تاياۋدا قارجى نارىعىن رەتتەۋ جانە دامىتۋ اگەنتتىگى (قنردا) بانك سەكتورىنا قاتىستى سوڭعى دەرەكتەردى جاريالادى. نازار سالساق, 2024 جىلعى 1 شىلدەدەگى جاعداي بويىنشا بانك سەكتورىنىڭ اكتيۆتەرى نەگىزىنەن ءوتىمدى اكتيۆتەردىڭ 5,8%-عا نەمەسە 1,2 ترلن تەڭگەگە ءوسۋى ەسەبىنەن بيىل ماۋسىمدا 3,9%-عا نەمەسە 2,1 ترلن تەڭگەگە ۇلعايىپ, 55,3 ترلن تەڭگەنى قۇراعان. ال ەكونوميكاعا بەرىلگەن كرەديت 2,0 پايىزعا, 30,1 ترلن تەڭگەگە دەيىن كوبەيىپتى.
ەكونوميكاعا نەسيە ۇسىنۋ كورسەتكىشى جىل باسىنان بەرى 7,7%-عا ارتىپتى. ونىڭ ىشىندە ۇلتتىق ۆاليۋتادا 1,5 پايىزعا, 27,6 ترلن تەڭگەگە دەيىن, شەتەل ۆاليۋتاسىندا 7,4 پايىزعا, 2,5 ترلن تەڭگەگە دەيىن ۇلعايعان. ناتيجەسىندە, تەڭگەدەگى كرەديتتەردىڭ ۇلەس سالماعى 2024 جىلعى 1 شىلدەدەگى جاعداي بويىنشا 91,6 پايىزدى قۇرادى.
«بيزنەس سۋبەكتىلەرىنە بەرىلەتىن كرەديتتەر 2024 جىلعى ماۋسىمدا 2,0 پايىزعا, 11,8 ترلن تەڭگەگە دەيىن ارتتى. 2024 جىلدىڭ باسىنان بەرى 4,5 پايىزعا ءوسىم كورسەتتى. ولاردىڭ قۇرىلىمىندا زاڭدى تۇلعالارعا بەرىلەتىن كرەديتتەر 1,6 پايىزعا, 9,8 ترلن تەڭگەگە دەيىن ءوستى. جىل باسىنان بەرى 1,5 پايىزعا جوعارىلادى. شاعىن جانە ورتا بيزنەس (شوب) سۋبەكتىلەرىنە قارىزدار 5,8 پايىزعا, 5,9 ترلن تەڭگەگە دەيىن كوبەيدى. ءىرى بيزنەسكە قارىزدار 4,0 پايىزعا, 3,9 ترلن تەڭگەگە دەيىن ازايدى. بۇل نەگىزىنەن وسى ساناتتاعى بانكتەردىڭ ءبىرىنىڭ شوب قارىزدارى ساناتىنا قايتا جىكتەلۋىنە بايلانىستى. جەكە كاسىپكەرلەرگە بەرىلەتىن كرەديتتەر ءبىر ايدا 3,8 پايىزعا, 1,9 ترلن تەڭگەگە دەيىن ارتتى», دەلىنەدى قنردا حابارلاماسىندا.
2024 جىلعى ماۋسىمدا بيزنەس سۋبەكتىلەرىنە 1,4 ترلن تەڭگە سوماعا جاڭا قارىزدار بەرىلگەن, بۇل 2023 جىلعى ماۋسىممەن سالىستىرعاندا 11,1 پايىزعا ارتىق. بيىل 6 ايدا 8,2 ترلن تەڭگە سوماعا بەرىلدى, بۇل 2023 جىلدىڭ ءتيىستى كەزەڭىمەن سالىستىرعاندا 19,8 پايىزعا كوپ.