زەينەتاقى سالىمدارىنىڭ كىرىسى ءوستى

بجزق-نىڭ مىندەتتى زەينەتاقى جارنالارى (مزج), مىندەتتى كاسىپتىك زەينەتاقى جارنالارى (مكزج), ەرىكتى زەينەتاقى جارنالارى (ەزج) ەسەبىنەن قالىپتاستىرىلعان زەينەتاقى اكتيۆتەرىنەن ءتۇسىپ, سالىمشىلاردىڭ (الۋشىلاردىڭ) شوتتارىنا بولىنگەن كىرىستىلىك 2024 جىلدىڭ 6 ايىندا 6,59%-دى كورسەتتى. جىل باسىنان بەرگى ينفلياتسيا دەڭگەيى – 3,9%. ەگەر بجزق-نىڭ سوڭعى 12 ايداعى زەينەتاقى اكتيۆتەرىنىڭ كىرىستىلىگىن قاراستىرساق, وندا وسى كەزەڭدەگى ينفلياتسيا 8,4% بولعان كەزدە كىرىستىلىك 13,08%-دى كورسەتتى.

2024 جىلعى 1 شىلدەدەگى جاعداي بويىنشا جۇمىس بەرۋشىنىڭ مىن­دەتتى زەينەتاقى جارنالارى (جمزج) ەسە­بىنەن قالىپتاسقان بجزق زەينەتاقى اكتيۆتەرىنىڭ كىرىس­تىلىگى – 1,84%.

ينۆەستيتسيالىق كىرىس قارجى قۇرالدارى (باعالى قاعازدار, سالىمدار جانە باسقا وپەراتسيالار) بويىنشا سىياقى تۇرىندەگى كىرىستەردەن, قارجى قۇرالدارىن نارىقتىق جانە ۆاليۋتالىق قايتا باعالاۋدان, سىرتقى باسقارۋداعى اكتيۆتەر بويىنشا كىرىستەردەن تۇرادى. ۇلتتىق بانك جانە ين­ۆەس­تيتسيالىق پورتفەلدى باس­قارۋشىلار (يپب) زەينەتاقى اكتيۆتەرىن ينۆەستيتسيالىق كىرىس الۋ ماقساتىندا ەكونوميكانىڭ وزىمىزدەگى جانە شەتەلدەگى ءتۇرلى سەكتورلارىنىڭ ءارتۇرلى قارجى قۇرالىنا ءتۇرلى ۆاليۋتالاردا ورنالاستىرادى. ءارتاراپتاندىرۋ ورنىقتى ينۆەستيتسيالىق كىرىستىلىكتى قامتاماسىز ەتەدى», دەپ مالىمدەيدى بىرىڭعاي جيناقتاۋشى زەينەتاقى قورى (بجزق).

زەينەتاقى جيناقتارى – ۇزاق­­مەر­زىمدى ين­ۆەس­تيتسيا. سون­دىق­تان ينۆەستيتسيالىق كىرىستىڭ مولشەرىن كەم دەگەندە ءبىر جىلدا تالداعان ءجون دەيدى ساراپشىلار. ماسەلەن, جيناقتاۋشى زەينەتاقى جۇيەسى قۇرىلعان 1998 جىلدان باس­تاپ 2024 جىلعى 1 شىلدەگە دەيىنگى ينۆەستيتسيالىق كىرىس وسپەلى قورى­تىن­دىمەن 876,87% بولدى. بۇل كەزەڭدەگى ينفلياتسيا – 787,63%. وسىلايشا, ۇزاق مەرزىم ىشىندە جيناقتالعان ينۆەستيتسيالىق كىرىس ينفلياتسيادان اسىپ ءتۇستى.

ال سالىمشىلاردىڭ «بجزق»-داعى (2024 جىلعى 1 شىلدەدەگى جاعداي بويىنشا) زەينەتاقى جيناعى 20 ترلن تەڭگەگە جەتتى. جىل باسىنان بەرگى ءوسىم 2,1 ترلن تەڭگەدەن (11,8%) اسقان. وتكەن جىلدىڭ سايكەس كەزەڭىمەن سالىستىرساق, زەينەتاقى جيناقتارىنىڭ كولەمى 3,9 ترلن تەڭگەگە جۋىق نەمەسە 24,3%-عا كوبەيگەن.

«وتانداستارىمىز جيناق­تا­­رىنىڭ 96%-ى مزج ەسەبىنەن قالىپتاستىرىلدى, ونىڭ كولەمى شامامەن 19,3 ترلن تەڭگە بولدى ء(بىر جىلداعى ءوسىم – 23,7%, جىل باسىنان بەرى – 11,3%). مكزج بو­­يىنشا زەينەتاقى جيناقتارىنىڭ سوماسى – 619,9 ملرد تەڭگە ء(بىر جىلداعى ءوسىم – 22,9%, جىل باسىنان بەرى – 9%). ەڭ ۇلكەن ءوسىمدى (جىلىنا 48,4%, جىل باسىنان بەرى 22,5%) ەرىكتى زەينەتاقى جارنالارى (ەزج) بويىنشا جيناقتار كورسەتتى, ونىڭ كولەمى – 6,5 ملرد تەڭگە. زەينەتاقى جيناقتارىنىڭ ماڭىزدى قۇراۋشىسى – زەينەتاقى جارنالارى, ولاردىڭ كولەمى 2024 جىلدىڭ 6 ايىندا 1,3 ترلن تەڭ­گەدەن اسقان. بۇل وتكەن جىلعى كورسەتكىشتەن 28,4%-عا نەمەسە 290,8 ملرد تەڭگەگە ارتىق. اتاپ كەتەيىك, وتكەن جىلدىڭ سايكەس كەزەڭىمەن سالىستىرعاندا مىندەتتى زەينەتاقى جارنالارى (مزج) – 18,7%, مىندەتتى كاسىپتىك زەينەتاقى جارنالارى (مكزج) – 20,3%, ەرىكتى زەينەتاقى جارنالارى (ەزج) – 30,4% ءوسىمدى كورسەتتى», دەپ حابارلادى بجزق.

2024 جىلعى 1 قاڭتاردان باستاپ سالىمشىلاردىڭ (الۋشىلاردىڭ) زەينەتاقى شوتتارىنا قوسىمشا قاراجات – جۇمىس بەرۋشىنىڭ مىندەتتى زەينەتاقى جارنالارى (جمزج) ءتۇسىپ جاتىر. 2024 جىلدىڭ 6 ايىندا جمزج ەسەبىنەن قالىپتاسقان زەينەتاقى جيناقتارىنىڭ سوماسى شامامەن 98,9 ملرد تەڭگە بولدى.

جيناقتاردىڭ تاعى ءبىر ماڭىز­دى بولىگى – ينۆەستيتسيالىق كىرىس. 2024 جىلدىڭ ءبىرىنشى جارتى­جىل­دىعىندا بجزق سالىم­شىلارىنىڭ جەكە جانە شارتتى زەينەتاقى شوتتارىنا ەسەپتەلگەن تازا ينۆەس­تي­تسيالىق كىرىس شامامەن 1,21 ترلن تەڭگەگە جەتتى. وسى جىلدىڭ 6 ايىن­دا بجزق-دان تولەمدەر تۇرىن­دەگى شىعىس اعىندارى 457,6 ملرد تەڭگەدەن استى. بۇل رەتتە وسى سومانىڭ نەگىزگى بولىگىن تۇرعىن ءۇي جاعدايلارىن جاقسارتۋعا جانە ەمدەلۋگە ارنالعان بىرجولعى زەينەت­اقى تولەمدەرى (بزت) قۇرايدى – ول شامامەن 190,4 ملرد تەڭگە, بۇل وتكەن جىلعى كورسەتكىشتەن 2,4 ەسە جوعارى.

زەينەت جاسىنا تولۋىنا بايلانىستى تولەمدەر شامامەن 97,3 ملرد تەڭگە بولدى.

سونداي-اق:

مۇراگەرلىك بويىنشا تولەم­دەر – 28,6 ملرد تەڭگە; ەل اۋماعىنان تىس تۇراقتى تۇرۋعا كەتۋگە بايلانىستى تولەمدەر – 17,9 ملرد تەڭگە; مۇگەدەكتىگى بار ادامدارعا تولەمدەر – 1,5 ملرد تەڭگە; جەرلەۋگە تولەمدەر – 4,9 ملرد تەڭگە مولشەرىندە جۇزەگە اسىرىلدى.

ساقتاندىرۋ ۇيىمدارىنا 117 ملرد تەڭگەدەن استام سوما اۋدا­رىل­دى. بجزق-دان كەستە بويىنشا ورتاشا ايلىق تولەم سوماسى (زەينەت جاسىنا تولۋىنا بايلانىستى) 33 883 تەڭگە بولسا, اي سايىنعى تولەمنىڭ ەڭ جوعارى سوماسى 945 752 تەڭگەگە تەڭ. وتكەن جىلدىڭ وسى كەزەڭىندە بجزق-دان كەستە بويىنشا اي سايىنعى تولەمنىڭ ورتاشا سوماسى 32 111 تەڭگە, ال اي سايىنعى تولەمنىڭ ەڭ جوعارى سوماسى 742 692 تەڭگە بولعان ەدى.

2024 جىلعى 1 شىلدەدەگى جاعداي بويىنشا بجزق-داعى سالىم­شى­لاردىڭ جەكە زەينەتاقى شوت­تارىنىڭ (جزش) سانى – 12,4 ملن بىرلىك, ونىڭ ىشىندە: 11,1 ملن-ى – مزج بويىنشا, 688,6 مىڭى – مكزج بويىنشا, 421,3 مىڭى – ەزج بويىنشا.