تالاي رەت ماسەلە رەتىندە كوتەرىلىپ, كەيدە كوپشىلىكتىڭ نارازىلىعىن تۋعىزىپ جاتاتىنىنا قاراماستان, قالامىزدا بىرىزدىلىگى جوق, ماعىناسىز ماڭدايشالار, ۇلتتىق ۇستانىممەن ۇيلەسپەيتىن جارنامالار, وراشولاق اتاۋلار تابىلىپ قالادى. وعان دىتتەگەن ماقساتىن ورىنداي المايتىن, ءوتىپ بارا جاتقان جاندى ويلانتا المايتىن, قازىنا قاراجاتىن ءتيىمسىز شاشاتىن ءالسىز الەۋمەتتىك بيلبوردتاردى دا قوسۋعا بولادى. بۇل قوعامدىق سۇراق ادامي جاۋاپكەرشىلىك پەن مەملەكەتتىك ءتىل ماسەلەسىنە بارىپ تىرەلەدى.
دەگەنمەن قازىر الماتىنىڭ ديزاين-كودىن قالىپتاستىرۋ ءىسى شىنداپ قولعا الىنا باستاعانى قۋانتادى. ويتكەنى قالا كاسىپكەرلەرى ستاندارتقا ساي كەلمەيتىن جارنامانى الىپ تاستاۋ تۋرالى ورتاق مامىلەگە كەلىپ, ماڭدايشالار مەن سىرتقى جارنامانى قالانىڭ جاڭا ديزاين-كودىنا سايكەس كەلتىرۋ جۇمىستارىن اتقارىپ جاتىر. وعان قوسا, قالالىق جوسپارلاۋ جانە ۋربانيستيكا باسقارماسىنىڭ قىزمەتكەرلەرى اۋدان اكىمدىكتەرىمەن بىرلەسىپ, جەرگىلىكتى كوممەرتسيالىق نىسانداردىڭ مەنشىك يەلەرىنە ءتۇسىندىرۋ جۇمىستارىن جۇرگىزىپ ءجۇر.
«المالى اۋدانىنىڭ ساۋدا ۇيلەرىنىڭ بىرىندەگى كاسىپكەرلەرىمەن كەزدەستىك, ولارعا بۇرىن زاڭسىز جارنامالاردى الىپ تاستاۋ تۋرالى نۇسقاۋ بەرىلگەن بولاتىن. كەيبىرى مۇنى وزدەرى اتقاردى, ال ەندى بىرىنە جاڭا نورمالاردى قوسىمشا تۇسىندىرۋگە تۋرا كەلدى. جالپى, بيزنەس وكىلدەرىنە 900-گە جۋىق حابارلاما بەردىك, ياعني بۇكىل قالانىڭ سىرتقى كەلبەتىن جاقسارتۋ جونىندەگى جۇيەلى جۇمىستى جالعاستىرامىز», دەيدى باسقارما باسشىسى نۇرلان بورانباەۆ.
وسى ارادا, تاقىرىپقا ورايلاس, 2023 جىلى جەلتوقساندا قالالىق ءماسليحات بەكىتكەن الماتىنىڭ جاڭا ديزاين-كودى ءارتۇرلى اقپاراتتى جازۋ مەن تولتىرۋعا قاتىستى قاتاڭ تالاپتار قويعانىن ەسكە سالا كەتۋ كەرەك. بۇل – ماڭدايشالار, جارنامالىق قۇرىلىمدار جانە كەز كەلگەن باسقا سىرتقى اقپارات, سونداي-اق عيماراتتاردىڭ ءبىرىنشى جانە ەكىنشى قاباتتارىنداعى تۇرعىن ۇيگە جاتپايتىن كەڭىستىكتەردىڭ تۇستەرى مەن ارلەۋ ماتەريالدارى. قىسقاسى, وسى ەلەمەنتتەردىڭ بارلىعى قاسبەتتىڭ ساۋلەتىمەن ۇيلەسىپ, عيمارات ارحيتەكتۋراسىنىڭ تۇتاستىعىن بۇزباۋى كەرەك.
ايتقانداي, ءساۋىر ايىنىڭ باسىندا «الماتى باس جوسپارى» عزي بيزنەس-قوعامداستىقتىڭ وكىلدەرىمەن بىرگە قالانىڭ ديزاين-كودى اياسىندا برەندبۋكتاردى ازىرلەۋ تاسىلدەرىنە ۇسىنىستار جيناۋ جونىندە جوبالىق سەمينار وتكىزگەنىن ايتا كەتكەن ءجون. كەزدەسۋ بارىسىندا الماتى قالاسىنىڭ ديزاين-كودى جوباسىنىڭ باس ساۋلەتشىسى تاحمينا سافوەۆا: «عيماراتتاردىڭ ءبىرىنشى جانە ەكىنشى قاباتتارىنداعى تۇرعىن ءۇي ەمەس ءۇي-جايلاردىڭ ماڭدايشالارى مەن كەز كەلگەن باسقا سىرتقى اقپارات, ءتۇس پەن ارلەۋ ماتەريالدارى قاسبەتتەردىڭ ساۋلەتتىك ستيلىنە سايكەس كەلۋگە جانە عيماراتتىڭ ساۋلەتىن قابىلداۋدىڭ تۇتاستىعىن بۇزباۋعا ءتيىس. جالپى, جەرگىلىكتى جەردىڭ ساۋلەتتىك ءانسامبلىن ۇستانۋ قاجەت», دەگەن ەدى.
جيىندا كاسىپكەرلەرگە قانداي ورىنداردا ماڭدايشالاردى ورنالاستىرۋعا جول بەرىلمەيتىنى انىق ايتىلدى. ياعني تۇرعىن ۇيگە جاتپايتىن نىساندارداعى شاتىر مەن قاسبەتتىك قوندىرعىلاردى قوسپاعاندا, ءۇي-جايعا كىرەبەرىس شەگىنەن اسۋعا, ەلەكتروندىق تابلو (شاتىر جانە قاسبەت قوندىرعىلارىن قوسپاعاندا), نە جۇگىرتپە جولداردى پايدالانۋعا, بالكونداردىڭ قورشاۋى مەن پليتالارىندا, لودجيا مەن ەركەرلەردە, ساۋلەت ەلەمەنتتەرى مەن عيماراتتىڭ كەلبەتىن جابۋعا, تەرەزە جاقتاۋلارى جانە ۆيترينالاردا, ويىقتىڭ 30%-دان استام بولىگىن جابۋعا بولمايتىنى, قاسبەتتىڭ ءبۇيىر شەگىنەن تىس جانە قاسبەت جازىقتىعىنان شىقپاۋ كەرەكتىگى, تۇرعىن ۇيلەردىڭ كىرەبەرىستەرى شەگىندە, عيماراتتى بويلاي تىك باعىتتا, كىرەبەرىستەر سانى بويىنشا ءبىر بىرلىكتەن ارتىق ماڭدايشا مەن جارناما ورناتۋعا رۇقسات بەرىلمەيتىنى ەسكەرتىلدى.
بۇگىندە الماتى ەلىمىزدىڭ مادەني وشاعى عانا ەمەس, ءىرى ساۋدا ورتالىعىنا اينالعاندىقتان, قىزمەت كورسەتۋ سالاسى دا جاقسى دامىپ جاتقان قالا دەۋگە تولىق نەگىز بار. كاسىپكەرلىك باسقارماسىنىڭ مالىمەتىنشە, تەك 2023 جىلى الماتىدا جۇمىس ىستەپ تۇرعان شاعىن جانە ورتا كاسىپورىنداردىڭ سانى 315,2 مىڭنان اسقان. ولاردىڭ كوپشىلىگى ساۋدا, تاماقتانۋ جانە قىزمەت كورسەتۋ سالاسىندا جۇمىس ىستەپ, قارقىندى دامىپ كەلەدى. بۇل ءاربىر ەكىنشى كومپانيانىڭ ءوز برەندى مەن ماڭدايشاسى بار دەگەن ءسوز.
ساۋىردەگى باسقوسۋدا كاسىپكەرلەر برەندبۋكتارعا «ماڭدايشا» جانە «كىرەبەرىس» باعىتى بويىنشا ءوز ۇسىنىستارىن بىلدىرگەن بولاتىن. «Asia beauty» سۇلۋلىق سالوندارى جەلىسىنىڭ يەسى ءاسيا ابيتاەۆا سىرتقى جارنامانى بەزەندىرۋدە بىرىڭعاي ستيل قالىپتاستىرۋ ءۇشىن تۇستەردىڭ بىرىڭعاي گامماسىن جاساۋ, ارىپتەردى ستاندارتتاۋ كاتالوگىن قۇرۋدى ۇسىندى. ال «كوسموكومەس» جشس يەسى يۋري بابيچ: «اباتتاندىرۋدىڭ بارلىق ەلەمەنتىنە «ايدەنتيكا» مەن ۇلتتىق سيمۆوليكانى ەنگىزۋدى ۇسىنامىز. بۇل ۇلتتىق ماقتانىش سەزىمىن تۋدىرادى, وتانىمىزعا دەگەن سۇيىسپەنشىلىكتى نىعايتادى», دەگەن ۇسىنىس تاستادى.
جيىندا ءسوز العان تۋريزم سالاسىنىڭ وكىلدەرى سىرتقى جارناما مەن ماڭدايشا فورماتى قالا كەلبەتى مەن تۋريست تارتۋ ماسەلەسىندە دە وزەكتى ەكەندىگىن العا تارتتى. «Evis travel» كومپانياسىنىڭ باسشىسى سۆەتلانا مينيحانوۆا ماڭىزدى مەملەكەتتىك نىسانداردى تاقىرىپتىق تۇرعىدا بەزەندىرۋدى ۇسىندى.
الماتى كاسىپكەرلەرى شاھاردىڭ ديزاين-كودى اياسىندا برەندبۋكتار جاساۋعا مۇددەلى ەكەندىكتەرىن ءبىلدىرىپ وتىر, ويتكەنى ءاربىر بيزنەس-نىسان ءۇشىن ماڭدايشا – تانىلۋدىڭ, كليەنت تارتۋدىڭ, تابىستى بولۋدىڭ ماڭىزدى ءبىر بولشەگى.
الماتى