«Astana invest» قالالىق ينۆەستيتسيالاردى دامىتۋ ورتالىعىنا قاراستى №1 يندۋستريالىق پاركتە زامانعا ساي ءتۇرلى ءونىم شىعاراتىن كوپتەگەن كاسىپورىن بار. سونىڭ ءبىرى – «Swissgrow» جشس. 2017 جىلى اشىلعان, 1,5 گەكتار اۋماقتى الىپ جاتقان كومپانيا جىل سايىن مىڭداعان توننا مينەرالدى تىڭايتقىشتى نارىققا شىعارادى.
مۇندا ەگىن مەن باۋ-باقشاداعى ونىمدىلىكتى ارتتىراتىن شۆەيتساريالىق تىڭايتقىشتىڭ ءتۇر-ءتۇرى بار. ال كاسىپورىننىڭ جوبالىق قۇنىن ايتار بولساق, 5 ميلليون دوللاردان استام قاراجات جۇمسالعان. ايتپاقشى, مۇنداي كاسىپورىندار تۇركيا مەن مەكسيكادا بار, سونداي-اق ەفيوپيا ەلىندە دە سالىنىپ جاتىر.
ء«بىزدىڭ ءونىمدى ەلىمىزدىڭ ءار وڭىرىندەگى ەگىس شارۋاشىلىعىنداعى قۇرىلىمدار كوپتەپ پايدالانادى. سونداي-اق كورشىلەس وزبەكستان مەن قىرعىز رەسپۋبليكاسىنان دا تۇتىنۋشىلارىمىز بار. بۇگىندە زاۋىتتا 80 ءتۇرلى تىڭايتقىش شىقسا, ونىڭ ىشىندە توپىراق قۇنارىن ارتتىراتىن, وسىمدىكتىڭ وسۋىنە كومەكتەسەتىن, باۋ-باقشا داقىلدارىنىڭ ءتۇرلى اۋرۋىنا توسقاۋىل بولاتىن, تاعى باسقا پايدالى جاعى كوپ ونىمدەرىمىز جەتكىلىكتى. وزىڭىزگە بەلگىلى, ءبىزدىڭ كەيبىر ايماقتاردا ەگىستىكتەگى ونىمدىلىكتى ارتتىرۋعا كەدەرگى بولاتىن جاعدايلار كوپ. قيىن كليمات, قۇرعاقشىلىق, ىلعال جەتىسپەۋشىلىگى, باسقا دا ولقىلىقتار ديقاندار ەككەن داقىلدى ءتۇرلى اۋرۋعا ۇشىراتىپ جاتادى», دەيدى «Swissgrow» جشس ديرەكتورى رۇستەم اليەۆ.
– بۇل اۋىل شارۋاشىلىعى ءۇشىن ۇلكەن شىعىن ەكەنى ءسوزسىز. ءبىزدىڭ ءونىمنىڭ باستى قاسيەتى – مۇنداي وسىمدىكتەردە كەزدەسەتىن اۋرۋلارعا جول بەرمەۋىندە. ءبىر عانا مىسال ايتايىن. تۇراقتى تۇتىنۋشىمىزدىڭ ءبىرى – پاۆلودار وبلىسىنداعى كارتوپ داقىلىن ەگەتىن شارۋاشىلىق. العاشىندا ولار گەكتارىنا 25-28 توننا ءونىم جيناعان. تىڭايتقىشتى تۇراقتى پايدالانعان سوڭ ونىمدىلىك ارتتى. داقىلدىڭ شىعىمدىلىعى جىل سايىن كوبەيىپ, ءبىرىنشى جىلى 40 تونناعا, ودان كەيىنگى جىلدارى 55-60 تونناعا دەيىن كارتوپ العان», دەيدى سەرىكتەستىك ديرەكتورى.
حالىقارالىق ستاندارتقا ساي سەرتيفيكاتتالعان كومپانيا ءوز ءونىمىنىڭ ارقايسىسىن جەكە زەرتحانادا ۇدايى تەكسەرىپ وتىرادى. ءار شىققان ءونىم پارتياسى ەرەكشە قاداعالانىپ, ساپا كەپىلدىگىمەن جۇمىس ىستەيدى. ءارى مۇندا تىڭايتقىش دايىنداۋعا قاجەتتى عىلىمي ماماندار – جوعارى بىلىكتى اگرونومدارى دا بار. ولار فەرمەرلەرگە تىڭايتقىشتاردى قالاي پايدالانۋ تۇرعىسىنان نۇسقاۋ بەرىپ, كومەك كورسەتە الادى.
«كاسىپورىندا 25 ادام جۇمىس ىستەيدى. جىلىنا 15 000 توننا سۇيىق جانە سۋسىمالى تىڭايتقىشتاردى نارىققا شىعارىپ وتىرمىز. زاۋىتتا سۇيىق ونىمگە قاجەتتى قۇتىلاردى ارنايى شىعاراتىن جابدىق تا بار. ويتكەنى تىڭايتقىش ساپاسىن ساقتاۋعا كەپىلدىك بەرەتىن مۇنداي جابدىقتار ءبىزدىڭ نارىقتا جوق. باسقا ءونىم شىعارۋعا قاجەتتى قۇرىلعىلاردىڭ بارلىعى شەت مەملەكەتتەردەن كەلگەن. قازىر سۇرانىس وتە جوعارى, تۇتىنۋشى اۋىل شارۋاشىلىعى قۇرىلىمدار سانى دا جىل سايىن ارتىپ كەلەدى», دەيدى زاۋىت باسشىسى.
دەگەنمەن مۇندا بەلگىلى ءبىر قيىندىقتار دا بار. ماسەلەن, تەمىر, مىرىش, مارگانەتس, موليبدەن جانە باسقا دا قاجەتتى ەلەمەنتتەر ءبىزدىڭ جەر قويناۋىمىزدا بولعانىمەن, كاسىپورىن بارلىق شيكىزاتتى شەتەلدەن ساتىپ الىپ وتىر. شيكىزاتتىڭ يمپورتتالۋى ءونىم قۇنىنىڭ كوتەرىلۋىنە اسەر ەتەتىنى بەلگىلى. «بىزدە وسى ەلەمەنتتەردىڭ بارلىعى, ءتىپتى ءوندىرۋ كەزىندە دە قالىپتاسقان پەريودتىق جۇيە بار, بىراق تەرەڭ وڭدەۋ جوق. مىسالى, ەلدە مىستى كوپ مولشەردە وندىرەمىز, بىراق ول تەك شيكىزات رەتىندە ساتىلادى. ونى شەتەلدىكتەر ساتىپ الىپ, تەرەڭ وڭدەپ, قاجەتتى ماقساتقا پايدالانادى», دەيدى رۇستەم اليەۆ.
كاسىپورىن ەلىمىزدەگى تىڭايتقىش وندىرەتىن كومپانيالاردىڭ ىشىندە ۇزدىك وندىققا كىرەدى. اۋىل شارۋاشىلىعىنداعى نەگىزگى تالاپتاردى ساقتاي وتىرىپ, فەرمەرلەردىڭ شىعىنىن ازايتۋعا كومەكتەسكەن كاسىپورىن الداعى ۋاقىتتا ءوز ءونىمىنىڭ جىلدىق ۇلەسىن ءوسىرۋدى كوزدەيدى.