەدى. ساپار اياسىندا دەپۋتات سالىنىپ جاتقان ەكى سپورت كەشەنى مەن 900 جانە 1 200 ورىندىق مەكتەپتەردىڭ قۇرىلىس الاڭىنا باردى. سونداي-اق تۇرعىن ۇيلەردى قالپىنا كەلتىرۋ باعىتىنداعى جۇمىستارمەن دە تانىستى.
سونىمەن قاتار سەناتور اۋليەكول اۋدانىنىڭ تۇرعىندارىمەن جانە اۋداندىق ءماسليحات دەپۋتاتتارىمەن كەزدەستى. ءىس-شارا بارىسىندا اۋدان ينفراقۇرىلىمىن دامىتۋ, مەملەكەتتىك ساتىپ الۋ ماسەلەلەرى, اۋىل شارۋاشىلىعىن سۋبسيديالاۋ, سالىق سالۋ, شاعىن جانە ورتا بيزنەستى قولداۋ جانە حالىقتى تەگىن مەديتسينالىق كومەكپەن قامتاماسىز ەتۋ ماسەلەلەرى تالقىلاندى.
«ساپارىمىزدىڭ باستى ماقساتى – وڭىرلەردەگى وزەكتى پروبلەمالاردى كوزىمىزبەن كورىپ, ولاردى جەرگىلىكتى تۇرعىندارمەن اشىق تالقىلاپ, شەشۋ جولدارىن قاراستىرۋ. بارلىق ماسەلەنى دەپۋتاتتىق قىزمەتتە ەسكەرەمىز. قاجەت بولعان جاعدايدا زاڭناماعا وزگەرىستەر ەنگىزىلۋى دە مۇمكىن. ەڭ باستىسى, بۇل ۇدەرىستە ءار تۇرعىننىڭ پىكىرىن ەسكەرۋ ماڭىزدى», دەدى سەرگەي كاپليۋك.
سونداي-اق دەپۋتات مەكتەپتى قايتا قالپىنا كەلتىرۋ جۇمىستارىنىڭ جاي-كۇيىنە نازار اۋداردى. ودان بولەك, امانقاراعاي اۋىلىنداعى اۋىلدىق مادەنيەت ءۇيى مەن بالالار جازعى لاگەرىنە جانە اۋليەكول اۋىلىنداعى جاڭا بالاباقشاعا باردى.
سەناتوردىڭ قوستاناي وبلىستىق ءماسليحاتىنىڭ دەپۋتاتتارىمەن كەزدەسۋىندە اۋىل شارۋاشىلىعىن سۋبسيديالاۋ جانە كولىك ينفراقۇرىلىمىن جەتىلدىرۋ ماسەلەلەرى تالقىلاندى. ال وبلىستىق بادمينتون فەدەراتسياسىنىڭ وكىلدەرىمەن جۇزدەسۋدە سالا ماماندارى سپورتشىلاردى دايارلاۋ ساپاسى مەن سپورت زالدارىن ماتەريالدىق-تەحنيكالىق جابدىقتاۋ باعىتىنداعى باسىمدىقتارعا توقتالدى.