رەسپۋبليكانىڭ ەڭ بەلسەندى اۋىل ايەلدەرى باس قوسىپ, اۋىلدىڭ تۇراقتى دامۋىنا قاتىستى سىندارلى ۇسىنىستارىن بىلدىرە الاتىن فورۋم وسىمەن التىنشى رەت وتكىزىلىپ وتىر.
«اۋىل ايەلدەرىنىڭ فورۋمى» ايەلدەر كاسىپكەرلىگىن دامىتۋ جانە اۋىل تۇرعىندارىن ناتيجەلى جۇمىسپەن قامتۋ ارقىلى اۋىلدىڭ ءال-اۋقاتى مەن تۇرمىس ساپاسىن ارتتىرۋدىڭ جولدارىن ىزدەيتىن, باستامالاردى تالقىلايتىن الاڭعا اينالدى.
كوشباسشى ايەلدەردىڭ قاتىسۋىمەن وتكەن شارالار مارافونى قوستانايدان باستاۋ الدى. بۇل جيىندا اقمولا, اقتوبە, قوستاناي جانە سولتۇستىك قازاقستان وبلىستارىنىڭ وكىلدەرى باس قوستى. وسىناۋ اۋقىمدى جۇمىستىڭ ناتيجەسى بيىلعى قاراشا ايىندا استانادا بارلىق وبلىستاردان كەلگەن دەلەگاتسيالاردىڭ قاتىسۋىمەن وتەتىن اۋىل ايەلدەرىنىڭ VII رەسپۋبليكالىق فورۋمى بولماق.
– سوڭعى التى جىلدا ايماقتاردا اۋىلدىق ايەلدەر فورۋمىن وتكىزۋ داستۇرگە اينالدى. جەكە شارۋا قوجالىقتارىنىڭ دامۋىن, مەملەكەتتىك باعدارلامالاردىڭ جاڭالىقتارىن, الەۋمەتتىك سالاداعى جەتىستىكتەردى باس قوسىپ, تالقىلاپ جاتىرمىز. فورۋمعا قاتىسۋشىلار Coca-Cola Belesteri جوباسىنىڭ بيزنەس نەگىزدەرى جانە Farmer school ونلاين فەرمەرلىك شارۋاشىلىعى بويىنشا ترەنينگتەر ارقىلى پراكتيكالىق ءبىلىم الادى», - دەپ ءتۇسىندىردى قازاقستان اۋىل ايەلدەرى فورۋمىن ۇيىمداستىرۋ كوميتەتىنىڭ ءتورايىمى, پارلامەنت ءماجىلىسىنىڭ دەپۋتاتى مايرا ايسينا.
فورۋمعا كەلگەن 200-گە جۋىق قوناقتىڭ ىشىندە كاسىپكەرلەر مەن الەۋمەتتىك نىسانداردىڭ وكىلدەرى بار. قاتىسۋشىلاردىڭ ودان دا كوپ سانى قوستانايداعى فورۋمعا ونلاين قوسىلدى. كاسىپكەرلەر ەڭبەگىنىڭ جەمىسىن جىل سايىنعى «Coca-Cola بەلەستەرى» بايقاۋىنىڭ جەڭىمپازدارى مەن قوستاناي وبلىسىنىڭ قولونەرشىلەرىنىڭ قاتىسۋىمەن ۇيىمداستىرىلعان ءونىم جارمەڭكەسىندە كورۋگە بولادى. قوناقتار قولدان جاسالعان زەرگەرلىك بۇيىمداردى, قولونەر, ءسۇت ونىمدەرىن, ويىنشىقتاردى, ءۇي توقىما بۇيىمدارىن جانە ساندىك بۇيىمداردى ساتىپ الۋعا مۇمكىندىكتەرى بولدى.
وڭىرلىك فورۋمداردىڭ ناتيجەسى قاراشادا استانادا وتەتىن قازاقستان اۋىل ايەلدەرىنىڭ VII رەسپۋبليكالىق فورۋمى الاڭىندا ءار وبلىستان كەلگەن دەلەگاتتاردىڭ قاتىسۋىمەن وتەدى.