بيىل 8-12 شىلدە ارالىعىندا مەديتسينالىق ۇيىمداردى اككرەديتتەۋ جونىندەگى حالىقارالىق بىرىككەن كوميسسياسى (Joint Commission International) الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ قىزمەتىن تەكسەرىپ, حالىقارالىق ستاندارتتارعا ساي ەكەندىگىن تاعى دا راستادى, دەپ جازادى Egemen.kz.
قازاقستان ينستيتۋتى العاش رەت وسىنداي اۋديتتەن 2021 جىلى وتكەن, الايدا كورسەتىلەتىن كومەكتىڭ ساپاسى مەن قاۋىپسىزدىگىنىڭ جوعارى ستاندارتتارىن ساقتاۋ ءۇشىن JCI اككرەديتتەۋ ءۇش جىل سايىن جۇرگىزىلەدى.
JCI ستاندارتتارى بويىنشا بارلىق بولىمشەلەر مەن پروتسەستەر, ياعني پاتسيەنتتەردى ەمدەۋ جانە كۇتۋ تاسىلدەرى, ولاردىڭ قاۋىپسىزدىگى مەن قۇقىقتارىنىڭ ساقتالۋى, عيماراتتىڭ قاۋىپسىزدىگى, ءدارى-دارمەكپەن جۇمىس ىستەۋ, ينفەكتسيالىق قاۋىپسىزدىك, كادرلارمەن قامتاماسىز ەتۋ, تاۋەكەلدەردى باسقارۋ, ءبىلىم بەرۋ جانە عىلىمي پروتسەستەر, مەديتسينالىق جانە اكىمشىلىك پەرسونالدىڭ پاتسيەنتتەرگە جەكە كوزقاراسى باعالانادى. قاۋىپتىلىگى جوعارى ءدارى-دارمەكپەن دۇرىس جۇمىس ىستەۋ, ولاردى تاڭبالاۋعا جانە ساقتاۋعا, ينتسيدەنتتەردى باسقارۋعا, اۋرۋحاناىشىلىك ينفەكتسيالاردىڭ, قۇلاۋ سالدارىنان جاراقات الۋ قاۋپىن ازايتۋعا ەرەكشە نازار اۋدارىلدى.
JCI حالىقارالىق اككرەديتتەۋ بارىسىندا اۋديتورلار ينستيتۋتتاعى بارلىق مەديتسينالىق قىزمەت پەن جاسالعان جاعدايدى پاتسيەنتتىڭ كوزقاراسىمەن باعالايدى.
حالىقارالىق كوميسسيا مۇشەلەرى ينستيتۋتتا جوعارى دەڭگەيدەگى ماماندار پاتسيەنتتەرگە ساپالى كومەك كورسەتۋدە مۋلتيديستسيپلينارلىق ءتاسىلدى قولدانىپ, ءوزارا بايلانىستى ۇدەرىستەردە كوماندانىڭ ۇيلەسىمدى جۇمىس اتقاراتىنىن اتاپ ءوتتى.
اۋديتورلار توبى ينستيتۋتتا قولدانىلاتىن تيىمدىلىك پەن ساپانىڭ جەكەلەگەن ينديكاتورلارىن – مىسالى, قانت ديابەتىنە شالدىققان جۇكتى ايەلدەردى ەمدەۋ تاجىريبەسى, كارديورەابيليتاتسيا كەزەڭدەرى اراسىنداعى ساباقتاستىق ولشەمدەرى, ىشەكتىڭ ەندوسكوپياعا دايىندىق ساپاسىنىڭ كورسەتكىشتەرى مەن تاعى باسقاسىن JCI حالىقارالىق كىتاپحاناسىنا بەرۋگە شەشىم قابىلدادى. وسىناۋ وزىق تاجىريبە الەمدىك مەديتسينالىق ۇيىمدار اراسىندا تارالىپ, تاجىريبە الماسۋ مەن مەديتسينالىق قىزمەتتەردىڭ ساپاسىن ارتتىرۋعا ىقپال ەتەدى.
كلينيكانىڭ جۇمىسى 1110-نان استام كورسەتكىش بويىنشا باعالانىپ, تەك 10-ى بويىنشا تەكسەرۋ بارىسىندا جويىلعان ەلەۋسىز ەسكەرتۋلەر انىقتالعان.
س.اسفەندياروۆ اتىنداعى قازۇمۋ رەكتورىنىڭ ايتۋىنشا, رەاككرەديتتەۋ – قايتا اككرەديتتەۋدەن وتۋدەن الدەقايدا قيىن.
وسى ورايدا كىاعزي باسقارما توراعاسى مارات پاشيموۆ ءوز قىزمەتكەرلەرىنە العىس ايتا كەلە: «JCI ستاندارتتارى دەنساۋلىعى مەن ءومىرىن بىزگە سەنىپ تاپسىرعان پاتسيەنتتەردىڭ كۇتىمى مەن قاۋىپسىزدىگىنە باعىتتالعان. JCI اككرەديتاتسياسى پاتسيەنتتەرگە كلينيكاعا سەنىم ارتۋعا بولاتىنىن ايعاقتايدى. ءبىز JCI ۇسىناتىن قۇرالداردى پايدالانا وتىرىپ, قىزمەتتەردىڭ ساپاسىن ۇنەمى جاقسارتۋعا تىرىسامىز», دەيدى.
ساپانى باسقارۋدىڭ جۇيەلى ءتاسىلى ۇيىم قىزمەتىنىڭ تيىمدىلىگىن ارتتىرۋدا ىقپالى ۇلكەن. مۇنى سوڭعى جىلدارى كلينيكادا كلينيكالىق كورسەتكىشتەردىڭ جاقسارىپ, پاتسيەنتتەردىڭ مەديتسينالىق كومەكتىڭ ساپاسىنا كوڭىلى تولىپ, ءولىم-ءجىتىم ازايعانىنان, ءدارى-دارمەكتەردىڭ شيپاسىنىڭ ارتا تۇسكەنىنەن دە اڭعارۋعا بولادى.