استانا. 12 ماۋسىم. قىزىلوردادا وڭىرلىك كاسىپكەرلىك پالاتاسى ءبىلىم وردالارىندا «كاسىپكەرلىك نەگىزدەرى» ءپانىن تولىقتاي ەنگىزۋ باعىتىندا جۇمىس جۇرگىزۋدە.
اتاپ ايتقاندا كاسىپكەرلەر پالاتاسى مەن وبلىستىق ءبىلىم باسقارماسى جانە «جاستار جەتىستىكتەر» قوعامدىق قورى بىرىگىپ مەكتەپ وقۋشىلارىن كاسىپكەرلىككە باۋلۋ جوباسىن ىسكە اسىرۋدا. بۇل تۋرالى egemen.kz حابارلادى.
وتكەن وقۋ جىلىندا جوبانىڭ العاشقى كەزەڭى رەتىندە №9 مەكتەپ-گيمنازياسىندا 5-10 سىنىپ وقۋشىلارىنا ارنالعان «كاسىپكەرلىك نەگىزدەرى» فاكۋلتاتيۆتىك ءپانى ەنگىزىلدى.
ال جوبانىڭ 2 كەزەڭىندە وبلىستاعى 40 مۇعالىم «كاسىپكەرلىك نەگىزدەرى» كۋرسى بويىنشا بىلىكتىلىكتەرىن ارتتىردى. سونداي-اق, ۇستازدار «اراي-Sunrise» لاگەرىندە ۇيىمداستىرىلعان «تابىس جولى» اتتى I جاستار فەستيۆالىنە قاتىستى.
ايتا كەتەيىك, بىلىكتىلىگىن ارتتىرعان ۇستازدار ءوز مەكتەپتەرىندە مەكتەپ «كومپانيالارىن» اشىپ, وقۋشىلاردى كاسىپكەرلىكتىڭ قىر-سىرىنا ۇيرەتۋگە كوشتى. ال ايماق بويىنشا 23 مەكتەپ كومپانياسى قاتىسقان فەستيۆالعا «پەترو قازاقستان قۇمكول رەسورسيز» اكتسيونەرلىك قوعامى مەن «رايم» جاۋاپكەرشىلىگى شەكتەۋلى سەرىكتەستىگى دەمەۋشىلىك جاسادى.
بايقاۋ ناتيجەسى بويىنشا جارىس جەڭىمپازدارى بولىپ: ءى ورىنعا قىزىلوردا قالاسىنىڭ №9 گيمنازيانىڭ «اتامەكەن» مەكتەپ كومپانياسى, ءىى ورىنعا جالاعاش اۋدانى № 123 مەكتەپتىڭ «بىرلىك», ءىىى ورىنعا № 173 ورتا مەكتەپتىڭ «ادەمى-اي» مەكتەپ كومپانيالارى يە بولسا, IV ورىنعا م.مامەتوۆا اتىنداعى قىزىلوردا گۋمانيتارلىق كوللەدجىنىڭ «التىن قول» كومپانياسى قول جەتكىزدى. جەڭىمپازدار ديپلومدارمەن, قارجىلاي سىيلىقتارمەن, ارنايى سەرتيفيكاتتارمەن ماراپاتتالدى.
تالعات رايىمبەك.
دەرەك, سۋرەت: قىزىلوردا وبلىسى كاسىپكەرلىك پالاتاسىنىڭ ءباسپاسوز قىزمەتى.