ەلىمىزدە مەملەكەت باسشىسى قاسىم-جومارت توقاەۆتىڭ باستاماسىمەن «تازا قازاقستان» ەكولوگيالىق اكتسياسى ءوتىپ جاتقانى بەلگىلى. جۇرت بولىپ جۇمىلا اتقارعان ءىس-شارا وسى كۇنى شىن مانىندە ەلدىك سيپات الىپ ۇلگەردى.
رەسپۋبليكالىق «تازا قازاقستان» اكتسياسى باستالعالى وعان 1 ملن-نان اسا ادام قاتىسىپ, 5 مىڭنان استام شارا ۇيىمداستىرىلىپتى. اكتسيانىڭ اتى ايتىپ تۇرعانداي, ونىڭ ماقساتى – ازاماتتاردى ءوز قالاسى مەن اۋىلىن, اۋلاسىن تازا ۇستاپ, كوشەت وتىرعىزۋعا ۇندەۋ.
«شىن مانىندە, ەلىمىزدى كوگالداندىرۋ, اباتتاندىرۋ – ۇلكەن مەملەكەتتىك ماڭىزى بار ءىس. بۇل بۇگىن شىعىپ, ەرتەڭ ۇمىتىپ كەتەتىن بىررەتتىك ناۋقان ەمەس. اتالعان جۇمىس تۇراقتى تۇردە جۇرگىزىلەدى. تۋعان جەرىمىزدى تازا ۇستاۋىمىز كەرەك. بۇل – جالپىۇلتتىق ماسەلە», دەگەن ەدى پرەزيدەنت.
راسىندا, تۇرمىستىق قالدىقتار مەن كۇل-قوقىس تۇمسا تابيعاتتى تۇنشىقتىرىپ بارادى. بۇعان زاۋىت-فابريكالاردان شىعاتىن ۋلى حيميالىق قالدىق سۋلاردى قوسىڭىز. بۇرىش-بۇرىشقا, قۋىس-قۋىسقا كوزىڭىز تۇسسە, جەلمەن جەلپىلدەگەن تسەللوفاندار مەن قاۋدىرلاي ۇشقان پلاستماسس قۇتىلار قۇتىڭىزدى قاشىرادى. شىنى كەرەك, شىلىم تۇقىلىنىڭ دا شاشىلىپ جاتپايتىن جەرى جوق. اسپاننان بۇرشاق جاۋعانداي الا جاڭقا بولىپ جاتقانىن كورەمىز. وعان دا كوبىمىز قوسقان ۇلەسىمىزدىڭ بارى راس. قالامىز دا, دالامىز دا قوقىسقا كەندە ەمەس. قوقىستى قايتا وڭدەپ, كادەگە جاراتۋدى قولعا العانىمىزعا ءبىراز جىلدىڭ ءجۇزى بولدى. بۇل دا جەتكىلىكسىزدەۋ تۇسكەنى راس. وسى رەتتە «تازا قازاقستان» ەكولوگيالىق اكتسياسى دەر شاعىندا قولعا الىنعان باستاما ەكەنىن ايتا كەتكەن ءجون.
راسىندا بۇل بىررەتتىك ناۋقان ەمەس, مۇنى – حالىقتىڭ ەكولوگيالىق مادەني ساناسىن قالىپتاستىراتىن ۇلتتىق يدەيا دەپ تۇسىنۋگە بولادى. بۇعان پرەزيدەنتتىڭ ءوزى زور ماڭىز بەرىپ وتىرۋى دا وسىدان بولسا كەرەك. ويتكەنى سانا تازارماي, قالا دا, دالا دا تازارماسى انىق.