تاياۋدا ەل مەديتسيناسىندا ەلەڭ ەتكىزەر ەرەكشە وقيعا بولدى. وتاندىق دارىگەرلەر العاش رەت قۇرساقتا جاتقان شارانا دەنساۋلىعىنىڭ اقاۋىنا العاش رەت وپەراتسيا جاسادى. بۇل باستامانىڭ ماڭىزى زور. ويتكەنى مۇنداي وپەراتسيالار بالالاردىڭ مۇگەدەك بوپ تۋىن ازايتۋعا ايتارلىقتاي سەپتەسەدى.
وپەراتسيا ءالى دۇنيەگە كەلمەگەن نارەستەنىڭ دەنساۋلىعى مەن ءومىرى تۋرالى كورسەتكىشتەرىن جاقسارتۋعا مۇمكىندىك بەرەتىن جاعدايلاردا جاسالادى. ۇرىق حيرۋرگياسى – ەلىمىزدە قولعا الىنىپ جاتقان مەديتسينانىڭ مۇلدەم جاڭا باعىتى. ۇرىق مەديتسيناسى, ياعني فەتالدى حيرۋرگيا – بۇل مەديتسينانىڭ قۇرساقتاعى شارانانى ەمدەيتىن جوعارى مامانداندىرىلعان سالاسى. بۇل حيرۋرگيا زاقىمى از پروتسەدۋرالار ارقىلى جاتىرعا بىتكەن بالانىڭ پاتولوگيالىق اۋىتقۋلارىن ەرتە باستان تۇزەتىپ, ەمدەۋگە مۇمكىندىك بەرەتىن يننوۆاتسيالىق تەحنولوگيالارعا نەگىزدەلگەن.
وتاندىق دەنساۋلىق ساقتاۋ سالاسىنا سەرپىن بەرەتىن جوبا دەنساۋلىق ساقتاۋ مينيسترلىگى مەن «Ayala» قايىرىمدىلىق قورىنىڭ قولداۋىمەن قولعا الىنعانىن ايتا كەتكەن ءجون.
نارەستەلەردىڭ ءتۋابىتتى كەسەلدەرىن ازايتۋعا كۇش سالىپ وتىرعان الماتىداعى پەريناتولوگيا جانە بالالار كارديوحيرۋرگياسى ورتالىعىندا ۇزاق جىل بويى ۇرىق وپەراتسيالارىن تابىستى جۇزەگە اسىرىپ جۇرگەن رەسەيدەگى جەتەكشى «انا مەن بالا» مەديتسينالىق ورتالىعىنىڭ حيرۋرگتەرى – مارك كۋرتسەر مەن ناتاليا كوسوۆتسوۆا, ەكاتەرينبۋرگ قالاسىنداعى انا مەن بالانى قورعاۋ عزي حيرۋرگى اندرەي بۋگەرەنكونىڭ قاتىسۋىمەن قازاقستانداعى العاشقى جاتىرىشىلىك پاتولوگيانى تۇزەتۋ بويىنشا پراكتيكالىق شەبەرلىك ساعاتى ءوتتى.
«مينيسترلىك بالالاردىڭ مۇگەدەك بولىپ تۋىن تومەندەتۋدى باستى مىندەت دەپ سانايدى. وسى ماقسات جولىندا ۇرىق حيرۋرگياسى – الەمدەگى ەڭ ماڭىزدى قۇرالداردىڭ ءبىرى. ءبىز كەيىنگى 30 جىلدىڭ ىشىندە ۇرىق وپەراتسيالارى سالاسى بويىنشا وزىق الەمدىك تاجىريبەلەردى تالدادىق. بۇل ءبىلىمنىڭ بارلىعى قازاقستاندا العاش رەت ازىرلەنگەن ۇرىق حيرۋرگياسىنىڭ ستاندارتتارىنا نەگىز بولدى. پەريناتولوگيا جانە بالالار كارديوحيرۋرگياسى ورتالىعىنىڭ (الماتى), UMC (استانا) دارىگەرلەرىنىڭ بريگادالارى قازاقستاندا جانە شەتەلدە ۇرىق حيرۋرگياسى بويىنشا ۇزاقمەرزىمدى كۇردەلى تەوريالىق جانە پراكتيكالىق دايىندىقتان ءوتتى. سوندىقتان وتاندىق دەنساۋلىق ساقتاۋ سالاسى ءۇشىن بۇل – اسا ماڭىزدى كۇن», دەدى دەنساۋلىق ساقتاۋ ءمينيسترى اقمارال ءالنازاروۆا.
قازاقستاندا ۇرىق حيرۋرگياسىن ىسكە قوسۋعا دايىندىقتى دەنساۋلىق ساقتاۋ مينيسترلىگى ەكى جىل بويى جۇرگىزىپ, بۇل باستاماعا الماتىداعى پەريناتولوگيا جانە بالالار كارديوحيرۋرگياسى ورتالىعى مەن استاناداعى UMC كق-نىڭ دارىگەرلەر توبى تاڭدالدى.
دەنساۋلىق ساقتاۋ مينيسترلىگى مەن «Ayala» قايىرىمدىلىق قورى ۇرىق حيرۋرگياسى بويىنشا دارىگەرلەردىڭ شەتەلدىك ەمحانالاردا جەكە وقۋىن ۇيىمداستىرىپ, وننان اسا پراكتيكالىق شەبەرلىك ساباقتارى مەن سەمينارلارعا قاتىسۋىن قامتاماسىز ەتتى. سونىمەن قاتار قور وتكەن جىلى دارىگەرلەردىڭ يسپانيادا وتكەن دۇنيەجۇزىلىك ۇرىق حيرۋرگياسى كونگرەسىنە ساپارىن ۇيىمداستىرعان.
«قازاقستاندا بالالاردىڭ مۇگەدەك بولىپ تۋىن ازايتۋ –«Ayala» قورىنىڭ باستى مىندەتتەرىنىڭ ءبىرى. ءبىز ەلىمىزدە ۇرىق حيرۋرگياسىن ىسكە قوسىپ, قالىپتاستىرۋعا كومەكتەسكەنىمىزدى مارتەبە تۇتامىز. 29,3 ملن تەڭگەدەن اسا سوماعا پەريناتولوگيا جانە بالالار حيرۋرگياسى ورتالىعىنداعى ۇرىق حيرۋرگياسى بولىمشەسىن ارنايى مەديتسينالىق قۇرالدارمەن – لازەر, فەتوسكوپتارمەن جابدىقتاۋعا كومەكتەسكەن سەنىمدى سەرىكتەسىمىز «Gasenergy» كومپانياسىنا دا العىس ايتامىز», دەيدى «Ayala» قايىرىمدىلىق قورىنىڭ نەگىزىن قالاعان ءارى پرەزيدەنتى ايدانا سۇلەيمەنوۆا.
ال الماتى قالاسىنداعى پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆانىڭ ايتۋىنشا, ماماندارىمىز يزرايل, رەسەي, يسپانيا, بەلارۋس, پورتۋگاليا سياقتى ەلدەردە ءبىلىم الىپ, جاڭا تەحنولوگيالاردى دايىنداۋ مەن يگەرۋدە ۇلكەن جۇمىس اتقاردى. جاتىرىشىلىك اۋىتقۋلاردى ەمدەۋدە جىلىنا شامامەن 150-گە جۋىق وپەراتسيا جاسالادى دەپ جوسپارلانىپ وتىر. ۇرىق حيرۋرگياسى جوباسى انا مەن بالاعا كورسەتىلەتىن مەديتسينالىق كومەكتىڭ ساپاسىن جاقسارتۋداعى جاڭا كەزەڭى بولماق.
سونداي-اق تاياۋ كۇندەرى «Ayala» قورىنىڭ قولداۋىمەن استانادا UMC بازاسىندا مەديتسينا عىلىمدارىنىڭ دوكتورى, International Fetal Medicine and Surgery Society (IFMSS) مۇشەسى ناتاليا كوسوۆتسوۆانىڭ قاتىسۋىمەن ۇرىق حيرۋرگياسى بويىنشا العاشقى پراكتيكالىق شەبەرلىك ساباعى وتكىزىلمەك.
قازىر اعزاعا زاقىمى از ەندوسكوپيالىق (فەتوسكوپيالىق) وپەراتسيالار اشىق حيرۋرگيانى الماستىرىپ وتىرعانىن ايتۋ ءلازىم. ويتكەنى مۇنداي وپەراتسيالار انا مەن جاتىرداعى شارانا ءۇشىن قاۋىپسىز. الەمنىڭ تالاي ەلىندە قۇرساقىشىلىك ەمدەۋگە جاتاتىن ۇرىق اۋرۋلارى اياسى جىلدان-جىلعا تولىعىپ, جاڭا تەحنولوگيالار ازىرلەنىپ, جەتىلدىرىلىپ جاتىر. ءتۋابىتتى جۇرەك كەسەلدەرى, ديافراگما جارىقتارى مەن وجج اۋرۋلارىنا قۇرساقتا جاتقان كەزىندە ەمدەۋ شارالارى بەلسەندى تۇردە ەنگىزىلىپ, جاقسى ناتيجەلەر بەرە باستاعانى قۋانتادى.
الماتى