وڭىردە مامىر ايىنىڭ سوڭىنا دەيىن ۋىلدىرىق شاشۋعا بايلانىستى بالىق اۋلاۋعا تىيىم سالىنعان, دەپ حابارلايدى Egemen.kz Pavlodarnews.kz سايتىنا سىلتەمە جاساپ.
وبلىستىق پوليتسيا قىزمەتكەرلەرى ستەلا – ەكىباستۇز اۆتوجولىندا ۆاز-21214 ماركالى اۆتوكولىكتى توقتاتىپ, جۇك سالعىشىنداعى جالپى سالماعى 120 كەلى بولاتىن بالىقتى تاركىلەگەن. سونداي-اق تاعى ءبىر جۇرگىزۋشى ۋاز-3163 ماركالى اۆتوكولىگىنىڭ جۇك سالۋ بولىگىندە ءتيىستى قۇجاتتارسىز ءبىر قاپ بالىق پەن بەس بالىق اۋلاۋ تورىن تاسىمالداعان.
«بالىق اۋلاۋ ەرەجەلەرىن, سونداي-اق بالىق رەسۋرستارىن جانە باسقا دا سۋ جانۋارلارىن پايدالانۋ ەرەجەلەرىن بۇزعانى ءۇشىن ەكى ادام دا اكىمشىلىك جاۋاپكەرشىلىككە تارتىلدى. ارقايسىسىنا 10 اەك مولشەرىندە ايىپپۇل سالىندى. زاڭسىز بالىق اۋلاۋ ناتيجەسىندە كەلتىرىلگەن زالال ەسەپتەلىپ جاتىر», دەدى ەكىباستۇز قالاسى پوليتسيا باسقارماسى باستىعىنىڭ ءبىرىنشى ورىنباسارى تولەگەن قۇدايبەرگەنوۆ.
ەستەرىڭىزگە سالا كەتەيىك, 15 ءساۋىر-30 مامىر ارالىعىندا «ۋىلدىرىق شاشۋ - 2024» ءىس-شاراسى وتكىزىلەدى. اتالعان كەزەڭدە ەكىباستۇز پوليتسەيلەرى بالىق اۋلاۋ ەرەجەلەرىن بۇزۋعا قاتىستى 13 فاكتىنىڭ جولىن كەستى, بارلىق قۇقىق بۇزۋشىلار جازالاندى.