بالالاردى قورعاۋ كۇنى تەك ءبىر كۇندىك ەمەس, جاز بويعى مەرەكە. قر ءىىم ۇلتتىق ۇلانى اۆيابازاسىنىڭ اسكەري قىزمەتشىلەرى بۇعان ءوز بالالارىن سەندىردى, دەپ جازادى Egemen.kz ۇلتتىق ۇلاننىڭ ءباسپاسوز قىزمەتىنە سىلتەمە جاساپ.
3656 اسكەري ءبولىمىنىڭ كومانديرى پولكوۆنيك دميتري باستەردىڭ باستاماسىمەن استانا گارنيزونىنىڭ اسكەري قىزمەتشىلەرىنىڭ بالالارى ءۇشىن حالىقارالىق بالالاردى قورعاۋ كۇنىنە ارنالعان مەرەكە ۇيىمداستىرىلدى. ءىس - شاراعا ىشكى ىستەر ءمينيسترىنىڭ ورىنباسارى — ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆ, ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور قايرات ۇمبەتوۆ, قازاقستان رەسپۋبليكاسى ۇلتتىق ۇلانى باس قولباسشىلىعىنىڭ, سونداي-اق ەلوردالىق بريگادانىڭ اسكەري قىزمەتشىلەرى مەن ولاردىڭ وتباسى مۇشەلەرى قاتىستى.
اۆياتسيالىق بازادا اسكەري قىزمەتشىلەردىڭ بالالارى ءۇشىن ەرتەگى كەيىپكەرلەرىنىڭ قويىلىمدارى, ءتۇرلى ويىندار, كونتسەرتتىك باعدارلاما, سپورتتىق جارىستار مەن فلەشموب دايىندالدى. ال ەڭ كىشكەنتاي قوناقتار ءۇشىن ۇلاندىقتار ارنايى قاۋىپسىز الاڭ ازىرلەدى, وندا بالالار اسفالتقا بورمەن سۋرەتتەر سالدى. سونداي-اق, مەرەكە يەلەرىنە جارىستارعا بەلسەندى قاتىسقانى جانە سايىستاعى جەڭىستەرى ءۇشىن سىيلىقتار مەن گراموتالار تابىستالدى.
«بۇگىن ءبىز ەڭ جارقىن جانە قۋانىشتى مەرەكەلەردىڭ ءبىرى — بالالاردى قورعاۋ كۇنىن اتاپ وتۋدەمىز. بۇل كۇن بالالاردىڭ بولاشاعىمىز ءۇشىن قانشالىقتى ماڭىزدى ەكەنىن, ءۇمىت پەن ارماندارىمىزدىڭ ولارعا تىكەلەي بايلانىستى ەكەنىن ەسكە سالادى. بالالارعا قامقورلىق جاساۋ - ءبىزدىڭ ەڭ ۇلكەن قۇندىلىعىمىز. بالالار - ەلىمىزدىڭ بولاشاعى. ارقايسىسى وزىنشە تالانتتى. ولاردىڭ ءاربىرىن ماقتان تۇتامىز!», دەدى ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆ.
وفيتسەرلەر مەن سەرجانتتار بارلىق نازارىن بالالارعا ارنادى. مەرەكە كۇنى قۇقىقتىق ءتارتىپ اسكەرىنىڭ اۋە بازاسى بالالار اندەرىنە, كوڭىلدى مۋزىكاعا, بي مەن ءتاتتى كۇلكىگە تولى بولدى. تاماشا كوڭىل-كۇي مەن مۇقيات ويلاستىرىلعان مەرەكەلىك باعدارلاما جازدىڭ باستالۋىن اتاپ وتكەن بالالار مەرەكەسىنە ءسان بەردى.
«مۇنداي ءىس-شارالار وتە ماڭىزدى. سەبەبى, مۇنداي ساتتەر مىندەتتى تۇردە بالالاردىڭ ەستەرىندە ساقتالادى جانە ولار وسكەندە وسى مەرەكەنىڭ ماڭىزىنا ءمان بەرۋگە, كەلەسى ۇرپاققا قامقورلىق تانىتۋعا تىرىسادى. وفيتسەر مەن كوماندير قىزمەتتە قانشالىقتى قاتال بولسا دا, ۇيدە بالانىڭ ك ۇلىمسىرەۋىنەن ەلجىرەپ, جۇرەگى سۇيىسپەنشىلىككە تولاتىن مەيىرىمدى اكە. بالالار اتا-انالارىنىڭ وسى مەرەكەنى وزدەرىمەن بىرگە ويناپ, بيلەپ, بولىسكەنىنە ءدان ريزا», دەدى گەنەرال-مايور قايرات ۇمبەتوۆ.
قر ۇلتتىق ۇلانىنىڭ ءان-بي ءانسامبلى جينالعان كوپشىلىكتى كونتسەرتتىك باعدارلامامەن قۋانتتى.
ءىس-شارا سوڭىندا بالالارعا بالمۇزداق پەن ءتۇرلى ءدامدى تاعامدار تاراتىلدى.