تالعات عازيزوۆ: قازاقستاندا تۋريزم سالاسى تۇراقتى ءوسىم كورسەتىپ وتىر

ونىڭ ايتۋىنشا, وتكەن جىلى ەل ىشىندە قوناقۇيلەرگە ورنالاسقان تۋريستەر سانى 8,6 ميلليون ادامعا جەتكەن. سونىمەن قاتار, ەلىمىزدەگى ورنالاستىرۋ نىساندارىنىڭ سانى ارتىپ, تۋريستىك ينفراقۇرىلىم كەڭەيىپ كەلەدى.

سپيكەر الماتىنىڭ قازاقستانداعى نەگىزگى تۋريستىك جانە حالىقارالىق اۋە حابى رەتىندەگى ماڭىزىنا ەرەكشە توقتالدى. 2025 جىلدىڭ قورىتىندىسى بويىنشا قالاداعى قوناقۇيلەر مەن ورنالاستىرۋ ورىندارى شامامەن 2,5 ميلليون تۋريستكە قىزمەت كورسەتكەن. ونىڭ ىشىندە 1,7 ميلليون ادام – ىشكى تۋريستەر بولسا, 754 مىڭنان استامى – شەتەلدىك قوناقتار.

بۇگىندە الماتى حالىقارالىق نارىقتاعى پوزيتسياسىن نىعايتىپ كەلەدى. قالا ورتالىق ازياداعى اۋە قاتىناسى ەڭ دامىعان مەگاپوليس سانالادى ءارى Bloomberg پەن CNN نۇسقاسى بويىنشا الەمدەگى ۇزدىك 25 تۋريستىك باعىتتىڭ قاتارىنا ەنگەن.

كەيىنگى جىلدارى الماتىعا كەلەتىن تۋريستەردىڭ دەمالىس ۇزاقتىعى دا ارتقان. شەتەلدىك قوناقتاردىڭ شىعىنى 40 پايىزعا كوبەيىپ, تابيعي, تاۋ جانە مادەني تۋريزمگە قىزىعۋشىلىق جوعارىلاعان. تۋريستەردىڭ باسىم بولىگى قالاعا دەمالىس پەن بەلسەندى ساياحات ماقساتىندا كەلەدى.

جيىندا الماتى تاۋ كلاستەرىنىڭ قازاقستان تۋريزمىندەگى ستراتەگيالىق ماڭىزى ەرەكشە ايتىلدى. بۇگىندە كلاستەرگە جىل سايىن شامامەن 3 ميلليون تۋريست كەلەدى. ونىڭ ىشىندە 2,2 ميلليونى – وتاندىق, ال 764 مىڭى – شەتەلدىك تۋريستەر. كلاستەر اياسىندا كورسەتىلەتىن قىزمەت كولەمى 199 ميلليارد تەڭگەگە جەتكەن.

تاۋ كلاستەرىنىڭ نەگىزگى نىساندارىنىڭ ءبىرى – Shymbulak Mountain Resort. بىلتىر كۋرورتقا كەلۋشىلەر سانى 1,4 ميلليونعا جەتكەن. مامانداردىڭ ايتۋىنشا, حالىقارالىق تۋريستەردىڭ الماتىعا دەگەن قىزىعۋشىلىعىنىڭ 80 پايىزى تابيعاتپەن, تاۋمەن جانە بەلسەندى دەمالىسپەن بايلانىستى.

ايدا بالاەۆا: Almaty Superski تاۋداعى ءتۋريزمدى دامىتۋدىڭ ۇلگىسىنە اينالۋعا ءتيىس

سونداي-اق ساراپشىلار قىتاي مەن رەسەي نارىعىن تاۋ شاڭعىسى ءتۋريزمىن دامىتۋداعى نەگىزگى باعىتتاردىڭ ءبىرى رەتىندە اتاپ ءوتتى. قىتايدا 12,8 ميلليوننان استام شاڭعىشى بار بولسا, رەسەيدە بۇل كورسەتكىش 3,6 ميلليون ادامعا جەتەدى. وسى نارىقتىڭ از عانا بولىگىن تارتۋدىڭ ءوزى قازاقستانعا كەلەتىن تۋريستەر سانىن ايتارلىقتاي ارتتىرا الادى.

جوبا اياسىندا حالىقارالىق سپورتتىق جارىستار, مادەني فەستيۆالدەر, كونتسەرتتەر مەن ىسكەرلىك فورۋمدار وتكىزۋ مۇمكىندىگى دە قاراستىرىلىپ وتىر. بۇل الماتىنى ورتالىق ازياداعى تاۋ جانە ىسكەرلىك تۋريزم ورتالىعىنا اينالدىرۋعا جول اشپاق.

قوعامدىق تىڭداۋدا ورتالىق ازيا مەن كاۆكاز ەلدەرىندەگى باسەكەلەستىككە دە نازار اۋدارىلدى. قىرعىزستانداعى ء«ۇش شىڭ», وزبەكستانداعى Amirsoy, ازەربايجانداعى Shahdag جانە گرۋزياداعى Gudauri سەكىلدى ءىرى تاۋ كۋرورتتارى بۇگىندە قارقىندى دامىپ كەلەدى. وسىعان بايلانىستى الماتى تاۋ كلاستەرىن دامىتۋ قازاقستاننىڭ ايماقتاعى تۋريستىك كوشباسشىلىعىن ساقتاۋدا ماڭىزدى قادام رەتىندە باعالانىپ وتىر.

سپيكەردىڭ ايتۋىنشا, الەمدىك تاجىريبەدە تاۋ شاڭعىسى ينفراقۇرىلىمىنا سالىنعان ءاربىر دوللار قوسىمشا ينۆەستيتسيا تارتۋعا مۇمكىندىك بەرەدى ءارى مىڭداعان جاڭا جۇمىس ورنىن اشادى. تۋريستەردىڭ شىعىنى دا باسقا دەمالىس تۇرلەرىمەن سالىستىرعاندا الدەقايدا جوعارى.

مينيستر: Almaty Superski ناقتى ەرەجەلەرى بار قوعامدىق ينفراقۇرىلىم رەتىندە دامۋى ءتيىس

ايتا كەتەيىك, بىلتىر جەلتوقساندا ۇكىمەت الماتى تاۋ كلاستەرىن 2025-2029 جىلدارى دامىتۋعا ارنالعان كەشەندى جوسپاردى بەكىتتى. قۇجات 73 ءىس-شارانى قامتيدى. جوسپار اياسىندا كولىك جانە ينجەنەرلىك ينفراقۇرىلىمدى جاڭارتۋ, ينۆەستيتسيا تارتۋ, قاۋىپسىزدىك, تسيفرلاندىرۋ جانە تۋريستىك ايماقتاردى اباتتاندىرۋ كوزدەلگەن.

2029 جىلعا قاراي شەتەلدىك تۋريستەر سانىن 1,7 ميلليون ادامعا جەتكىزۋ, تۋريزم سالاسىنداعى جۇمىسپەن قامتۋدى 102 مىڭ ادامعا دەيىن ارتتىرۋ جانە 240 ميلليارد تەڭگە كولەمىندە جەكە ينۆەستيتسيا تارتۋ جوسپارلانىپ وتىر. سونىمەن قاتار, تاۋ كلاستەرىنىڭ وتكىزۋ قابىلەتى تاۋلىگىنە 24 مىڭ ادامعا دەيىن ۇلعايىپ, تاۋ شاڭعىسى تراسسالارى مەن اسپالى جولدار سانى كوبەيمەك.

ەسكە سالايىق, بۇعان دەيىن قوعامدىق تىڭداۋلار باستالعانىن حابارلاعانبىز.