اۆتورى ادام با, مايمىل ما؟
ونەردىڭ قۇدىرەتى شەكسىز. شىن ونەر سەنبەسكە سەندىرەدى, تاڭعالماسقا تاڭعالدىرادى, جاناردى جاۋلايدى, جانىڭدى تولقىتادى. ءتىپتى كەيدە كوز الدىڭىزداعى ءتۇرلى ءتۇستى عاجايىپقا تولى كەنەپتى كىم سالعانى دا ماڭىزدى ەمەس. كىمنىڭ قىلقالامىنان شىقسا دا, جالعىز اقيقاتى – بۇل ناعىز شەبەرلىك.
ماسەلەن, سوناۋ ءبىر جىلدارى ونەرسۇيەر قاۋىم كادىمگى مايمىلدىڭ سالعان سۋرەتتەرىن فرانتسۋز سۋرەتشىسى پەر براسسونىڭ تۋىندىلارىمەن شاتاستىرعان. ءيا, بۇل كىم دەرسىز. اۆتوردى بۇرىن-سوڭدى ەستىمەۋىڭىز دە زاڭدى. سەبەبى ونداي سۋرەتشى ومىردە بولماعان.
بىردە شۆەدتىك جۋرناليست جالعان سۋرەتشى پەر براسسونىڭ تۋىندىلارىن مايمىلدىڭ سۋرەتتەرىمەن الماستىرۋدى ويلايدى. جوسپارى ىسكە اسىپ, كورمەسى دە ءساتتى وتەدى. كورمەدەگى كارتينالاردىڭ اۆتورى – پەر براسسو, ال شىنىمەن سالعان – مايمىل.
سونداعى ءجۋرناليستىڭ ماقساتى سىنشىلاردىڭ ءوزىن سىناۋ بولاتىن. كاسىبي ماماندارعا مايمىل سالعان سۋرەتتەردى «زاماناۋي تۋىندىلار» دەپ تانىستىرادى. سويتكەن جوسپارلى ويى دا ناتيجەسىز بولعان جوق. «پەر براسسونىڭ» تۋىندىلارىنان اسەرلەنگەنى سونشالىق, سىنشىلاردىڭ ءبىرى: «براسسو ۇشتالعان بوياۋ جاققىشتاردى پايدالانا وتىرىپ, ءاربىر سىزىقتى دالدىكپەن جۇرگىزەدى ەكەن. كوز الدىما بوياۋ جاققىشتىڭ ءارى-بەرى قوزعالعانىن ەلەستەتتىم. براسسونىڭ سۋرەتتەرى بالەت بيشىلەرىنىڭ بيىنەن اۋمايدى», دەپ باعا بەرەدى. ال كارتينالاردىڭ شىن اۆتورىن بىلگەن كەزدە سىنشىلار ۇيالىپ, دەگەنمەن ءبارىبىر تاڭعاجايىپ تۋىندى ەكەندىگىن ايتقان.
سول كورمەدە مايمىلدىڭ سالعان كارتيناسىن جەكەمەنشىك كوللەكتسيا جيناۋشىلاردىڭ ءبىرى 90 دوللارعا ساتىپ الادى. ەڭ ەرەكشە ەستەلىك دەگەن وسى ەمەس پە؟
سۋرەتشى سۋدا
سونىمەن, تالانت تەك ادامعا ءتان دەگەنىمىز قاتە بولعانى ما؟ ءتىپتى بۇل ءسوزىمىزدى عالىمدار دا راستايدى. ولاردىڭ ايتۋىنشا, پىلدەردىڭ دە بويىندا ەرەكشە دارىن بار. عالىمدار پايىمى دالەلسىز ەمەس.
تايلاند ەلىن مەكەندەيتىن سۋدا ەسىمدى سۋرەتشى ءپىلدىڭ ونەرىن كوزبەن كورىپ, كۋا بولعاندار بار. ابدەن شىنىعىپ, ناعىز شەبەرگە اينالعان ول كوپشىلىكتىڭ نازارىنا بىردەن ىلىككەن. سۋدانىڭ جانە باسقا دا پىلدەردىڭ سۋرەتىن تاماشالاۋ ءۇشىن جۇزدەگەن ادام سۋرەت سالۋ الاڭىنا كەلەدى ەكەن.
ال ەندى ادامنىڭ دا ءبارى ونەرلى ەمەس. ونەرسىز جاندار دا جەتەرلىك. دەسە دە سۋرەتشى سۋداعا قاراپ وتىرىپ, قولىمىزعا قىلقالام ۇستاي المايتىنىمىزعا ءسال-ءپال ۇيالادى ەكەنسىڭ.
تاعدىر ما, تالانت پا؟
شىعارماشىلىق, تالانت, ونەر – تاعدىر دەسەك, تىم قالىپتى ەستىلۋى مۇمكىن. ءتىپتى كەي دارىندار تاعدىرىن قولدان جاساپ جاتادى. بۇل دا تاپتاۋرىن كوزقاراسقا ەلىكتەۋدەن تۋىپ وتىر. شىنداپ ۇڭىلسەك, ناعىز تالانتتاردىڭ ءومىرىنىڭ استارىندا ءتۇرلى تاعدىر, ءتۇرلى تراگەديا كومىلىپ جاتادى. تالانتى مەن اتاق-ابىرويىنا قىزىققانمەن, تاعدىرىن تىلەمەيتىن قانشاما تۇلعالار بار. عۇمىرى اڭىزعا اينالعان جانداردىڭ قايشىلىقتى تاعدىرى سول كۇيى جۇمباق بولىپ قالادى. «نەگە بۇلاي بولدى؟» دەگەن ماڭگىلىك سۇراق سىندى. القيسسا.
بۇگىندە توقساننىڭ تورىنە شىققان يايوي كۋساما داۋلەتتى وتباسىندا دۇنيەگە كەلگەن. بالا كەزىنەن شيمايلاپ, سۋرەت سالۋعا ىنتىق بولادى. سويتسە دە وتباسى ونىڭ بۇل قىزىعۋشىلىعىن قولدامايدى. ونەرىن تاڭداعان يايوي كۋساما 30 جاسىندا ۇيىنەن ءبىرجولا كەتىپ, اقش-قا كوشەدى. سۋرەتشىنىڭ نيۋ-يوركتە باعى اشىلىپ, تانىمال بولا باستايدى. ەرەكشە ستيلىمەن كوزگە ءتۇسىپ, ءسان الەمىندە اتاعى ايعا ۇشادى.
بۇل دا ونىڭ تاعدىرى شىعار, 1977 جىلى جاپونياعا ورالىپ, پسيحياتريالىق ەمحاناعا جاتادى. سۋرەتشى ءتۇرلى گالليۋتسيناتسيالار كورىپ, جۇيكەسى دە ءجيى سىر بەرىپ ءجۇردى. سوندا دا ول سۋرەت سالۋدى توقتاتقان جوق. كۋساما ەمحانانىڭ جانىنان ءوزىنىڭ شەبەرحاناسىن اشىپ, كۇندە بىرنەشە ساعات سول جەرگە بارىپ جۇمىس ىستەدى.
تالانتى مەن تاعدىرى قاتار شاپقان سۋرەتشىنىڭ 2018 جىلى توكيودا مۇراجايى اشىلدى. سونداي-اق ول الەمدەگى ەڭ قىمبات سۋرەتشىلەردىڭ تىزىمىنە كىرەدى. كۋسامانىڭ ء«نومىر 28-اق» كارتيناسى ءباسساۋدادا 7,3 ملن دوللارعا ساتىلدى. بۇگىندە شەبەر قاريا «Louis Vuitton» ءسان ۇيىنە ارنالعان كوللەكتسيالار دايىندايدى.