جازۋ-سىزۋدىڭ اينالاسىنداعى جانە ونەر ادامدارىنىڭ ءبىر سىپىراسى بيليارد ويىنىنا قۇمبىل كەلەدى. بۇل ءوزى – سيقىرلى تاياعىن اسىنىپ, جاسىل شۇعالى القاپقا اق بوكەندەي جوسىعان اق شارلاردى ۇركىتپەي, بىرتىندەپ ۇياشىققا توعىتۋدان ءلاززات الاتىن قاۋىم. ءتىپتى اراسىندا جۇلگەسى ۇزىلمەگەن, جۇلدەسى قوماقتى ءداستۇرلى تۋرنيرلەر كاسىبي باسەكەلەردەن ءبىر كەم وتپەيدى.
استانا قالاسىندا بەلگىلى تەلەجۋرناليست, قوعام قايراتكەرى نۇرتىلەۋ يمانعالي ۇلىن ەسكە الۋعا ارنالعان جۋرناليستەر اراسىندا بيلياردتان رەسپۋبليكالىق ءداستۇرلى تۋرنير ءوتتى. تەلەجۋرناليستيكا تارلانىنىڭ ەسىمىن ۇلىقتاۋعا جانە جاستار اراسىندا كەڭىنەن ناسيحاتتاۋعا باعىتتالعان بۇل يگى ءىس-شارا وسىمەن قاتارىنان ءتورتىنشى جىل وتكىزىلىپ وتىر. بۇعان دەيىنگى تۋرنيرلەردە ءنۇردىلدا وراز, ماقسۇت ەرجان, وڭداسىن مەيىرباەۆ قاتارلى جۋرناليستەر قانجىعاسىن مايلاپ, ۇزدىك اتانعان ەدى.
جۋرناليستيكادا دا, بيلياردتا دا «كەيكى مەرگەن» اتانعان تەلەۆيزيا دارابوزى نۇرتىلەۋ يمانعالي ۇلى تالاي جاسقا ۇلگى. ونەردەگى دوستارى ونىڭ تەك سوزتاپقىش, شەشەندىگىن عانا ەمەس, بيليارد, ۆولەيبول ىسپەتتى ويىنداردا ۇتقىر, مەرگەن, شەبەر ويىنشى ەكەنىن دە مويىنداعان.
نۇرتىلەۋ يمانعالي ۇلى – جەتىسۋ وبلىسى اقسۋ اۋدانى دىڭگەك اۋىلىندا دۇنيەگە كەلگەن. وتباسىنداعى 14 بالانىڭ كەنجەسى. جاستايىنان سپورتقا, ءسوز ونەرىنە بەيىم بولىپتى. قاناتى قاتايىپ, جارتى عاسىرعا جۋىق تەلەجۋرناليستيكا قازانىندا قايناپ, ءوزىنىڭ ەرەكشە بولمىسىمەن, مانەرىمەن كورەرمەن كوزايىمىنا اينالدى.تەلەگەي تەر شۇمەكتەتىپ ەڭبەك ەتكەن ۇلت پەرزەنتى مۇحيتتان مارجان سۇزگەندەي مىڭجىلدىقتاردان بەرگى قۇندىلىقتاردى جۋرناليستىك قارىمى مەن دارىنىنا ۇشتاستىرىپ, قوعامنىڭ اششى شىندىعىن جەتكىزە ءبىلدى. ول تىزگىندەگەن «وي-كوكپار», «بەتپە-بەت», «دىڭگەك», «قولتاڭبا», ت.ب. حابارلارى – ءالى كۇنگە دەيىن كورەرمەن جادىندا. قاراشاڭىراق «قازاقستان» تەلەراديوكورپوراتسياسىنىڭ توراعاسى لاۋازىمىنا دەيىن ءوستى.
ء«ىس-شارانىڭ باس دەمەۋشىسى – «Tas Group» كومپانياسىنىڭ قۇرىلتايشىسى, «Assyltas» قوعامدىق قورىنىڭ پرەزيدەنتى, حالىقارالىق «قازاق ءتىلى» قوعامىنىڭ ۆيتسە-پرەزيدەنتى, مەتسەنات, ونەر جاناشىرى دۋلات تاستەكەەۆ. كاسىپكەر ونەر مەن سپورتتا جۇرگەن تالاي ساڭلاققا دەمەۋشىلىك كورسەتىپ كەلەدى. ءتورت جىل قاتارىنان ۇيىمداستىرىلىپ كەلە جاتقان نۇرتىلەۋ يمانعالي ۇلى اتىنداعى ءداستۇرلى ءتۋرنيردىڭ تۇراقتى, باس دەمەۋشىسى», دەيدى ءتۋرنيردى ۇيىمداستىرۋشىلار.
ءىس-شارانىڭ شىمىلدىعى نۇرتىلەۋ يمانعالي ۇلىنىڭ رۋحىنا ارناۋمەن اشىلدى. قاتىسۋشىلارعا اعامىزدىڭ ومىرلىك ۇرانىنا اينالعان «باي قۋاتتى بولايىق!» دەگەن جازۋى بار سۋۆەنير سىيلىقتار مەن بەيسبولكالار تاراتىلدى. تۇسكى استا نۇرتىلەۋ يمانعالي ۇلىنىڭ رۋحىنا قۇران باعىشتالىپ, ەستەلىك بەينەروليك كورسەتىلدى. تۋرنير قورىتىندىسى بويىنشا جەڭىمپاز اتانعاندار مەن ۇزدىك ويىن كورسەتكەندەرگە قارجىلاي سىيلىق تابىس ەتىلدى.
جيىنى 40 ويىنشى قاتىسقان باسەكەدە باس جۇلدەنى «قازاقستان» تەلەراديوكورپوراتسياسىنىڭ قىزمەتكەرى, اقىن, جۋرناليست تۇرماعامبەت كەنجەباەۆ ەنشىلەدى. 2-ورىن جاس رەجيسسەر اسىلحان ماناپقا بۇيىردى. ال 3-جۇلدەنى بەلگىلى تەلەجۋرناليست, «حابار» مەن «قازاقستان» تەلەارناسىندا تالاي جىل تابان اۋدارماي قىزمەت ەتكەن ءالىمجان سابىرجان ۇلى جەڭىپ الدى. بۇعان قوسا تۋرنيرگە سەناتور التىنبەك نۇح ۇلى, بەلگىلى جۋرناليستەر نەسىپ ءجۇنىسباي, سادىبەك تۇگەل, شارحان قازىعۇلوۆ, تالعات ەشەن قاتىستى. اكتەرلەر قاۋىمىنان ايبولات جاۋدىر, قۋاندىق قىستىقباي, نارتاي ساۋدانبەك سىندى بارشا قاۋىمعا بەلگىلى تۇلعالار باقتارىن سىنادى.
ءىس-شارا بارىسىندا قازاقتىڭ سىي-سياپاتى دا قاتار ءجۇردى. الماتىدان ارنايى كەلگەن ارداگەر ۋايدين ەسىمدى ازامات نۇرتىلەۋ يمانعالي ۇلىنىڭ جارى قارلىعاش اپامىزدىڭ يىعىنا قازىرگى زامانعا ساي قامزول جاپتى.