ورال. 12 ماۋسىم. باتىس قازاقستان وبلىسى ءبورلى اۋدانىندا پوليتسەيلەرگە 40 مىڭ تەڭگە كولەمىندە پارا ۇسىنعان براكونەرگە قاتىستى سوت ۇكىمى شىقتى. سوعان سايكەس, زاڭسىز بالىق اۋلاعان ازامات 800 مىڭ تەڭگە ايىپپۇل تولەيتىن بولدى. بۇل تۋرالى باتىس قازاقستان وبلىستىق پروكۋراتۋراسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
وقيعانىڭ ءمان-جايىن قىسقاشا ايتار بولساق, ءساۋىر ايىنىڭ 18-ىنەن 19-ىنا قاراعان ءتۇنى ءبورلى اۋدانىنىڭ ءتارتىپ ساقشىلارى ا.سليۆنوي ەسىمدى ازاماتتى ۇستايدى. ونىڭ كولىگىن ءتىنتۋ بارىسىندا بالىق اۋلايتىن اۋ مەن 130 كگ. موڭكە بالىق (كاراس) تاركىلەنەدى. وسى ىسكە بايلانىستى ءبورلى اۋداندىق ىشكى ىستەر بولىمىندە حاتتاما تولتىرۋ كەزىندە ۇستالعان ازامات پوليتسيا قىزمەتكەرلەرىنە پارا ۇسىنعان.
پروكۋراتۋرانىڭ حابارلاۋىنشا, پوليتسەيلەر ا.سليۆنويعا پارا بەرۋدىڭ قىلمىس ەكەنىن ەسكەرتكەن. سوعان قاراماستان, ول ءوزىنىڭ قىلمىستىق ارەكەتىن توقتاتپاي, قىزمەتتىك ۇستەل ۇستىنە 40 000 تەڭگە قويعان. ناتيجەسىندە براكونەر قىلمىس ۇستىندە ۇستالدى.
سوتتىڭ ۇكىمىمەن سليۆنوي قىلمىستىق كودەكستىڭ 367-بابى, 1-تارماعى بويىنشا كىنالى دەپ تانىلىپ, وعان بەرگەن پاراسىنان 20 ەسە كوپ مولشەردە, ياعني, 800 مىڭ تەڭگە ايىپپۇل سالىندى. سونداي-اق, ءومىر بويىنا مەملەكەتتىك ورگانداردا جۇمىس ىستەۋ قۇقىنان ايىرىلدى. الايدا, كىنالىنىڭ مۇلكى تاركىلەنگەن جوق.
تەمىر قۇسايىن.
دەرەك: egemen.kz.
سۋرەت: softcraze.com.