ۇكىمەتتە «اڭساعان ءسابي» جوباسىنىڭ جۇزەگە اسۋ بارىسى قارالدى. پرەمەر-ءمينيستردىڭ ورىنباسارى تامارا دۇيسەنوۆا باعدارلامانىڭ باسى-قاسىندا جۇرگەن رەپرودۋكتولوگ ماماندارمەن, قوعام بەلسەندىلەرىمەن جانە دەنساۋلىق ساقتاۋ مينيسترلىگىنىڭ وكىلدەرىمەن كەزدەستى.
مەملەكەت باسشىسىنىڭ تاپسىرماسىمەن جۇزەگە اسىپ كەلە جاتقان باعدارلاما ارقىلى 7 مىڭنان اسا نارەستە دۇنيەگە كەلگەن بولاتىن. «ەكومەد» ادام رەپرودۋكتسياسى كلينيكالار توبىنىڭ عىلىمي جەتەكشىسى سالتانات بايقوشقاروۆا بالا ءسۇيۋدى اڭساعان ازاماتتار اراسىندا وعان سۇرانىس ارتىپ كەلە جاتقانىن جەتكىزدى.
«دەنساۋلىق ساقتاۋ مينيسترلىگىمەن تىعىز قارىم-قاتىناستا اتقارىلعان جۇمىستاردىڭ ناتيجەسىندە بىرقاتار ماسەلە شەشىمىن تاپتى. ءوز كەزەگىن كۇتكەن جۇپتار قازىر بۇرىنعىدان قاراعاندا كۆوتاعا جىلدامىراق قول جەتكىزەتىن بولدى. رەپرودۋكتولوگيا سالاسى قارقىندى دامىپ كەلەدى. كەيىنگى كەزدەرى ەمبريونداردى كرەوكونسەرۆاتسيالاۋدىڭ ارقاسىندا ەكستراكورپورالدى ۇرىقتاندىرۋ ءادىسىنىڭ ناتيجەلىلىگى ارتتى», دەدى سالتانات بايقوشقاروۆا.
ەكستراكورپورالدى ۇرىقتاندىرۋ ىسىندە قوعامدىق ۇيىمدار دا اتسالىسۋدا. ماسەلەن, «Mariyam» قايىرىمدىلىق قورىنىڭ كومەگىمەن 10 cəبي دۇنيەگە كەلگەن. ۇيىمنىڭ قامقورشىلىق كەڭەسىنىڭ توراعاسى ءلايلا سۇلتانقىزى جوبانى ودان ءارى جەتىلدىرۋگە بولادى دەگەن پايىمدا. بۇل رەتتە سالا ماماندارىمەن بىرلەسە وتىرىپ, بىرقاتار ۇسىنىستى ورتاعا سالدى.
قازىرگى ۋاقىتتا ەلىمىزدە جاساندى ۇرىقتاندىرۋ ىسىمەن 31 ورتالىق اينالىسادى. ونىڭ 19-ى مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا قىزمەت كورسەتىپ كەلەدى. ولارعا قاراستىرىلعان كۆوتالاردى ءبولۋ ءتارتىبىن قايتا قاراستىرۋ ۇسىنىلدى. سونداي-اق ەكستراكورپورالدى ۇرىقتاندىرۋ شاراسىنا كەتەتىن شىعىنداردى قايتا قاراۋ, ءتيىستى اقپاراتتىق جۇيەلەر اراسىنداعى ينتەگراتسيانى كۇشەيتۋ جاعى ءسوز بولدى. تامارا دۇيسەنوۆا ۇسىنىستارعا بايلانىستى دەنساۋلىق ساقتاۋ مينيسترلىگىنە ءتيىستى تاپسىرمالار بەردى.
سونداي-اق ۆيتسە-پرەمەر ماسەلەنىڭ سالدارىمەن قاتار, سەبەبىمەن جۇيەلى جۇمىس قاجەت ەكەنىن اتاپ ءوتتى. رەسمي دەرەككە ساي, ەلىمىزدە 4 مىڭنان اسا ەر-ازاماتقا جانە 29 مىڭنان اسا ايەلگە بەدەۋلىك دياگنوزى قويىلعان.
«ەڭ الدىمەن جاسوسپىرىمدەر, اتا-انالاردىڭ, جالپى حالىق اراسىندا سالاماتتى ءومىر سالتىن ۇستانۋعا بايلانىستى اقپاراتتىق-ناسيحات جۇمىسى كۇشەيتىلۋى شارت. قاجەتتى مەديتسينالىق پروفيلاكتيكالىق تەكسەرۋ شارالارىمەن قامتۋ ماڭىزدى. ءبىر سوزبەن ايتقاندا, دەنى ساۋ ۇرپاق تاربيەلەۋ ءۇشىن كەسەلدىڭ الدىن الۋعا كۇش سالۋىمىز قاجەت. ادام اعزاسىندا پاتولوگيا انىقتالعان جاعدايدا ەرتە باستان العاشقى كومەك بەرۋ جۇيەلى جۇرگىزىلۋى كەرەك», دەپ اتاپ ءوتتى ت.دۇيسەنوۆا.