2024 جىلدىڭ II توقسانىندا ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ بەكەتتەرىندە جالپى سالماعى 779,2 كەلى 14 752 التىن قۇيما ساتىلدى. حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان بولاتىن. باعدارلاما قولعا الىنعالى جالپى سالماعى 7 توننا 185 295 التىن قۇيما ساتىلدى.
التىن قۇيمالار بەس ءتۇرلى سالماقتا ۇسىنىلادى: 5, 10, 20, 50 جانە 100 گرامم. ساتىپ الۋشىلار اراسىندا وتە جوعارى سۇرانىسقا يە ءتۇرى – 100 گرامدىق التىن قۇيما. جالپى, ساتىلعان قۇيمالار اراسىندا ونىڭ ۇلەسى 25% – 46 007 دانا. ودان كەيىن 10 گرامدىق التىن قۇيما – 45 781 دانا (25%), 5 گرامدىق قۇيما – 41 592 دانا (22%), 20 گرامدىق قۇيما – 29 796 دانا (16%), جانە 50 گرامدىق قۇيما – 22 119 دانا (12%).
«التىن قۇيمالار سەنىمدى ينۆەستيتسيا قۇرالى بولا الادى. نارىقتاعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ بەكەتتەرى كليەنتكە اقشانى سول كۇنى تولەي وتىرىپ, التىن قۇيمالاردى كەرى ساتىپ الا الادى. باعدارلاما باستالعاننان بەرى ەكىنشى دەڭگەيلى بانكتەر مەن جەكەلەگەن بانكتىك ەمەس پۋنكتتەر جالپى سالماعى 1 توننا 38 374 التىن قۇيمانى كەرى ساتىپ العان. بۇل – جالپى ساتىلعان التىن قۇيمالاردىڭ 21%-ى», دەلىنگەن ۇلتتىق بانك حابارلاماسىندا.
ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى, ميكروتەكست جانە بەدەرلى جيەگى بار) جانە مەحانيكالىق زاقىمدانۋدان قورعايتىن ارنايى قوراپقا سالىنىپ شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ سونداي-اق ساپا سەرتيفيكاتى بولىپ سانالادى. سوندىقتان التىن قۇيمانى ۇقىپتى ساقتاپ, قورابىن بۇلدىرمەۋ كەرەك. قازىر التىن قۇيمالاردى «Halyk Bank», «ەۋرازيالىق بانك», «Jusan Bank», «تسەنتركرەديت بانكى», سونداي-اق جەكەلەگەن بانكتىك ەمەس ورتالىقتاردان ساتىپ الىپ, كەرى ساتۋعا بولادى.