تاڭعاجايىپ تاس ءمۇسىن وبلىستىق تاريحي-ولكەتانۋ مۇراجايىنا 1986 جىلى تاپسىرىلعان. مۋزەي ماماندارى مۇنى توبىل ويشىلى نەمەسە انتروپومورفتى تاس ءمۇسىن دەپ اتايدى.
ەكى قولىن قۋسىرىپ سوناۋ كوكجيەككە كوز تىككەن قالپى بۇكىرەيىپ وتىرعان جۇمباق ءمۇسىن قوستاناي قالاسىنىڭ ىرگەسىندەگى قازىرگى امانگەلدى ەلدى مەكەنىنىڭ ماڭىنان تابىلعان. ءمۇسىن اقشىل سارى ءتۇستى ءىرى تۇيىرشىكتى قۇمتاستان قاشالعان.
ءمۇسىننىڭ بيىكتىگى – 19-اق سانتيمەتر. عالىمداردىڭ بولجامىنشا, قولونەر تۋىندىسى ەنەوليت داۋىرىندە جاسالعان. بۇل – شامامەن ءبىزدىڭ زامانىمىزعا دەيىنگى ءۇشىنشى مىڭجىلدىقتىڭ سوڭى, ەكىنشى مىڭجىلدىقتىڭ باس كەزى.
«بەتىنە ءبىر سىزات تۇسپەگەن. جاعى جايلاپ كەۋدەنىڭ جوعارى تۇسىنا ۇلاسادى. تەك يەگى عانا العا شىعىپ تۇر. اۋزى ويىق سىزىقپەن كورسەتىلگەن. دەنەسىنىڭ الدىڭعى بولىگى وڭدەلمەگەن, ەشقانداي ويىعى جوق. جۇمىر كەلگەن ارقاسى ەپتەپ وڭدەلگەن. قازىر بۇل انتروپومورفتى ءمۇسىن توبىل ويشىلى دەپ اتالىپ ءجۇر. قالاي بولعاندا دا, توبىل وزەنىنىڭ جاعاسىنان تابىلعان تاس جادىگەرگە ءتىل بىتسە, كونە وركەنيەتتىڭ تالاي جۇمباعىن سىر عىپ اقتاراتىنى انىق», دەيدى مۋزەي ماماندارى.
قوستاناي وبلىسى