قازاقتىڭ كورنەكتى گەولوگ-عالىمى قانىش ساتباەۆتىڭ 125 جىلدىعىنا ارنالعان « ۇلى دالا جورىعى» مارافون-بايگەسىنىڭ ءبىرىنشى كەزەڭى اياقتالدى. تەبىنگىسىنە تەر قاتقان سالت اتتىلار 14 كوماندا بولىپ كەشە تاڭعى 7.00-دە پاۆلودار وبلىسىنداعى تورتقۇدىق ەلدى مەكەنىنەن اقمولا وبلىسىنىڭ اۋماعىنداعى تورعاي ەلدى مەكەنىنە اتتانىپ كەتتى.
بايگە پاۆلوداردا باستالىپ, اقمولا وبلىسىندا جالعاسادى.
23 مامىردا مارافون استانا قالاسىندا اياقتالادى. العاشقى كەزەڭدە بىردەن الماتى, قىزىلوردا وبلىستارى مەن شىمكەنت قالاسىنان كەلگەن كوماندالار جارىستان ءتۇرلى سەبەپپەن شىعىپ قالدى.
«اتتاردىڭ شاما-شارقىن باعامداعان شاباندوزدار سايگۇلىكتەرىن قيناماي, دەر كەزىندە جارىستى توقتاتقاندارى جاقسى شەشىم بولدى», دەدى باس تورەشى نادەجدا كۋپتسوۆا.
ءۇشىنشى كۇننىڭ قورىتىندىسى بويىنشا مارافوندا 14 كوماندا قالدى. 21 مامىردا مارافون-بايگەنىڭ ەكىنشى كەزەڭى اياقتالدى. ءۇشىنشى كەزەڭ بويىنشا جەتىسۋ وبلىسىنىڭ كومانداسى جەڭىمپاز اتاندى. ماڭعىستاۋ وبلىسىنىڭ شاباندوزدارى مارە سىزىعىنا ەكىنشى بولىپ جەتسە, الماتى قالاسىنىڭ كومانداسى ۇشتىككە ىلىكتى. ال شىعىس قازاقستان وبلىسىنىڭ كومانداسى جارىستان شىعىپ قالدى. ءۇشىنشى كەزەڭدە تۇركىستان, سولتۇستىك قازاقستان, قوستاناي, اباي, پاۆلودار, اقمولا, ۇلىتاۋ وبلىستارىنان ەكى اتتان, جەتىسۋ, قاراعاندى, ماڭعىستاۋ وبلىستارى مەن استانا قالاسىنان ءبىر-ءبىر اتتان جارىسقا جارامسىز دەپ تانىلدى. الماتى قالاسى مەن جامبىل وبلىسى بەس اتپەن جارىسقا شىعادى.
العاشقى ءۇش جەڭىمپاز دۇنيەجۇزىلىك كوشپەلىلەر ويىندارى الدىندا 3-7 قىركۇيەك ارالىعىندا وتەتىن حالىقارالىق مارافون-بايگەگە قاتىسۋعا ليتسەنزيا الادى. حالىقارالىق كەزەڭگە شەت مەملەكەتتەردەن (تۇركيا, ساۋد ارابياسى, موڭعوليا, ماجارستان, تۇرىكمەنستان, يران, وزبەكستان, ت.ب.) كەمىندە 15 كوماندا قاتىسادى دەپ جوسپارلانىپ وتىر.
ال مارافون جۇمىسىنا 2 حالىقارالىق جانە 3 ەل تورەشىسى, سونداي-اق 2 حالىقارالىق جانە 3 جەرگىلىكتى مال دارىگەرى قاتىسىپ جاتىر. ولار جوعارى ستاندارتتاردى ساقتاۋ مەن جىلقىلاردىڭ ساۋلىعىن باقىلايدى. ايتا كەتەيىك, وتكەن ەكى جىل قاتارىنان ەلىمىزگە ەسىمى بەلگىلى اۋەسقوي ۆەلوشاباندوز راببيم بوراشوۆ اتتىلى شاباندوزدارمەن بىرگە استانادان تۇركىستانعا دەيىنگى 1 200 جانە 1 300 شاقىرىمدى باعىندىرعان ەدى. سپورتشى بۇل جولى دا 5 كۇندىك الامانعا قاتىسىپ, 500 شاقىرىمدى باعىندىرۋدى مەجەلەپ وتىر.
500 شاقىرىمدىق بايگە-مارافونىن ۇلتتىق سپورت قاۋىمداستىعى مەن «Amanat» پارتياسى, پاۆلودار وبلىستىق اكىمدىگى, تۋريزم جانە سپورت مينيسترلىگى بىرلەسىپ وتكىزىپ جاتىر. «Amanat» پارتياسىنىڭ اتقارۋشى حاتشىسى داۋلەت كارىبەك پارتيا ۇلتتىق سپورت تۇرلەرىن دامىتۋعا, سونداي-اق مادەني جانە تاريحي مۇرانى ناسيحاتتاۋعا باعىتتالعان باستامالاردى ءاردايىم قولدايتىنىن ايتادى.
– ۇلتتىق سپورتتى دامىتۋ ماسەلەسى – اركەز مەملەكەت باسشىسى قاسىم-جومارت توقاەۆتىڭ نازارىندا. ۇلتتىق قۇرىلتايدا پرەزيدەنت قازاقستان ۇلى دالا كوشپەلى وركەنيەتىنىڭ تىكەلەي مۇراگەرى سانالاتىنىن, ءبىز ءوزىمىزدىڭ مادەني مۇرامىزدى قورعاپ, ىلگەرىلەتۋىمىز كەرەك ەكەنىن اتاپ ءوتتى. « ۇلى دالا جورىعى» بايگەسى پارتيا قولداۋىمەن ءۇشىنشى جىل قاتارىنان وتكەلى وتىر. مارافون-بايگە حالقىمىزدى بىرىكتىرەتىن, ۇلتتىق رۋحتى نىعايتاتىن جوباعا اينالدى, – دەدى د.كارىبەك.
كوماندالار بەس كۇن بويى كۇنىنە 100 شاقىرىم جول ءجۇرىپ وتۋگە ءتيىس. ءار 50 شاقىرىم سايىن كوماندالار مەن ولاردىڭ اتتارىنا دەمالۋعا مۇمكىندىك بەرىلەدى. جىلقىلاردىڭ جاعدايىن تاجىريبەلى ۆەتەرينارلار باقىلايدى. ايتا كەتۋ كەرەك, ءار كوماندانىڭ جولعا شىعۋ ۋاقىتى ءارتۇرلى. ءبىرىنشى كوماندا ساعات 07.00-دە, كەلەسىلەر ەكى مينۋت ارالىقپەن جولعا شىعادى. ناتيجەسىندە, سوڭعى كوماندانىڭ ساپارى 07.36-دا باستالادى. كوماندالاردىڭ قانداي نومىرمەن جارىساتىنى جەرەبە تارتۋ بارىسىندا انىقتالدى.
– « ۇلى دالا جورىعى» مارافون-بايگەسىن ءۇشىنشى رەت وتكىزىپ وتىرمىز. بۇل – ازاماتتار مەن ارعىماقتاردىڭ ءتوزىمى مەن ەرىك-جىگەرى سىنعا تۇسەتىن دودا. بارلىق سپورتشىمىز وسى كۇردەلى سىناقتان سۇرىنبەي ءوتىپ, جورىتقاندا جولدارى بولسىن! – دەدى ۇلتتىق سپورت قاۋىمداستىعىنىڭ پرەزيدەنتى ي.سالجانوۆ.
كوماندالار ءبىر-بىرىمەن جارىسپايدى, ويتكەنى ارقايسىسىنىڭ قوزعالىس ۋاقىتى ءارتۇرلى. بارلىق قاشىقتىقتى ەڭ قىسقا ۋاقىتتا ەڭسەرگەن كوماندا جەڭىمپاز اتانادى.