بۋداپەشتتە كۇرەس تۇرلەرىنەن ماجارستاننىڭ ماقتان تۇتار پەرزەنتتەرى – يمرە مەن ۆارگا يانوشتى ەسكە تۇسىرۋگە ارنالعان حالىقارالىق ءتۋرنيردىڭ العاشقى كۇنى قازاقستان قۇراماسىنىڭ قورجىنىنا ءۇش جۇلدە ءتۇستى.
جارىستى ەركىن كۇرەس شەبەرلەرى باستادى. جانكۇيەرلەر 97 كگ سالماق دارەجەسىندەگى باسەكەلەردى تاعاتسىزدانا كۇتتى. سەبەبى بۇل سالماقتا قازاقتىڭ ەكى بىردەي تانىمال بالۋاندارى باق سىنادى. ءبىرىنشىسى – ازيا چەمپيوناتىنىڭ ءتورت دۇركىن جۇلدەگەرى ەرعالي الىشەر, ەكىنشىسى – ەل تاريحىنداعى تۇڭعىش الەم چەمپيونى ريزابەك ايتمۇحان. ەكەۋى بيىل قازاقستان چەمپيوناتىنىڭ فينالىندا كۇرەسىپ, بۇل ايقاستا العاشقىسى جەڭىسكە جەتتى. سونىمەن قاتار, الىشەر بىشكەكتە وتكەن قۇرلىق بىرىنشىلىگىندە وليمپيا ويىندارىنىڭ ليتسەنزياسىنا يەلىك ەتتى. ماجارستانداعى تۋرنير وسى قوس ساڭلاقتىڭ قايسىسى مىقتى ەكەنىن انىقتاۋشى ەدى. بىراق بۇل جولى الاشتىڭ قوس ءاپايتوسىنىڭ جولدارى قيىسپادى. ريزابەك جارتىلاي فينالدا ازەربايجاننىڭ تۋى استىندا ونەر كورسەتىپ جۇرگەن الەم چەمپيوناتىنىڭ ەكى دۇركىن جۇلدەگەرى, ەۋروپا چەمپيونى, داعىستاندىق ماگومەدحان ماگومەدوۆتەن 7:15 ەسەبىمەن جەڭىلدى. الىشەر بولسا, يراندىق ابدولفازل بابالوودان باسىم ءتۇستى – 3:2.
فينالدا ماگومەدوۆ بوزكىلەمگە شىعۋدان باس تارتىپ, باس جۇلدەنى الىشەر ەرعالي ولجالادى. ال ريزابەك ايتمۇحان ءۇشىنشى ورىن ءۇشىن بەلدەسۋدە الەم چەمپيوناتىنىڭ كۇمىس جانە الەم كۋبوگى مەن ەۋروپا بىرىنشىلىگىنىڭ قولا جۇلدەگەرى, سلوۆاكيالىق باتىربەك تساكۋلوۆتى جولىنان ىعىستىرىپ, قولا مەدالدى ەنشىلەدى – 3:2.
اسا اۋىر سالماقتاعى يۋسۋپ باتىرمۇرزاەۆ افريكانىڭ ءتورت دۇركىن چەمپيونى, مىسىرلىق كامال ابدەلموتالەبا (6:1) مەن ريو وليمپياداسىنىڭ قولا جانە توكيو وليمپياداسىنىڭ كۇمىس جۇلدەگەرى, ءۇش دۇركىن الەم, ەكى دۇركىن ەۋروپا چەمپيونى, ەكى دۇركىن الەم كۋبوگىنىڭ جەڭىمپازى, گرۋزيالىق گەنو پەترياشۆيليدەن (4:2) ايلاسىن اسىردى. بىراق فينالدا ول مەيسون مارك پەرريستەن ۇتىلىپ, كۇمىس مەدالدى قاناعات تۇتتى.
كەشە 86 كگ سالماقتاعى ازامات داۋلەتبەكوۆ بوزكىلەمگە شىقتى. تۇساۋكەسەر كەزدەسۋىندە ول وليمپيادا مەن الەم چەمپيوناتىنىڭ, ەۋروپا ويىندارىنىڭ قولا جۇلدەگەرى, قۇرلىق چەمپيونى, البانيالىق مايلز امينمەن ايقاستى. الداعى كۇندەرى ءبىز ايەلدەر كۇرەسىنەن ەمما تيسينا مەن مارينا سەدنەۆا (55 كگ), ديانا كايۋموۆا مەن يرينا كۋزنەتسوۆا (59 كگ), يرينا كازيۋلينا (65 كگ), ءجاميلا باقبەرگەنوۆا مەن گۇلمارال ەركەباەۆانىڭ (72 كگ) جانە گرەك-ريم كۇرەسىنەن ايدوس سۇلتانعالي (60 كگ), دەمەۋ جادىراەۆ (77 كگ), نۇرسۇلتان تۇرسىنوۆ پەن ءشامىل وجاەۆ (86 كگ), ءالىمحان سىزدىقوۆ (130 كگ) سىندى ساڭلاقتاردىڭ ونەرىن تاماشالايمىز.