ەگەر وقىرمان ەسىندە بولسا, بىلتىر ماۋسىم ايىندا ۇلتتىق قۇرىلتايدىڭ ەكىنشى وتىرىسىندا مەملەكەت باسشىسى قاسىم-جومارت توقاەۆ تاۋلىگىنە 24 ساعات جۇمىس ىستەيتىن كىتاپحانالار قۇرۋ تۋرالى باستاما كوتەرگەن ەدى. قازىرگى تاڭدا وسىناۋ ۇسىنىس الماتى سياقتى ۇلكەن شاھاردا ىسكە اسىپ جاتىر.
تاياۋ كۇندەرى مەگاپوليستە تاۋلىك بويى جانە دەمالىسسىز جۇمىس ىستەيتىن تاعى ءبىر كىتاپحانا پايدا بولدى. ءبىلىمىن بايىتامىن دەگەن, كەرەگىن ىزدەگەن وقىرماندار ءۇشىن 24/7 رەجىمىندە جۇمىس ىستەيتىن كىتاپحانا قاي تۇرعىدان الساق تا قولايلى.
ماسەلەن, وسى ورايدا الماتىنىڭ ەكى كىتاپحاناسى – جامبىل اتىنداعى قالالىق جاسوسپىرىمدەر كىتاپحاناسى مەن «Alatau Creative Hub» ورتالىعىنىڭ كىتاپحاناسى 2023 جىلدىڭ قىركۇيەك ايىنان بەرى (2023-2024 وقۋ جىلى) وقىرمانداردى تاۋلىك بويى قابىلداي باستاعانىن ايتا كەتۋگە بولادى.
الماتى قالالىق مادەنيەت باسقارماسى مۇنداي قادامدار وقۋشىلار, ستۋدەنتتەر, ماگيسترانتتار عانا ەمەس, دوكتورانتتار اراسىندا وتە قولايلى ەكەندىگى العا تارتا كەلە, اباي داڭعىلى, 141 مەكەنجايىندا ورنالاسقان كەزەكتى كىتاپحانا دا ەندى جەردە 24/7 رەجىمىندە جۇمىس ىستەيتىندىگىن حابارلادى.
«قازىرگە الماتىدا ءۇش كىتاپحانا وقىرمانداردى 24 ساعات بويى قابىلدايدى. كەز كەلگەن ادام وزىنە ىڭعايلى ۋاقىتتا كەلە الاتىندىقتان, كىتاپحاناعا كەلۋشىلەردىڭ قاراسى كوبەيدى. ناقتىراق ايتساق, 2023 جىلعى قىركۇيەك ايىنان بەرى جامبىل اتىنداعى قالالىق جاسوسپىرىمدەر كىتاپحاناسىنا 27 650 ادام كەلسە, «Alatau Creative Hub» ورتالىعىنىڭ كىتاپحاناسى 28 مىڭ وقىرمانعا قىزمەت كورسەتكەن. جالپى, الماتىلىقتار كىتاپ وقىعاندى جاقسى كورەدى. تەك قالالىق كىتاپحانالارداعى كورسەتكىشتەرگە توقتالساق, وقىرماندار جىل سايىن كەم دەگەندە ءۇش ميلليون رەت كەلىپ-كەتەدى», دەيدى الماتى قالالىق مادەنيەت باسقارماسىنىڭ وكىلدەرى.
قازىرگى تاڭدا الماتىدا 28 قالالىق كىتاپحانا جۇمىس ىستەيدى. ولاردىڭ 95%-ى جاڭعىرتىلىپ, ماتەريالدىق-تەحنيكالىق بازاسى مەن كىتاپ قورى تولىعىپ, جايلى وقۋ زالدارى مەن ينتەرنەت-زالدار پايدا بولدى.
الماتى كىتاپحاناشىلارى وقىرماندارعا قىزمەت كورسەتۋ ساپاسىن ارتتىرۋ ماقساتىندا العاش رەت وڭتۇستىك كورەيا, گەرمانيا جانە شۆەيتسارياداعى ۇزدىك كىتاپحانالاردا تاعىلىمدامادان ءوتىپ كەلدى.
الماتى