قازاقتىڭ بەلگىلى ساياساتكەرى بەكسۇلتان تۇتقىشەۆ قايتىس بولدى

قايعىلى حاباردى سياساتكەردىڭ بالالارى جاريالادى.

«قىمباتتى تۋىستار, دوستار, ارىپتەستەر! بۇگىن تاڭعى ساعات 4-تە اكەمىز بەكسۇلتان سەرىكباي ۇلى تۇتقىشەۆ ارامىزدان كەتىپ, ماڭگىلىك تىنىشتىق تاپتى. جەرلەۋ ءراسىمى 9 ماۋسىم كۇنى ساعات 10-دا استانا قالاسىنىڭ ورتالىق مەشىتىندە وتەدى», دەلىنگەن حابارلامادا.

بەكسۇلتان سەرىكباي ۇلى تۇتقىشەۆ 1948 جىلى 19 تامىزدا قوستاناي قالاسىندا دۇنيەگە كەلگەن. قاراعاندى مەملەكەتتىك مەديتسينا ينستيتۋتىن تامامداعان, دارىگەر.

1974 جىلى - قوستاناي قالالىق اۋرۋحاناسى, دارىگەر-تراۆماتولوگ. 1974-1993 جىلدارى - ۆ.ي.لەنين اتىنداعى قوستاناي وبلىستىق اۋرۋحاناسى, كەۋدە حيرۋرگياسى ءبولىمىنىڭ حيرۋرگى. 1993-1994 جىلدارى - «مەدستراح-گرانيت» مەديتسينالىق ساقتاندىرۋ كومپانياسى, ديرەكتور. 1994-1995 جىلدارى - قوستاناي وبلىستىق اۋرۋحاناسى, باس دارىگەردىڭ ورىنباسارى. 1989-1993 جىلدارى - قوستاناي قالالىق حالىق دەپۋتاتتارى كەڭەسى, دەپۋتات, وتباسى ىستەرى, جاستار, ازاماتتاردىڭ دەنساۋلىعىن قورعاۋ جونىندەگى تۇراقتى كوميتەتتىڭ توراعاسى. 1995, 1997, 2002 جىلدارى - قازاقستان رەسپۋبليكاسى پارلامەنتى سەناتىنا قوستاناي وبلىسىنان دەپۋتات بولىپ سايلاندى. 1998 - 2008 جىلدارى - تمد ەلدەرى پارلامەنتارالىق اسسامبەلياسىنىڭ مۇشەسى. 2002-2005 جىلدارى - تۇرعىلىقتى حالىق جانە دامۋ جونىندەگى ازيا فورۋمى توراعاسىنىڭ ورىنباسارى. 2005-2008 جىلدارى - تۇرعىلىقتى حالىق جانە دامۋ جونىندەگى ازيا فورۋمى باس حاتشىسىنىڭ ورىنباسارى. 2008 جىلدىڭ جەلتوقسانىنان - «ۇلتتىق مەديتسينالىق حولدينگ» اق, باسقارما توراعاسىنىڭ ورىنباسارى. 2011 جىلدان باستاپ «نازارباەۆ ۋنيۆەرسيتەتى» دەپارتامەنتىنىڭ باس مەنەدجەرى.

مەديتسينا عىلىمدارىنىڭ كانديداتى, مونوگرافيا, 40 استام عىلىمي ماقالانىڭ اۆتورى. «قۇرمەت», «سودرۋجەستۆا» وردەندەرىمەن, قر پرەزيدەنتى ن. نازارباەۆتىڭ العىسحاتىمەن, بۇۇ بالالار ۇيىمى - يۋنيسەف ەسكەرتكىش مەدالىمەن جانە باسقا دا مەدالدارمەن ماراپاتتالعان. 

قىرمىزى جۇماعاليقىزى,

ەۇۋ ستۋدەنتى