ەڭبەك ادامىنا ارنالعان باسپانا باعدارلاماسى

رۋدنىيداعى «گورنياك» كەشە­نىن­دە وتكەن فورۋمعا «وتباسى بانك» باسقارما ءتورايىمىنىڭ ورىنباسارى نۇرلان اقشانوۆ, قالا اكىمى ۆيكتور يونەنكو, «سسكوب» اق الەۋمەتتىك جوبالار جانە الەۋمەتتىك قامتاماسىز ەتۋ ءبولىمىنىڭ باسشىسى الەكساندر ماكا­رەنكو, كەن بايىتۋ كومبي­نا­تىنىڭ جۇمىسشىلارى, بانك قىزمەتكەرلەرى, رۋدنىيدا ءۇي تۇرعىزىپ جاتقان قۇرىلىس كوم­پانيا­لارىنىڭ باسشىلارى قا­تىستى.

قالا اكىمى كوپشىلىكتى رۋد­نىي­دا حالىقتى باسپانامەن قامتۋ ماسەلەسىنىڭ قالاي جۇزەگە اسىرىلىپ جاتقانىنان حاباردار ەتتى.

«بۇگىنگى تاڭدا ءبىز ەسكى تۇرعىن ۇيلەردى قالپىنا كەلتىرۋگە باسا كوڭىل ءبولىپ وتىرمىز. بىلتىر لەنين كوشەسىندەگى 107, 215-ءشى, گوركي كوشەسىندەگى 104-ءشى تۇرعىن ءۇيدى قايتا جوندەۋدەن وتكىزىپ, ەل يگىلىگىنە تاپسىردىق. ماۋسىم ايىندا وكتيابردىڭ 50 جىلدىعى كوشەسىندەگى 30 جىل بويى قاراۋسىز تۇرعان 47-ءشى تۇر­عىن ءۇي پايدالانۋعا بەرىلەدى. قازىر توپوركوۆ كوشەسىندەگى 162-ءشى ۇيگە جوندەۋ جۇرگىزىلىپ جاتىر. ساۋلەتتى تۇرعىن ۇيلەر كوپ بولعان سايىن قالانىڭ اجارى اشىلىپ, ءسانى كىرە تۇسەدى. سوندىقتان ءبىز ەڭ ءبىرىنشى كەزەكتە, ەسكى ۇيلەردىڭ ءبارىن جاڭارتىپ, قالانىڭ سىرتقى كەلبەتىنە كورىك بەرۋدى كوزدەپ وتىرمىز. ەسكى ۇيلەردى قالپىنا كەلتىرۋگە وبلىس بيۋدجەتىنەن 2 ملرد 400 ملن تەڭگە ءبولىندى. الداعى ۋاقىتتا رەسپۋبليكا بيۋد­جە­تىنەن تاعى 7 ملرد 400 ملن تەڭگە قارجى بولىنەدى. مۇنىڭ سىرتىندا, رۋدنىيدا «ايات» تۇر­عىن ءۇي كەشەنىنىڭ قۇرىلىسى باس­تالدى. بۇل ۇيلەردىڭ ءبىرازى «وتباسى بانك» ۇسىنىپ وتىرعان ءتيىمدى باعدارلامالار ارقىلى حا­لىققا قولجەتىمدى بولاتىنىنا سەنىم­دى­مىز», دەدى ۆ.يونەنكو.

«وتباسى بانك» «ERG» كومپانياسىمەن كوپ جىلدان بەرى ىنتىماقتاستىقتا جۇمىس ىستەپ كەلەدى. فورۋم بارىسىندا بانك ماماندارى «سوكولوۆ-سارىباي كەن بايىتۋ بىرلەستىگىنىڭ» جۇمىس­شى­لارىنا «وتباسى بانك» ۇسى­نىپ وتىرعان يپوتەكالىق مۇم­كىن­دىكتەر جونىندە جان-جاقتى اڭگىمەلەپ بەردى. اتالعان بانك قوستاراپتى كورپوراتيۆتىك جوبا اياسىندا «ERG» كومپانياسىنىڭ پاۆلودار, ەكىباستۇز, اقسۋ, حروم­تاۋ, رۋدنىي قالالارىنداعى كا­سىپ­ورىندارىمەن تىعىز بايلانىستا جۇمىس جۇرگىزىپ كەلەدى. بۇل ارىپتەستىكتىڭ ەكى جولى بار. ءبىرىنشىسى – «ERG» كاسىرورىندارى ءۇي سالىپ, ونى ءوز جۇمىسشىلارىنا جالعا بەرەدى. مۇنداي ۇيلەرگە قونىستانعان ادام بىردەن دەپوزيت اشىپ, پاتەردىڭ جارتى قۇنىن جيناعان سوڭ, ءارى قاراي بانكتەن 5%-بەن نەسيە الىپ (جتسم 5,2%-دان باستاپ 5,3%-عا دەيىن), ءوزى جالعا العان باسپانانى ءبىرجولا ساتىپ الا الادى. سونىمەن قاتار كاسىپورىن جۇمىسشىلارى ءوز قالاۋى بويىنشا 5%-دىق نەسيەمەن ءۇي ساتىپ الۋعا قۇقىلى. «ERG» كومپانياسى سالىپ جاتقان تۇرعىن ۇيلەر, وكىنىشكە قاراي, بارىنە بىردەي جەتە بەرمەيدى, سوندىقتان فورۋمعا ارنايى كەلگەن «وتباسى بانك» باسقارما ءتورايىمىنىڭ ورىنباسارى نۇرلان اقشانوۆ جۇمىس­شىلاردى «وتاۋ», «ناۋ­رىز» باعدارلامالارىنا قاتى­سىپ كورۋگە شاقىردى.

ء«بىز بيىل باسپاناسىز ازا­مات­تارعا ارنالعان «وتاۋ», ناۋرىز» دەپ اتالاتىن ەكى بىردەي باع­دارلامانى ىسكە قوستىق. بۇل باع­دار­لاماعا قاتىساتىن ازامات­تار­دىڭ باسىندا سوڭعى 5 جىل ىشىندە تىركەلگەن باسپانا بولماۋى كەرەك. جىلدىق سىياقى مولشەرلەمەسى – 9% (جتسم 9,2%-دان باستاپ 11,8%-عا دەيىن). ول جىلدان-جىلعا كەمي بەرەدى. باستاپقى جارنا – 20%. ءبىز «وتاۋ» باعدارلاماسىنا ءوتىنىش قابىلداۋدى توقتاتتىق. اتالعان باعدارلاما اياسىندا كونكۋرستان وتكەن 8 مىڭ ادام قازىر قارىزدى وتەي الۋ قابىلەتى بويىنشا تەكسەرىستەن ءوتىپ جاتىر. مىسالى, قوستانايدا بۇل تەكسەرىستەن 80 ادام ويداعىداي ءوتتى. «وتاۋ» باعدارلاماسى بويىنشا استانا, قوستاناي, الماتى سياقتى ءىرى قالالاردان جاڭا پاتەر ساتىپ الۋعا بولادى. ال رۋدنىي ءتارىزدى وبلىستىق ماڭىزى بار شاعىن قالالاردان پاتەردى قولدان ساتىپ الۋعا دا بولادى. جاڭا پاتەرلەردىڭ ءبارى ءبىزدىڭ «Baspana Market» پورتالىندا تۇر. بۇل باعدارلاماعا قاتىسۋ ءۇشىن كليەنتتىڭ شوتىندا 1 ملن تەڭگە بولۋ كەرەك, دەپوزيت مەرزىمى 18 ايدان كەم بولماۋعا ءتيىس. وكىنىشكە قاراي, بۇل باعدارلاماعا قاتىسقىسى كەلگەندەر كوپ بولعانىمەن, ولاردىڭ دەپوزيتىنىڭ مەرزىمى 18 ايعا تولماي قالىپ جاتتى. اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى قاسىم-جومارت توقاەۆ «وتاۋ» يپوتەكالىق باعدارلاماسىنىڭ ەل ىشىندە ۇلكەن سۇرانىسقا يە بولىپ وتىرعانىن ايتا كەلىپ, ەندى اۋىل جانە اۋدان ورتالىعىنىڭ تۇرعىندارىنا ارنالعان جاڭا تۇرعىن ءۇي باعدارلاماسىن قول­عا الۋ كەرەك» دەگەن تاپسىرما بەرگەن ەدى. سوندىقتان ءبىز جاڭا باعدارلامانى ىسكە قوستىق. ۇلت­تىق قۇرىلتاي ناۋرىز ايىندا وتكەندىكتەن, جاڭا باعدارلاما دا «ناۋرىز» دەپ اتالادى. بۇل باعدارلاما بويىنشا تۇرمىسى تومەن وتباسىلاردىڭ باسپانالى بولۋىنا جاقسى مۇمكىندىكتەر قاراستىرىلعان», دەدى نۇرلان اقشانوۆ.

فورۋم بارىسىندا بانكتىڭ يپو­تەكالىق باعدارلامالارى ار­قى­لى باسپانالى بولعان قارا­پايىم تۇرعىندار, ەڭبەك ادام­دارى كوپشىلىك الدىنا شىعىپ, وزدەرىنىڭ پاتەرگە قالاي قولجەت­كىز­گەنى تۋرالى اڭگىمە ەتتى. مىسالى, وڭىردە ەكى جىلدان بەرى قوستاناي وبلىسى اكىمدىگى مەن «وتباسى بانكتىڭ» «قوستاناي جاستارى» دەپ اتالاتىن بىرلەسكەن جوباسى ناتيجەلى جۇمىس ىستەپ جاتىر. اتالعان باعدارلاما اياسىندا «وتباسى بانك» مۇعالىم, دارىگەر ما­ماندار مەن پوشتا, پوليتسيا, توتەنشە جاعداي قىزمەتكەرلەرىنىڭ باسپانالى بولۋى ءۇشىن جىل سا­­­يىن جەڭىلدەتىلگەن نەسيەگە 2 ملرد تەڭگە قارجى ءبولىپ وتىر. بۇگىندە باسپانالى بولىپ, باعدارلاما جەمىسىن كورىپ وتىرعانداردىڭ ىشىندە پوليتسيا قىزمەتكەرى قايرات راحمەتوۆ تە بار.

«باسپانا الۋ – ءاربىر جاس وتباسىنىڭ ەڭ ءبىرىنشى ارمانى. 2020 جىلى ىشكى ىستەر ورگاندارىنا جۇمىسقا كىرگەن سوڭ, بىردەن «وتباسى بانكىنەن» دەپوزيت اشتىم. ەكى جارىم جىلداي پاتەر جالداپ تۇردىق. 2023 جىلى «قوستاناي جاستارى» باعدارلاماسى ارقىلى كونكۋرس­تان ءوتىپ, باسپانالى بولدىق. دەپوزيتىمدە بار-جوعى 1,5 ملن تەڭگە جاتقان. سوعان قاراماستان قىسقا مەرزىم ىشىندە ءوز پاتەرىمىزگە كىرگەندە, قۋانىشىمىزدا شەك بولعان جوق. جۇبايىم ەكەۋمىز العاشقى كۇنى بۇل ءۇيدىڭ ەندى بىزدىكى ەكەنىنە سەنەر-سەنبەسىمىزدى بىلمەي ابدىراپ قالعانىمىز راس. بۇعان دەيىن 70 مىڭ تەڭگەگە پاتەر جالداپ كەلگەنبىز. ال جاڭا پاتەرىمىزگە 13 جىلعا ايىنا 88 مىڭ تەڭگەدەن تولەپ تۇرامىز. جالعا 70 مىڭ تولەگەننەن گورى, ءوز پاتەرىڭە 88 مىڭ نەسيە تولەگەن الدەقايدا جاقسى. «قوستاناي جاس­تارى» سياقتى ءتيىمدى جوبالاردىڭ جاس وتباسىلار ءۇشىن پايداسى زور. وسى ءساتتى پايدالانىپ قىمبات باس­پانانى قولجەتىمدى ەتىپ وتىرعان «وتباسى بانكىنە», وبلىس اكىمدىگىنە ءوز وتباسىمىزدىڭ اتىنان شىن كوڭىلمەن ريزاشىلىق بىلدىرگىم كەلەدى. سىزدەر جاس وتباسىلارعا ۇلكەن قولداۋ كورسەتىپ جاتىرسىزدار», دەيدى قايرات.

رۋدنىيدا تۇراتىن ومىراليەۆ­تەر­دىڭ وتباسى دا «وتباسى بان­كىنىڭ» دەمەۋىمەن باسپانا الۋ باقى­تى­نا كەنەلىپ وتىر. ەرلى-زايىپتى تالانت پەن جاناردىڭ ەكەۋى دە «سوكولوۆ-سارىباي كەن بايىتۋ وندىرىستىك بىرلەستىگىندە» جۇمىس ىستەيدى. 2018 جىلى «50/50» باعدار­لا­ماسى ارقىلى ءۇش بولمەلى پاتەر العان جاس وتباسى سودان بەرى تاعى بىرنەشە باعدارلاماعا قاتىسىپ ۇلگەرگەن.

«كەيىن اۆتوكولىگىمىزدى ساتىپ, «وتباسى بانك» ارقىلى تاعى 2 بولمەلى پاتەر الدىق. ودان كەيىن ول ءۇيىمىزدى ساتىپ, «وتباسى بانك» ارقىلى 4 بولمەلى پاتەر الدىق. قازىر «وتباسى بانك ارقىلى» ءتورتىنشى ۇيگە دەپوزيت جيناپ جاتىرمىز. تاياۋدا وعان 500 مىڭ تەڭگە مەملەكەت سىيلىعى قوسىلدى. قازىر ءتورتىنشى ءۇي الۋ ءۇشىن قۇجات دايىنداپ جاتىرمىز. ءبىزدىڭ ەش­قانداي تامىر-تانىسىمىز جوق. تەك ارماندادىق, ماقسات قويدىق. رۋدنىيداعى بانك فيليالىنان روزا ەسىمدى كەڭەسشىنىڭ كوپ كومەگى ءتيدى. قانداي ماسەلەمەن بارساق تا, ەرىنبەي-جالىقپاي ءبارىن ءتۇسىندىرىپ, جان-جاقتى قولداۋ كورسەتىپ وتىردى. سوندىقتان اسىرەسە, باسپاناسىز جۇرگەن جاس وتباسىلارعا دەپوزيت اشىڭىزدار, جالا­قىلارىڭىزدىڭ ايىنا 20 پايىزىن سول دەپوزيتكە سالىپ وتىرساڭىزدار, ءۇش جىلدان كەيىن ءوز باسپانالارىڭىزعا قول­جەت­كىزەسىزدەر دەگىم كەلەدى», دەيدى جانار.

جالعىز ءوزى ەكى بالانى تاربيە­لەپ وتىرعان الەكساندرا بۋتەن­كونىڭ جولى بولعانى سونشالىق, جالعىزباستى انا «وتباسى بانك» ارقىلى سۋ تەگىن پاتەرگە يە بول­عان. الەكساندرا دا «سوكولوۆ-سارىباي كەن بايىتۋ وندىرىستىك بىرلەستىگىندە» سەپاراتورشى بولىپ جۇمىس ىستەيدى. 2018 جىلدان بەرى پاتەر كەزەگىنە تۇرعان جالعىزباستى انا وتكەن جىلى «وتباسى بانك» مەن كەن بايىتۋ كومبيناتى ۇيىمداستىرعان ۇتىس ويىنىنا قاتىسادى.

«الدىمەن «وتباسى بانككە» بارىپ دەپوزيت اشتىم. كوپ كەشىكپەي بىلتىر تامىزدىڭ بىرىندە پاتەر ۇتىپ الدىم. شىنىمدى ايتسام, مەن جۇرت ءجيى ايتاتىن «ارماندا, ارمانىڭ ورىندالادى» دەگەن سوزگە ەشقاشان سەنبەيتىنمىن. بىراق توسىننان كەلگەن باسپانا قۋانىشىنان كەيىن ارمانداۋدى ۇيرەنە باستادىم. قازىر ەكى بالاممەن ءۇش بولمەلى پاتەرىمدە تۇرىپ جاتىرمىن. بىلتىر ءاسانالى ەسىمدى ۇلىم دۇنيەگە كەلگەن. وسى بالام دۇنيەگە كەلە سالىپ, باسپانا ۇتىپ العانىمىزدى جاقسىلىققا جورىپ, بۇل – ءاسانالىم الىپ بەرگەن پاتەر دەپ ىشتەي قۋانىپ وتىرامىن. «وتباسى بانكتەگى» دەپوزيتىم ءالى اشىق. اي سايىن اقشا سالىپ وتىرامىن. ويتكەنى ەكى بالام بار, كوزدى اشىپ-جۇمعانشا ولار دا ەرجەتەدى. سوندىقتان كەلەشەكتە تاعى ءبىر پاتەر الىپ قويسام با دەگەن ماقسات بار. قازىر ەلىمىزدە جاس وتباسىلارعا جان-جاقتى قولداۋ جاسالىپ جاتىر. بۇرىنعىداي جۇمىسسىزدىق جوق. قاي جەرگە بارىپ ەڭبەك ەتەم دەسەڭ دە, ەرىك وزىڭدە. ايلىعىمىز جاقسى. بالالار بالاباقشاعا بارادى. بالاباقشا دا, مەكتەپ تە, ەمحانا, اۋرۋحانا دا ۇيىمە جاقىن. جانىمىزدا بالالاردى اپارىپ دەمالدىراتىن ساياباق بار», دەيدى الەكساندرا.

جيىن بارىسىندا «وتباسى بانك» باسقارما ءتورايىمىنىڭ ورىنباسارى نۇرلان اقشانوۆ جۇمىسشىلارعا «وتاۋ», «ناۋرىز» باعدارلامالارىنا قاتىسۋدىڭ رەتى مەن تيىمدىلىگى جونىندە كەڭىنەن اڭگىمەلەپ بەردى. يپوتەكالىق باعدارلامالاردىڭ تانىستىرىلىمى قۇرعاق بايانداۋ ەمەس, ەرجىگىت, ماقسات ەسىمدى جاس مامانداردىڭ باسىنان وتكەن وقيعالار جەلىسىنە قۇرىلعان كوميكس تۇرىندەگى تارتىمدى كورنەكىلىكتىڭ كومەگىمەن ءوتتى.

جيىن سوڭىندا فورۋمعا قا­تىسۋ­شىلار اراسىندا «وتباسى بانك» جۇزەگە اسىرىپ جاتقان يپو­تەكالىق باعدارلامالارعا قا­­تىس­تى ۇتىس ويىنى ۇيىمداس­تى­رىلدى. ويىنعا 200-گە جۋىق ادام قاتىسىپ, جيىرما شاقتى جەڭىمپاز شاينەك, شاڭسورعىش, ۇتىك ءتارىزدى تۇرمىسقا قاجەت زات­تار­عا يە بولدى.

فورۋمنان كەيىن وبلىس اكىم­دىگى مەن «وتباسى بانك» جانە «Eurasian Resources Group» بولىپ رۋدنىيداعى «سسكوب» اق قىزمەتكەرلەرىنىڭ تۇرعىن ءۇي جاعدايىن جەڭىلدەتىلگەن شارتپەن جاقسارتۋ جونىندەگى كەلىسىمشارتقا وتىردى. باعدارلاماعا قاتىسۋ­شى­لارعا «وتباسى بانك» جىلدىق 5% ۇستەمەمەن (جتسم 5,2%-دان باستاپ 5,3%-عا دەيىن) زايم بەرەدى. ءارى مۇنداعى مىندەتتى باستاپقى جارنا مولشەرى – نەبارى 10% بولادى.

ءوزارا تۇسىنىستىك پەن ارىپتەس­تىك تۋرالى مەموراندۋمعا قوس­تاناي وبلىسىنىڭ اكىمى قۇمار اقساقالوۆ, «وتباسى بانك» باس­قارما ءتورايىمىنىڭ ورىنباسارى نۇرلان اقشانوۆ پەن ەۋرازيالىق توپ (ERG) باس ديرەكتورىنىڭ قارجى جونىندەگى ورىنباسارى دانيار راحماتۋللاەۆتار قول قوي­دى.

كەلىسىمشارتقا قول قويعان ءار تاراپ باعدارلامانى ىسكە اسى­رۋعا 500 ملن تەڭگە باعىتتايدى. ناتي­جەسىندە, جۇمسالاتىن جالپى قاراجات مولشەرى 1,5 ملرد تەڭگەنى قۇرايدى. قوماقتى قارجى بيىل كەنىش سالاسىندا ەڭبەك ەتىپ جۇرگەن 100 وتباسىنىڭ باسپانالى بولۋىنا سەپتىگىن تيگىزبەك.

كەلىسىمشارت بويىنشا, ەۋرا­زيا­لىقتار اراسىنان اكىم­دىكتەگى باسپانا كەزەگىندە تۇرعىندارعا با­سىمدىق بەرىلەدى. سونداي-اق رۋدنىي قالاسىنان ەكىنشى نا­رىق­تان باسپانا الۋ مۇمكىندىگى دە قاراستىرىلعان. باسپانا الۋعا ۇمىتتىلەردىڭ ءتىزىمىن كومپانيانىڭ تۇرعىن ءۇي كوميسسياسى تۇزەدى. باعدارلاماعا سوڭعى 5 جىل ىشىندە رەسپۋبليكا اۋماعىندا ءوزىنىڭ جانە وتباسى مۇشەلەرىنىڭ اتىنا تىركەلگەن باسپاناسى بولماعان, ۇيگە مۇقتاج قىزمەتكەرلەر قاتى­سا الادى.

ىرىكتەۋدەن وتكەندەر مىندەتتى 10% باستاپقى جارنانى سالعان سوڭ, «وتباسى بانك» ولارعا 5% ۇستەمەمەن زايم بەرەدى. جىل­دىق ءتيىمدى ۇستەمەاقىسى 5,2%-دان ­باس­تالاتىنىن دا ايتا كەتكەن ءجون. زايمنىڭ ەڭ جوعارعى مول­شەردەگى كولەمى – 20 ملن تەڭگە. باعدارلاماعا قاتىسۋشى قىم­بات پاتەر العىسى كەلسە, وعان جەكە قا­را­جاتىن سالۋعا نەمەسە زەي­نەت­اقى جارناسىنان ارتىلعان سالىمىن پاي­دالانا الادى.

«وتباسى بانكپەن» اراداعى ۇزاق جىلدار بويعى سەنىمدى سە­رىك­تەستىگىمىز جاقسى ناتيجە بەرىپ وتىر. ءبىز بىرلەسە وتىرىپ, كۇن­دە­لىكتى قاجىرلى ەڭبەگىمەن ەل ەكو­نو­ميكاسىنىڭ نىعايۋىنا ەسەلى ۇلەس قوسىپ جۇرگەن قىز­مەت­كەر­لە­رى­مىزدىڭ باسپانا ماسەلەسىن تولىق شەشۋگە تىرىسامىز. «ERG» – ءاۋ باستان الەۋمەتتىك باعدارلانعان كومپانيا. ءالى دە وسى باعىتىنان جاڭىلمايتىنىن ايتقىم كەلەدى. ەكونوميكاداعى اۋمالى-توكپەلى جاعدايعا قاراماستان, وسىنداي يگى باعدارلامالاردى ىسكە اسىرۋ ارقىلى ەۋرازيالىقتاردىڭ تۇرمىس جاعدايىن جاقسارتۋدى جالعاستىرا بەرەمىز», دەيدى «ERG» ديرەكتورلارى كەڭەسىنىڭ توراعاسى الەكساندر ماشكەۆيچ.

سوڭعى 11 جىل ىشىندە «ERG» قىز­مەت­كەرلەرىنىڭ ىشىنەن 4 مىڭ 634 وتباسى «تۇرعىن ءۇي باع­دار­لاماسى» ارقىلى باسپانالى بولعان. بيىل تاعى 440 وتبا­سى قونىس تويىن تويلاماق. «وتباسى بانكپەن» بىرلەسىپ قولعا الىن­عان تەڭدەسسىز باعدارلاما كەن سا­لا­سىنداعى كاسىپورىن قىز­مەت­كەر­­لەرىنىڭ باستاپقى جارناسىز, ءتيىمدى ۇستەمەمەن ءۇيلى بولۋىنا جول اشىپ وتىر.

«باقىتتى, كوڭىلى جايلى قىز­­­مەتكەرلەر – كەز كەلگەن كاسىپورىننىڭ ەڭ قۇندى رە­سۋرسى. قىز­مەتكەرلەردى تەك ەڭبەك­اقى عانا ەمەس الەۋمەتتىك جەڭىل­دىك­تەر, كاسىبي ورلەۋ مەن ءوسۋ مۇم­كىن­دىكتەرى, جۇمىس كۇنىنەن سوڭ قۋانا قايتاتىن ءوز ءۇي – ولەڭ توسە­گى دە ىنتالاندىرادى. ءبىزدى ەڭ­بەك ادامدارىنىڭ «وتباسى بانك­كە» جۇگىنە وتىرىپ وزدەرىنىڭ باس­پانا ماسەلەسىن ءتيىمدى شەشىپ الىپ جاتقانى قۋانتادى. بۇگىنگە دەيىن ءبىز ۇسىنعان كورپوراتيۆتىك ءونىمنىڭ ارقاسىندا ەلىمىزدىڭ ءار قيىرىنداعى شاحتەرلەر, مەتاللۋرگتەر, ەنەرگەتيكتەر, قۇرى­لىس­شىلار, وقىتۋشىلار مەن دارى­گەر­لەر جالپى سانى 1 مىڭ وتباسى باسپانالى بولدى. ەندى كوپ وتپەي قوستاناي وبلىسىندا دا قونىس تويى تويلانادى», دەدى «وتباسى بانك» باسقارما ءتورايىمىنىڭ ورىنباسارى نۇرلان اقشانوۆ.

قوستاناي وبلىسى