وزگە سالالار سەكىلدى مەديتسينا اركەز جوعارى تەحنولوگيالىق قۇرال-جابدىقتارعا ءزارۋ. دەمەك دەنساۋلىق ساقتاۋ سالاسىنداعى يننوۆاتسيالىق جوبالاردان ۇتپاساق, ۇتىلمايمىز. مۇنى جاقسى بىلەتىن «QazBioPharm» ۇلتتىق حولدينگى شەتەلدىك كومپانيالارمەن اۋقىمدى جوبالاردى ۇيلەستىرۋگە نيەتتى.
مۇنى ءبىز بىرەر كۇن بۇرىن «QazBioPharm» مەن قىتايلىق «Beijing Genomics Institute» كومپانياسى «يننوۆاتسيالىق گەنومدىق جانە وميكالىق تەحنولوگيالاردى ەنگىزۋ جانە دامىتۋ» تاقىرىبىندا وتكەن يننوۆاتسيالىق فورۋمدا بىلدىك. فورۋمعا پرەزيدەنتتىڭ عىلىم جانە يننوۆاتسيالار ماسەلەلەرى جونىندەگى كەڭەسشىسى كۇنسۇلۋ زاكاريا, دەنساۋلىق ساقتاۋ ءمينيسترى اقمارال ءالنازاروۆا, «BGI Group» باس ديرەكتورى ين ە جانە جەتەكشى عالىمدار, مەملەكەتتىك جانە جەكە ۇيىمداردىڭ وكىلدەرى قاتىستى.
بۇل كۇنى حولدينگتىڭ ەنشىلەس ۇيىمى سانالاتىن ۇلتتىق بيوتەحنولوگيا ورتالىعىنىڭ بازاسىندا گەنومدىق زەرتحانا اشىلدى. قوناقتار جوعارى تەحنولوگيالىق زەرتحانالاردى تاماشالادى. وسى تۇستا مينيستر اقمارال ءالنازاروۆا بۇل قادامدى عىلىمنىڭ دامۋ جولىنداعى تاعى ءبىر ۇلكەن جوبا دەپ ءتۇسىندىردى. ىزىنشە, تاراپتارعا العىس ايتىپ, تابىس تىلەدى.
«QazBioPharm» زەرتتەۋ ورتالىقتارى جىل وتكەن سايىن جاڭارىپ, زەرتحانالارى تولىعىپ كەلەدى. ارينە, كوشتىڭ الدىندا بولۋدى ويلاساق, قازىردەن باسەكەگە قابىلەتتى بولۋ قاجەت. ال «BGI» كومپانياسىنىڭ الەم ەلدەرى قىزىعىپ وتىرعان يننوۆاتسيالارى كوپ. بىلىكتى كادر دايارلاۋ ىسىنە دە بەيجاي قاراۋعا بولماس. سوندىقتان «QazBioPharm» BGI-مەن بىرگە جاڭا باعىتتار بويىنشا مامان دايارلاۋعا نيەتتى. وسى تۇستا ء«Qazىnnovations» يننوۆاتسيالاردى دامىتۋ جونىندەگى ۇلتتىق اگەنتتىگى» اق باسقارما توراعاسى سانات جولدىحان يننوۆاتسيالىق جوبالار تۋرالى پىكىر ءبىلدىردى.
– بۇگىنگى يننوۆاتسيالىق فورۋمنىڭ ءمان-ماڭىزى جوعارى. ويتكەنى ءبىز وسى كۇنگە دەيىن شيكىزات وندىرەتىن ەل بولىپ تانىلساق, كەلەشەكتە جوعارى تەحنولوگيالىق يننوۆاتسيالىق جاعىنان دامىعان ەلدەردىڭ قاتارىندا بولۋىمىز كەرەك. وسى باعىتتا دامىساق, ءبىزدىڭ جاھاندا باسەكەگە قابىلەتىمىز ارتادى. يننوۆاتسيا مەن تەحنولوگيالاردى جاڭا دەڭگەيگە كوتەرەتىن ءسات كەلدى. «BGI» – الىپ كومپانيا. بۇگىن, مىنە, ءبىزدىڭ ەلمەن بىرلەسىپ زەرتحانا اشىپ وتىر. مۇنداي تاجىريبەلەر ەلدە كوپ بولۋى كەرەك. قازىر بارلىق تەحنولوگيا اۆتوماتتاندىرىلعان. بىرتە-بىرتە وسىعان كوشۋ – زامان تالابى. مەديتسينادا تەحنولوگيالاردى دامىتۋ – مەملەكەت كوڭىل ءبولىپ وتىرعان باسىم باعىتتاردىڭ ءبىرى. مۇنى سالاداعى اتقارىلىپ جاتقان جۇمىستاردان بىلۋگە بولدى. ەلىمىز وسى نارىقتان ءوزىنىڭ ورنىن تابۋى كەرەك, – دەيدى س.جولدىحان.
«QazBioPharm» ۇلتتىق حول-دينگىنىڭ باس ديرەكتورى ەرعالي ءابدىرايىموۆتىڭ ايتۋىنشا, ەلدە بۇرىن بالاما قۇرىلعىلار بولعانىمەن ءدال وسىنداي الەۋەتى زور زەرتحانا بولماپتى. حولدينگتىڭ باسشىسى الەۋەتى جوعارى تەحنولوگيالاردىڭ مۇمكىندىگىن جارىم-جارتىلاي ەمەس, تولىق پايدالانۋعا مۇددەلى ەكەنىن بايقاتتى.
– الەمدە قولدانىلىپ جاتقان تەحنولوگيالاردىڭ كومەگىمەن ءبىز بالامالى دياگنوستيكالىق جۇيەنى جاقسارتامىز دەپ وتىرمىز. ويتكەنى كەيىنگى جىلدارى پەريناتالدى دياگنوستيكا جانە قاتەرلى ىسىكتەردىڭ الدىن الۋ دياگنوستيكاسى وتە كۇردەلى بولىپ تۇر. ءبىزدىڭ ەل ءۇشىن دە بۇل وزەكتى. بۇگىن ءبىز «BGI» كومپانياسىمەن بىرگە زەرتحانا اشىپ وتىرمىز. مۇنداعى جۇمىستار بىردەن ەمەس, كەزەڭ-كەزەڭىمەن ىسكە اسادى. ءبىز اسا اۋىر سىرقاتتاردى انىقتاۋ ءۇشىن وسى زەرتحانانىڭ مۇمكىندىگىن تولىق پايدالانۋدى ويلاپ وتىرمىز. ول ءۇشىن ءالى قوسىمشا قوندىرعىلار تولىقتىرىلادى. زەرتحانا كەڭەيەدى, ءالى تالاي زەرتتەۋلەر جۇرگىزىلەدى. بىزگە قازىر جەتكىزىلگەن قۇرىلعىلاردىڭ باعاسى دا اجەپتاۋىر قىمبات. جۇمىستىڭ العاشقى كەزەڭىندە ءوزىمىزدىڭ مامانداردى تارتامىز. سوسىن جۇمىس بارىسىندا «BGI»-مەن بىرگە قوسىمشا تاعى مامان دايارلايمىز, – دەدى ە.ءابدىرايىموۆ.