NU مەديتسينا مەكتەبىنىڭ تۇلەكتەرى ەندى الەمنىڭ قاي جەرىندە بولسىن جۇمىس ىستەي الادى. سەبەبى ەۋرازيالىق جوعارى ءبىلىم بەرۋ جانە دەنساۋلىق ساقتاۋ ساپاسىن اككرەديتتەۋ جانە كەپىلدەندىرۋ ورتالىعىنان «مەديتسينا عىلىمدارىنىڭ دوكتورى» باعدارلاماسى بويىنشا تولىق حالىقارالىق اككرەديتاتسيا الدى.
ەۋرازيالىق جوعارى ءبىلىم بەرۋ جانە دەنساۋلىق ساقتاۋ ساپاسىن اككرەديتتەۋ جانە كەپىلدەندىرۋ ورتالىعى (ECAQA) ەۋروپالىق جوعارى ءبىلىم ساپاسىنا كەپىلدىك بەرۋ قاۋىمداستىعىنىڭ قۇرامىنا كىرەدى. ونى دۇنيەجۇزىلىك مەديتسينالىق ءبىلىم بەرۋ فەدەراتسياسى دا مويىندايدى. بەسجىلدىق اككرەديتتەۋ NU-دىڭ «مەديتسينا عىلىمدارىنىڭ دوكتورى» باعدارلاماسى ساپا مەن وزىق مەديتسينالىق ءبىلىم بەرۋدىڭ قاتاڭ ستاندارتتارىنا سايكەس كەلەتىنىن راستايدى. بۇل رەتتە وقۋ باعدارلاماسى, وقىتۋشىلاردىڭ بىلىكتىلىگى, زەرتتەۋ مۇمكىندىكتەرى, ستۋدەنتتەردى قولداۋ قىزمەتى جانە كلينيكالىق بازا جان-جاقتى باعالانباق.
– مەديتسينا عىلىمدارىنىڭ دوكتورى» باعدارلاماسىنىڭ ECAQA-نىڭ تولىق اككرەديتاتسياسىن الۋى – NU مەديتسينا مەكتەبىنىڭ ماڭىزدى قادامى. بۇل ءبىزدىڭ وقىتۋشىلارىمىزدىڭ, قىزمەتكەرلەرىمىزدىڭ جانە ستۋدەنتتەرىمىزدىڭ ەڭبەگى مەن تالپىنىسىنىڭ كۋاسى, سونداي-اق جوعارى دەڭگەيدەگى مەديتسينالىق ءبىلىم بەرۋ بويىنشا ميسسيامىزدى راستايدى. بولاشاق مەديتسينا ماماندارىن ساپالى دايارلاۋعا دەگەن ۇمتىلىسىمىزدىڭ دالەلى. ولار ءبىزدىڭ قوعامىمىزدىڭ جانە ودان تىس جەرلەردىڭ دەنساۋلىق ساقتاۋ سالاسىنداعى ءتۇرلى ماسەلەنى شەشىپ, كۇن سايىن ارتىپ كەلە جاتقان مىندەتتەردى ورىنداي الۋى كەرەك, – دەگەن ەدى NU ۆيتسە-پرەزيدەنتى جانە مەديتسينا مەكتەبىنىڭ دەكانى ماسسيمو پينياتەللي.
ECAQA-نىڭ تولىق اككرەديتاتسياسى ستۋدەنتتەرگە كوپ مۇمكىندىك بەرەدى. سەبەبى ول – كەپىلدەندىرىلگەن ءبىلىم ساپاسى. ەكى جىل ىشىندە ECAQA ساراپشىلارى باعدارلامانى مۇقيات تالدادى. ول حالىقارالىق ۇزدىك تاجىريبەلەرگە (best practices) سايكەس كەلدى ءارى ستۋدەنتتەردىڭ ساپالى ءبىلىم, وزىق كلينيكالىق بازالار مەن تەحنولوگيالارعا قولجەتىمدىلىگىن قامتاماسىز ەتەدى دەگەن قورىتىندىعا كەلدى. سونىمەن قاتار NU مەديتسينا مەكتەبىنىڭ تۇلەكتەرىنە بەدەلدى مەديتسينالىق مەكەمەلەرگە جۇمىسقا ورنالاسۋعا جانە وقۋىن ءارى قاراي جالعاستىرۋعا مۇمكىندىك اشىلماق.
ءتورت جىلدىق «مەديتسينا عىلىمدارىنىڭ دوكتورى» باعدارلاماسى اقش-تىڭ ءبىلىم بەرۋ مودەلىنە نەگىزدەلگەن. باعدارلاماعا ءتۇسۋ ءۇشىن نەگىزگى مەديتسينا نەمەسە باسقا دا ءتيىستى ءبىلىم بويىنشا ديپلوم قاجەت. وقىتۋ ۇدەرىسى ناۋقاستى ەمدەۋ ارقىلى جۇرگىزىلەدى. العاشقى ەكى جىلدا ستۋدەنتتەر UMC اۋرۋحانالارىندا اپتا سايىنعى سەسسيادان جانە سوڭعى جىلدارى كلينيكالىق تاجىريبەدەن وتەدى. ودان كەيىن مەديتسينا عىلىمىنىڭ دوكتورى دارەجەسىمەن رەزيدەنتۋرا مەن دوكتورانتۋرادا وقۋدى جالعاستىرۋعا بولادى. مەكتەپتە باكالاۆرياتتان رەزيدەنتۋراعا دەيىن بارلىعى 22 ءبىلىم بەرۋ باعدارلاماسى بار. اتالعان باعدارلامالار بويىنشا وسى ۋاقىتقا دەيىن 500-گە جۋىق ادام ءبىلىم العان.
حالىقارالىق اككرەديتتەۋ ۋنيۆەرسيتەتتى الەمدىك ارەنادا بەدەلدى ەتە تۇسەدى. تالاپكەرلەردىڭ, ونىڭ ىشىندە شەتەلدىكتەردىڭ قىزىعۋشىلىعىن ارتتىرادى. تارتىمدىلىقتىڭ ارتقانىن بىلدىرەدى. اككرەديتتەۋ ۇدەرىسى مۇنىمەن توقتاپ قالمايدى. NU مەديتسينا مەكتەبى قازاقستاندا مەديتسينالىق سالا كوشباسشىلارى قاۋىمداستىعىن قالىپتاستىرۋ ماقساتىندا ءوزىنىڭ باعدارلامالارى مەن زەرتتەۋلەرىن جەتىلدىرۋدى جالعاستىرۋعا مىندەتتەمە الىپ وتىر. 2015 جىلى قۇرىلعاننان بەرى NU مەديتسينا مەكتەبى يننوۆاتسيالىق دەنساۋلىق ساقتاۋ جۇيەسىن قۇرا الدى, ونىڭ ىشىندە عىلىمي زەرتحانالار مەن ۋنيۆەرسيتەت مەديتسينا ورتالىعى (UMC) بار. ءتىپتى مەديتسينالىق كلينيكالار ءۇشىن «التىن ستاندارت» سانالاتىن حالىقارالىق بىرىككەن كوميسسيانىڭ (JCI) اككرەديتاتسياسى بار. ستۋدەنتتەر UMC-تىڭ اكادەميالىق كلينيكالىق كافەدرالارىندا تاجىريبە جيناپ, وقۋدى بىتىرگەننەن كەيىن رەزيدەنتۋرادان وتەدى. وسىلايشا, اكادەميالىق مەديتسينالىق ورتالىق پيتتسبۋرگ ۋنيۆەرسيتەتىنىڭ مەديتسينا مەكتەبى رەتىندەگى سەرىكتەسىنىڭ قولداۋىمەن حالىقارالىق مەديتسينالىق حابقا اينالا الادى.