مەملەكەت باسشىسى قاسىم-جومارت توقاەۆ تۇركيا ۇلتتىق ءماجىلىسىنىڭ توراعاسى نۋمان كۋرتۋلمۋشتى قابىلدادى. كەزدەسۋدە قازاقستان مەن تۇركيانىڭ كەڭەيتىلگەن ستراتەگيالىق سەرىكتەستىگىن ودان ءارى نىعايتۋ ماسەلەلەرى تالقىلاندى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
مەملەكەت باسشىسى پارلامەنتتىك ديپلوماتيانىڭ الەۋەتىن جوعارى باعالايتىنىن اتاپ ءوتىپ, تۇركيا ۇلتتىق ءماجىلىسى توراعاسىنىڭ قازاقستانعا ساپارىنىڭ ءمانى زور ەكەنىنە نازار اۋداردى.
«بۇگىنگى كەزدەسۋ دوستىق جانە ىنتىماقتاستىق تۋرالى كەلىسىمنىڭ 30 جىلدىعى قارساڭىندا ءوتىپ جاتىر. مۇنىڭ سيمۆولدىق ءمانى بار. جاقىندا عانا ارىپتەسىم رەجەپ بەيمەن تەلەفون ارقىلى سويلەستىم. ءبىز ۇنەمى حابارلاسىپ وتىرامىز. سوندىقتان ەكى ەل اراسىنداعى ديالوگ وتە جاقسى دامىپ كەلە جاتىر. جالپى, تۇركيا – قازاقستاننىڭ ەڭ ءىرى بەس ساۋدا سەرىكتەسىنىڭ ءبىرى. سونىمەن قاتار باستى 10 ينۆەستوردىڭ قاتارىنا كىرەدى. بىلتىر ەكىجاقتى ساۋدا-ساتتىق كولەمى 6 ميلليارد دوللارعا جەتتى. بىراق مۇنىمەن توقتاپ قالۋعا بولمايدى. قارىم-قاتىناسىمىزدىڭ الەۋەتى وتە زور. سوندىقتان كەلەشەكتە ءوزارا ساۋدا اينالىمى 10 ميلليارد دوللارعا جەتەتىنىنە ەشقانداي كۇمانىمىز جوق», دەدى پرەزيدەنت.
نۋمان كۋرتۋلمۋش اتاجۇرتتا تۇرىك دەلەگاتسياسىنا كورسەتىلگەن سىي-قۇرمەت ءۇشىن ريزاشىلىعىن ءبىلدىردى.
«قازاقستان – ءبىزدىڭ اتاجۇرتىمىز ءارى تۇركى حالقىنا ورتاق رۋحاني تۇلعا قوجا احمەت ءياساۋيدىڭ وتانى. ءبىز تۇركىستان قالاسىنا جول ءجۇرىپ, قاسيەتتى ورىندارعا زيارات ەتەمىز جانە قوجا احمەت ياساۋي اتىنداعى قازاق-تۇرىك حالىقارالىق ۋنيۆەرسيتەتىندە كونفەرەنتسيا وتكىزەمىز. قازاقستان ءسىزدىڭ باسشىلىعىڭىزبەن دامۋدىڭ جاڭا كەزەڭىنە قادام باستى. ەلىڭىزدە تابىستى ساياسي-ەكونوميكالىق, الەۋمەتتىك رەفورمالار ءجۇرىپ جاتىر. مۇنىڭ ءبارى قازاقستاننىڭ وركەندەۋىنە وڭ ىقپالىن تيگىزەدى دەپ ويلايمىن. الداعى ۋاقىتتا تۇركيا مەن قازاقستان اراسىنداعى ىنتىماقتاستىق ودان ءارى نىعايا تۇسەتىنىنە سەنىمدىمىن. ەكى ەلدىڭ ساۋدا, تەحنولوگيا, ونەركاسىپ, لوگيستيكا, ەنەرگەتيكا جانە اۋىل شارۋاشىلىعى سالالارىنداعى الەۋەتى زور», دەدى تۇركيا ۇلتتىق ءماجىلىسىنىڭ توراعاسى.
قاسىم-جومارت توقاەۆ پەن نۋمان كۋرتۋلمۋش ەكى ەلدىڭ حالىقارالىق ۇيىمدار اياسىنداعى ىقپالداستىعىن كۇشەيتۋ جانە تۇركى مەملەكەتتەرى ۇيىمىنا مۇشە باۋىرلاس ەلدەردىڭ ءوزارا ىنتىماعىن نىعايتۋ جونىندە پىكىر الماستى. سونداي-اق تۇركيا ەلىنىڭ باسشىلىعىمەن الداعى كەزەڭگە جوسپارلانعان جوعارى دەڭگەيدەگى كەزدەسۋلەر پىسىقتالدى.
مەملەكەت باسشىسى تۇرىك سپورتشىلارى مەن دەلەگاتسياسى بيىل قىركۇيەك ايىندا استانادا وتەتىن V دۇنيەجۇزىلىك كوشپەندىلەر ويىندارىنا بەلسەندى قاتىساتىنىنا سەنىم ءبىلدىردى.