رەسپۋبليكاداعى بەلسەندى جاستار ساياسي لاگەردە باس قوستى. «Amanat» پارتياسى جانىنداعى «جاستار رۋحى» جاستار قاناتى ۇيىمداستىرعان جيىنعا ەلىمىزدىڭ ءار تۇكپىرىنەن 300-دەن اسا دەلەگات قاتىسىپ جاتىر. ءىس-شارا 24 تامىزعا دەيىن جالعاسادى.
تۇركىستان وبلىسىنداعى «تاۋ سامالى» دەمالىس ايماعىندا ءوتىپ جاتقان لاگەر 21 تامىزدا باستالدى. باسقوسۋدا جاستار توپتارعا ءبولىنىپ, ءتۇرلى پىكىرتالاستار وتكىزدى. «جاستار رۋحى» جاستار قاناتىنىڭ توراعاسى اقەركە يسكاندەروۆانىڭ ايتۋىنشا, ەلىمىزدىڭ بارلىق وڭىرىنەن جينالعان دەلەگاتتار تەك جاستار قاناتىنىڭ قىزمەتىن جاقسارتۋعا ەمەس, سونىمەن قاتار مەملەكەتتىڭ دامۋىنا باعىتتالعان ەكونوميكالىق, الەۋمەتتىك, مادەني سيپاتتاعى تىڭ يدەيالارى مەن بايىپتى باستامالارىن ۇسىنا الادى.
– لاگەر جاستاردىڭ جاڭا بۋىنىن قالىپتاستىرۋعا باعىتتالعان. ءاربىر جاس ازامات مەملەكەت ىسىنە بەلسەندى ارالاسۋعا ءتيىس. پرەزيدەنت قاسىم-جومارت توقاەۆ ەل جاستارى ءوزىن-ءوزى ۇدايى جەتىلدىرىپ, جان-جاقتى دامىتىپ وتىرۋى قاجەت ەكەنىن اتاپ وتكەن بولاتىن. ساياسي جاڭعىرتۋ جۇمىسىن جالعاستىرۋ ءۇشىن ءتيىستى كادرلاردى دايارلاۋ قاجەت. ءىس-شارانىڭ باستى ماقساتى – تالانتتى جاستاردىڭ باسىن بىرىكتىرىپ, جاستار قاناتىنىڭ قاتارىنا بەلسەندى ازاماتتاردى تارتۋ. جالپى, «جاستار رۋحىنىڭ» باسىم باعىتتارىنىڭ ءبىرى – ەلىمىزدىڭ قوعامدىق-ساياسي ومىرىندەگى جاستاردىڭ ءرولىن ارتتىرۋ, – دەدى ول.
جالپى, «Amanat» پارتياسىنداعى جوبالار مەن باستامالاردى ىسكە اسىرۋدا جاستار دا بەلسەندىلىك تانىتىپ ءجۇر. وسى ورايدا «جاستار رۋحى» جاستار قاناتى تۇركىستان وبلىستىق فيليالىنىڭ توراعاسى جانسەرىك جۇمان لاگەر جاستار قاۋىمىنىڭ الەۋەتىن ارتتىرۋدى كوزدەيتىنىن اتاپ ءوتتى.
– لاگەرگە قاتىسۋشىلار – ءوز وڭىرلەرىنىڭ قالىپتاسقان جاس كوشباسشىلارى عانا ەمەس, سونىمەن قاتار ءىسىن جاڭادان باستاعان بەلسەندىلەر, سونداي-اق سۋ تاسقىنى, قوستاناي جانە اباي وبلىستارىنداعى ورمان ءورتى, ەكىباستۇزداعى توتەنشە جاعداي كەزىندە جانە وزگە دە وقيعالار بارىسىندا وزدەرىن تانىتقان ۆولونتەرلەر. بۇل – بەلسەندى جاستار پىكىر, تاجىريبە الماساتىن, پاتريوتيزم مەن جاۋاپتى ازاماتتىق ۇستانىم قالىپتاستىراتىن تاپتىرماس الاڭ, – دەدى ول.
ساياسي لاگەردە جاستار ءۇشىن جەكە جانە كاسىبي قاسيەتتەرىن دامىتۋعا ارنالعان ءتۇرلى باعىتتاعى ترەنينگتەر مەن تيمبيلدينگتەر وتەدى. ءىس-شارادا پسيحولوگ ەرجان مىرزاباەۆ, ساياسي كەڭەسشى نازىم جانعازينوۆا, تەلەجۇرگىزۋشى ايگەرىم ەسەنالى, جۋرناليست ساندي سۇلتان, تاعى باسقا ساراپشىلار قاتىسۋشىلارعا ارناپ وقىتۋ سەمينارلارىن وتكىزەدى. سونداي-اق جاس بەلسەندىلەرگە ءماجىلىس دەپۋتاتتارىنىڭ, «Amanat» فراكتسياسى مۇشەلەرىنىڭ قاتىسۋىمەن «Bir tolqynda» ديالوگ الاڭى ۇيىمداستىرىلادى.
– رەسپۋبليكالىق لاگەر جاستاردىڭ مانساپ جولىنداعى العاشقى قادامى بولاتىنىنا سەنىمدىمىز. مۇندا تانىمال ساراپشىلار, ءتۇرلى سالاداعى بىلىكتى ماماندار بىزگە كوممۋنيكاتسيا جانە PR نەگىزدەرىن ۇيرەتىپ, ساياساتتانۋ جانە وتباسىلىق, قوعامدىق قاتىناستار بويىنشا ارنايى كۋرس ۇيىمداستىرادى. مەن وسىندا ءبىلىمىمدى جەتىلدىرىپ, تىڭ اسەر الۋ جانە جاڭا دوس تابۋ ءۇشىن كەلدىم, – دەدى لاگەر قاتىسۋشىسى المات ەسەنبەكوۆ.
QUIZ ويىندارى بارىسىندا جاستار ءتۇرلى بايقاۋلارعا, قىزىقتى ينتەللەكتۋالدى-ساۋىق كەشىندە باقتارىن سىنايدى. جيىن ايماقتاردىڭ كونتسەرتتىك نومىرلەرىمەن جالعاسادى.