اباي وبلىسىنىڭ «Tengry» قۇراما كومانداسى قىتايدىڭ شانحاي قالاسىندا وتەتىن روبوتتەحنيكا بويىنشا الەم چەمپيوناتىنا اتتاندى. وبلىس كومانداسى 18-19 مامىردا «Shanghai first challenge» حالىقارالىق چەمپيوناتىندا باق سىنايدى.
كوماندا قۇرامىندا مەكتەپ وقۋشىلارى وسمان قۋانىشبەك, تەمىرلان ابىلاحان, نۇرتورە ماقساتوۆ, الان ەرمەكباەۆ, نۇركەن تولەۋبەك, بالجان نايمانعازينا, دوسجان ءسابيت, رادمير جەڭىسبەك جانە جەتەكشى, ينفورماتيكا ءپانىنىڭ مۇعالىمى ايدوس تۇرسىنبەكوۆ بار. بۇل توپ FTC جانە FLL باعىتتارى بويىنشا بىرنەشە First Kazakstan Championship رەسپۋبليكالىق جانە حالىقارالىق چەمپيوناتتارىنىڭ جەڭىمپاز اتانعان.
– ءبىز وبلىس وقۋشىلارىنىڭ روبوتتەحنيكا بويىنشا ەڭ مىقتى حالىقارالىق كوماندالارمەن بىرگە باق سىناپ, جارىساتىندىعىن ماقتان تۇتامىز. بۇل – وقۋشىلار ءۇشىن ءوز بىلىمدەرى مەن داعدىلارىن كورسەتۋ مۇمكىندىگى عانا ەمەس, سونىمەن قاتار جاڭا ادامدارمەن تانىسۋ, تاجىريبە الماسۋ جانە يدەيالاردان شابىت الۋ مۇمكىندىگى. بۇعان دەيىن دە ءبىزدىڭ وقۋشىلار الەمدىك جانە حالىقارالىق چەمپيوناتتاردا بىرنەشە رەت ەل اتىنان ونەر كورسەتىپ, ارقاشان جەڭىسپەن ورالدى, – دەپ اتاپ ءوتتى اباي وبلىسى ءبىلىم باسقارماسىنىڭ ءباسپاسوز قىزمەتىندە.
ايتا كەتەيىك, بۇعان دەيىن اباي وبلىسى اتىنان بىرنەشە كوماندا يندونەزيا, تۇركيا, سينگاپۋر ەلدەرىندە الەمدىك, حالىقارالىق دودالارعا قاتىسقان. FIRST – جاستاردى بولاشاق سىناقتارعا دايىندايتىن ءبىلىم بەرۋ باعدارلاماسى مەن جارىستاردى قامتيتىن الەمدىك قاۋىمداستىق. FIRST مۇشەلەرى ينكليۋزيۆ كوماندالارعا بىرىگەدى, روبوتتەحنيكا جانە Steam تاپسىرمالارىن شەشەدى, يننوۆاتسيالىق جوبالار ازىرلەيدى جانە كورسەتەدى.