كوكشەتاۋدا العاش رەت XV ۇلتتىق دەلفي ويىندارى وتەدى. مادەني ءىس-شارا 20-25 تامىز ارالىعىندا SILK WAY CREATIVE GAMES شىعارماشىل جاستار فورۋمىنىڭ اياسىندا ۇيىمداستىرىلادى, دەپ جازادى Egemen.kz.
ۇلتتىق دەلفي كوميتەتى جانە اقمولا وبلىسى اكىمدىگى ۇيىتقى بولعان شارادا 8-25 جاس ارالىعىنداعى 650-دەن استام ادام 25 نوميناتسيا بويىنشا باق سىنايدى.
بيىل ۇلتتىق دەلفي كوميتەتى وڭىرلىك كەزەڭدەردى ۇلتتىق جانە حالىقارالىق دەلفي قازىلار القاسىنىڭ اككرەديتتەلگەن مۇشەلەرىنىڭ باس بولۋىمەن كوشپەلى فورماتتا وتكىزدى. 15 قالادان ۇزدىك شىققان دارىندار قازاقستان ۇلتتىق قۇراماسىنىڭ مۇشەسى بولادى. ولار 30 قىركۇيەك - 5 قازاندا قىرعىزستان استاناسى بىشكەكتە وتەتىن تمد قاتىسۋشى ەلدەرىنىڭ العاشقى بالالار دەلفي ويىندارىندا ەل نامىسىن قورعايدى.
كوللابوراتسياعا مادەنيەت قايراتكەرلەرى, ۇلتتىق دەلفي ويىندارىنىڭ قازىلار القاسىنىڭ مۇشەلەرى, تمد دەلفي ۇيىمدارىنىڭ وكىلدەرى (رەسەي, تاجىكستان), 2024 جىلعى ساۋىردەن باستاپ ۇلتتىق دەلفي كوميتەتى كلۋبىنا مۇشە بولعان يۋنەسكو وكىلدەرى, قحا, نۆس, ESENfondasion, پارلامەنت دەپۋتاتتارى, اقمولا وبلىسى اكىمدىگىنىڭ قىزمەتكەرلەرى جانە باسقالار قاتىسادى.
2024 جىلعى XV ۇلتتىق دەلفي ويىندارى كوكشەتاۋ ورتالىق الاڭىندا وتەتىن سالتاناتتى اشىلۋ راسىمىنەن باستالادى. سودان كەيىن ەكى كۇن بويى قالانىڭ 25 الاڭىندا شىعارماشىلىق جارىستار, ولاردىڭ قورىتىندىسى بويىنشا 23 تامىزدا ماراپاتتالادى. سول كۇنى كەشكە «كوكشەتاۋ» مادەنيەت سارايىنىڭ الدىنداعى الاڭدا Open Air ۇيىمداستىرىلادى. 24 تامىزدا كوكشەتاۋ مادەنيەت سارايىندا ۇلكەن گالا-كونتسەرت ءوتىپ, فورۋم سالتاناتتى تۇردە جابىلادى.
الەمدەگى دەلفي ويىندارى – ونەردىڭ بارلىق تۇرلەرى بويىنشا جاس كاسىپقويلاردىڭ كەشەندى جارىستارى. ويىندار تالانتتاردى تاۋىپ قانا قويماي, ولاردىڭ جىل سايىن رەسپۋبليكالىق جانە حالىقارالىق دەڭگەيدە وسۋىنە, ءوزىن-ءوزى كورسەتۋىنە جانە جارىسۋىنا مۇمكىندىك بەرەدى. كوميتەتتىڭ بىرنەشە جىلعى جۇمىسى بارىسىندا قازاقستانداعى دەلفي قوزعالىسى 100 مىڭنان استام قولداۋشى تاپتى, كوميتەت جوبالارىنا 5 ميلليوننان استام وتانداسىمىز قاتىستى. ءار جىلدارى دەلفي ويىندارى ازامات جەلتىرعۇزوۆ, ديماش قۇدايبەرگەن, ءالي وقاپوۆ, Ratovich, «Sensitsve» بي تەاترى جانە ت.ب. سياقتى قازاقستاننىڭ مادەنيەت قايراتكەرلەرىنىڭ شىعارماشىلىق جولىنداعى الەۋمەتتىك ساتىعا اينالدى.