قوستانايدا «تازا قازاقستان» ەكولوگيالىق اكتسياسى اياسىندا جارىس تۇرىندەگى ەرەكشە سەنبىلىك ءوتتى. «تازالىق ويىندارى» دەپ اتالعان يگى ىسكە قاتىسۋشىلار «زولوتوي فازان» دەمالىس كەشەنىنىڭ ماڭىنداعى ورمان القابىن قوقىستان تازارتتى.
قوستانايعا جاقىن, ءبىر جاعى وزەنگە, ەكىنشى جاعى ورمانعا ءتيىپ تۇرعان بۇل دەمالىس كەشەنىنىڭ ماڭى جازدىڭ ىستىق كۇندەرى ادامعا تولىپ كەتەدى. وكىنىشكە قاراي, تۇمسا تابيعات اياسىندا دەمالعان جۇرتتىڭ ءبىرازى ارتىنا ىشكەن-جەگەن قالدىعىن قالدىرىپ, بوساعان قۇتىسىن بەيبەرەكەت لاقتىرىپ تاستاپ كەتىپ جاتادى.
ءىس-شاراعا مۇرىندىق بولعان «Neco» ەكولوگيالىق كلۋبى» قوعامدىق قورىنىڭ باسشىسى ناۋرىزبەك بىرماعانبەتوۆتىڭ ايتۋىنشا, سەنبىلىكتىڭ ماقساتى – پرەزيدەنت باستاماسىمەن بۇكىل رەسپۋبليكا كولەمىندە ءجۇرىپ جاتقان ەكولوگيالىق اكتسياعا ۇلەس قوسۋ, كوپشىلىكتى تابيعات اياسىندا دۇرىس دەمالا بىلۋگە, ەكولوگيالىق مادەنيەتكە ۇندەۋ.
«مەملەكەت باسشىسى قاسىم-جومارت توقاەۆتىڭ «شىن مانىندە ەلىمىزدى كوگالداندىرۋ, اباتتاندىرۋ, ۇلكەن مەملەكەتتىك ماڭىزى بار ءىس. بۇل بۇگىن شىعىپ, ەرتەڭ ۇمىتىپ كەتەتىن ءبىر كۇندىك ناۋقان ەمەس. اتالعان جۇمىس تۇراقتى تۇردە جۇرگىزىلەدى. تۋعان جەرىمىزدى تازا ۇستاۋىمىز كەرەك. بۇل – جالپىۇلتتىق ماسەلە» دەگەن ءسوزى بار. ءبىز پرەزيدەنتتىڭ وسى ءسوزىن تولىق قولدايمىز جانە ونى ءاربىر تۇرعىننىڭ قۇلاعىنا جەتكىزىپ, كوكەيىنە ۇيالاتۋ باعىتىندا ەڭبەكتەنە بەرەمىز. ول ءۇشىن بۇگىنگىدەي قىزىقتى سەنبىلىكتەردى ءجيى ۇيىمداستىرىپ, حالىقتىڭ تازالىققا دەگەن ىنتاسىن وياتىپ وتىرۋ كەرەك. ماسەلەن, وسى سەنبىلىككە قاتىسىپ جاتقان تۇرعىندار بىرىنشىدەن, ورمان القابىن قوقىستان تازارتىپ, تابيعاتقا پايدا اكەلەدى, ەكىنشىدەن وسى جەردە بىرەر ساعات جۇمىس ىستەپ, جارىسىپ, كوڭىل كوتەرىپ, ادەمى سىيلىق ۇتىپ الادى. بۇل ورمان القابىندا تۇرعىندار تاستاعان قالدىقتاردان باسقا, كوكتەمدە تاسقىن سۋ اكەپ تاستاعان قوقىس كوپ. سوندىقتان ءىس-شارانى وسى جەردە ۇيىمداستىرىپ وتىرمىز», دەيدى ناۋرىزبەك بىرماعانبەتوۆ.
جارىستىڭ شارتى وتە قاراپايىم: سەنبىلىككە قاتىسۋشىلارعا ءبىر جارىم ساعاتتىڭ ىشىندە نەعۇرلىم كوپ قوقىس جيناپ, ونى سۇرىپتاپ ۇلگەرۋلەرى كەرەك دەگەن تالاپ قويىلدى. جەڭىمپازدار ۇپاي سانى ارقىلى انىقتالدى. ماسەلەن, 1 كگ پلاستيك قۇتىنىڭ قۇنى – 15 ۇپاي. 1 كيلو شىنى جيناعان كومانداعا 5 ۇپاي, 1 كگ قاڭىلتىرعا 10 ۇپاي, وڭدەلمەگەن قالدىققا 3 ۇپاي بەرىلدى.
جارىس ناتيجەسىندە ەڭ كوپ ۇپاي جيناعان «جاس ەكولوگتەر» توبى ءبىرىنشى ورىن الدى. ەكولوگيالىق كلۋب وكىلدەرىنىڭ ايتۋىنا قاراعاندا, «تازا ويىندار» جارىسى جاز بويى ءوتىپ تۇراتىن بولادى.
قوستاناي وبلىسى