ازيا دامۋ بانكى (ادب) قازاقستاننىڭ بەج وڭتۇستىك ايماعىنىڭ ەلەكتر جەلىسىن 58,2 ملرد تەڭگەگە كۇشەيتۋ جونىندەگى جوبانى قارجىلاندىراتىن بولادى. بۇل كرەديتتىك كەلىسىمدى جاساسۋ حالىقارالىق قارجى ينستيتۋتتارىنىڭ «سامۇرىق-قازىنا» اق توبىنىڭ ساتىپ الۋ راسىمدەرىنە, سونداي-اق حالىقارالىق ليستينگىلىك كومپانيالارعا سايكەس كەلەتىن «KEGOC» قىزمەتىنە دەگەن سەنىمىن راستايدى.
مەردىگەرلەر جوبالاۋ-سمەتالىق قۇجاتتامانى ازىرلەۋ بويىنشا جۇمىس جۇرگىزىپ جاتىر. كەيىننەن جالپى ۇزىندىعى 475 كم بولاتىن 2 ەلەكتر جەتكىزۋ جەلىسىن (قۋاتتىلىعى – 500 كۆ) سالۋدى, سونداي-اق 500 كۆ «شۋ», «جامبىل» جانە «شىمكەنت» ءۇش قوسالقى ستانساسىن رەكونسترۋكتسيالاۋدى جانە كەڭەيتۋدى كوزدەيتىن قۇرىلىس-مونتاجداۋ جۇمىستارىن ورىندايدى.
بۇل جوبا ەلەكتر ەنەرگياسىن, ونىڭ ىشىندە جاڭارتىلاتىن ەنەرگيا كوزدەرىنەن ءىرى اۋقىمدا گەنەراتسيالاۋدى جەلىگە ينتەگراتسيالاۋعا, ەلدىڭ وڭتۇستىگىندە ەلەكتر ەنەرگياسىن جەتكىزۋدى كۇشەيتۋگە جانە تۇراقتاندىرۋعا, سونداي-اق ەلىمىزدىڭ ەنەرگەتيكالىق قاۋىپسىزدىگىن ارتتىرۋعا مۇمكىندىك بەرەدى.
«ادب-نىڭ «KEGOC» اق-مەن سەرىكتەستىگى ءبىزدىڭ ەلگە نولدىك شىعارىندىلار, ەنەرگيا اۋىسۋى جانە جاڭارتىلاتىن ەنەرگيا كوزدەرىن پايدالانۋدى كەڭەيتۋ بويىنشا ماقساتتارعا قولجەتكىزۋگە كومەكتەسەدى. بۇل جوبا جاڭا گەنەراتسيالايتىن قۋاتتاردى ەنگىزۋمەن سينحروندالعان, ەلەكتر ەنەرگياسىن جەتكىزۋ كەزىندەگى ىسىراپتى ازايتۋعا مۇمكىندىك بەرەدى جانە ءوڭىردىڭ ەكونوميكالىق دامۋىنا وڭ اسەر ەتەدى», دەيدى ادب-نىڭ جەكە سەكتورداعى وپەراتسيالار جونىندەگى باس ديرەكتورى سيۋزاننا گابۋري.
«ادب «KEGOC» اق-عا كومەك كورسەتەدى جانە جاڭارتىلاتىن ەنەرگيا كوزدەرىن ينتەگراتسيالاۋ جانە ۇلتتىق ەلەكتر تورابىن دامىتۋ بويىنشا تەحنيكالىق كونسۋلتاتسيالار بەرەدى».
«ۇلتتىق ەلەكتر تورابىنىڭ جاڭا ارحيتەكتۋراسى وڭتۇستىك ولكەنىڭ جاڭارتىلاتىن جانە ءداستۇرلى ەنەرگيا كوزدەرىنىڭ وراسان زور الەۋەتىن ەنەرگيا تەڭگەرىمىنە تارتۋعا مۇمكىندىك بەرەدى. ەكسپورتتىق جانە ترانزيتتىك الەۋەت ەداۋىر ارتادى جانە بۇكىل ءوڭىردىڭ ەنەرگەتيكالىق قاۋىپسىزدىگى كۇشەيتىلەتىن بولادى. وسىنداي ماڭىزدى جوبالاردا بىرلەسىپ جۇمىس ىستەۋ مۇمكىندىگى ءۇشىن ازيا دامۋ بانكىنە العىس ايتامىز», دەپ اتاپ ءوتتى «KEGOC» اق باسشىسى ءنابي ايتجانوۆ.