الماتى قالاسىنداعى جۇزدەن اسا كوشە بۇرىنعى تاريحي نەمەسە جاڭا اتاۋلارعا يە بولعانىمەن, ءالى كۇنگە دەيىن اتى جوق كوشەلەر دە بار. شاھاردا كوشەلەردىڭ اتىن وزگەرتۋ, ياكي ەلگە ەڭبەگى سىڭگەن تۇلعالاردىڭ ەسىمىن بەرۋ ماسەلەسى قاشاندا وزەكتى.
كەيدە ءتىپتى تالاس تۋدىرىپ جاتاتىندىقتان, بۇعان دەيىن دە قالادا 180 كوشەنىڭ اتى جوق ەكەندىگىن, كەرىسىنشە 51 كوشەنىڭ اتاۋلارى قايتالاناتىنى, كەي كوشەلەردىڭ اتاۋى مەملەكەتتىك ساياساتقا ساي كەلمەيتىنى, وعاش اتاۋلار تۋرالى ماسەلە كوتەرىپ, ارنايى ماقالا جازعان كەزدەرىمىز دە بولدى. بۇل ماسەلە قالالىق ءماسليحات جيىندارىندا دا تالقىلانىپ جاتادى.
ەندىگى جەردە الماتىدا بىرنەشە كوشەگە بەلگىلى تۇلعالاردىڭ ەسىمدەرىن بەرۋ جوسپارلانىپ جاتقان جايى بار. سەبەبى تۇرعىنداردان قالا كوشەلەرىنە قازاقستاننىڭ بەلگىلى ونەر قايراتكەرلەرى: ءانشى ەرمەك سەركەباەۆ, كومپوزيتور ەسكەندىر حاسانعاليەۆ, اكتەرلەر يۋري پومەرانتسەۆ پەن ۆلاديمير تولوكوننيكوۆتىڭ ەسىمىن بەرۋ تۋرالى وتىنىشتەر كەلىپ تۇسكەن.
قالالىق ءماسليحاتتىڭ شەشىمىمەن بوستاندىق اۋدانى يۋ.گاگارين داڭعىلىنىڭ ك.تيميريازەۆ كوشەسىنەن ءال-فارابي داڭعىلىنا دەيىنگى بولىگىنە ەرمەك سەركەباەۆ داڭعىلى, اۋەزوۆ اۋدانى يۋبيلەينايا كوشەسىنە ۆلاديمير تولوكوننيكوۆ اتىن بەرۋ جوسپارلانىپ وتىر. ەسكەندىر حاسانعاليەۆتىڭ ەسىمى تۇركسىب اۋدانىنىڭ «جاس قانات» شاعىن اۋدانىنداعى اتاۋى جوق كوشەگە بەرىلەدى, ال يۋري پومەرانتسەۆتىڭ ەسىمىمەن قالانىڭ بوستاندىق اۋدانىنداعى اتاۋى جوق كوشە اتالادى.
الماتى