وتانىمىز – ورتاق ءۇيىمىز
ونى ۇيىمداستىرۋ مەن وتكىزۋ جونىندەگى ۇلتتىق جوسپاردىڭ العاشقى ءىس-شاراسى باستاۋ الدى
ۋپپسالا ۋنيۆەرسيتەتىندە (شۆەتسيا, ۋپپسالا قالاسى) «ىشكى جانە مەملەكەتارالىق دەڭگەيلەردەگى ەتنوسارالىق ىنتىماقتاستىق» تاقىرىبىنداعى ءۇش كۇندىك حالىقارالىق كونفەرەنتسيا اياقتالدى. قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى ۋپپسالا ۋنيۆەرسيتەتىمەن, ازشىلىق ماسەلەلەرى جونىندەگى ەۋروپا ورتالىعىمەن بىرلەسىپ دايىندالعان كونفەرەنتسيانىڭ تەڭ ۇيىمداستىرۋشىلارىنىڭ ءبىرى بولىپ تابىلادى. بۇل كونفەرەنتسيا قازاقستان رەسپۋبليكاسى ۇكىمەتىنىڭ 2014 جىلعى 21 قاراشاداعى №1223 قاۋلىسىمەن بەكىتىلگەن قازاقستان حالقى اسسامبلەياسىنىڭ جىلىن جانە قازاقستان رەسپۋبليكاسى كونستيتۋتسياسىنىڭ 20 جىلدىعىن ۇيىمداستىرۋ جانە وتكىزۋ جونىندەگى ۇلتتىق ءىس-شارالار جوسپارىن ىسكە اسىرۋداعى العاشقى ءىس-شارا بولىپ سانالادى. كونفەرەنتسيا جۇمىسىنا قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ پروفەسسورلارى مەن عىلىمي قىزمەتكەرلەرى, قازاقستان حالقى اسسامبلەياسى عىلىمي-ساراپتامالىق كەڭەسىنىڭ مۇشەلەرى قاتىسىپ, ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق مودەلىنىڭ ءارتۇرلى قىرلارى تۋرالى قىزىقتى اڭگىمە ءوربىتتى. كونفەرەنتسيانىڭ اشىلۋىندا قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ جەتەكشىسى ا.سادۋاقاسوۆا ءسوز سويلەدى. ول ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق مودەلىنىڭ قاعيداتتارىنا جان-جاقتى توقتالىپ, ەتنوسارالىق جانە كونفەسسياارالىق قاتىناستاردىڭ جەتىستىكتەرى مەن ەرەكشەلىكتەرى تۋرالى, قازاقستان حالقى اسسامبلەياسىنىڭ الەمدە بالاماسى جوق بىرەگەي ينستيتۋت رەتىندە ەتنوساياساتتى ىسكە اسىرۋداعى ءرولى مەن جەتىستىكتەرى تۋرالى ايتتى. بايانداماشى بىرىككەن ۇلتتار ۇيىمى قازاقستان حالقى اسسامبلەياسىنىڭ مودەلىن كوپەتنوستى جانە كوپكونفەسسيالى قوعامدى باسقارۋدىڭ ءتيىمدى مودەلى رەتىندە باعالايتىندىعىن اتاپ كورسەتتى. ءبىزدىڭ دەلەگاتسيانىڭ كونفەرەنتسياعا قاتىسۋ ماقساتى – حالىقارالىق عىلىمي قاۋىمداستىق الدىندا ەتنوساياسات, ەتنوسارالىق جانە كونفەسسياارالىق قاتىناستار سالاسىنداعى قازاقستاندىق تاجىريبەنى, قازاقستاننىڭ بەيبىتشىلىك پەن كەلىسىم ساياساتىنىڭ قاعيداتتارىن تانىستىرۋ بولىپ تابىلادى. بۇل رەتتە, قازاقستان حالقى اسسامبلەياسى نەگىزگى ءرول اتقارادى. سونداي-اق, قازاقستاندىق دەلەگاتسيا ەلىمىزدە وتكىزىلەتىن ەكسپو-2017 كورمەسى بويىنشا اقپاراتتار ۇسىندى. كونفەرەنتسيادا سپيكەر رەتىندە ۇلىبريتانيا, اقش, فرانتسيا, بەلگيا, رەسەي, اۆستريا جانە ت.ب. ەلدەردىڭ جەتەكشى ساراپشىلارى مەن كورنەكتى عالىمدارى بايانداما جاسادى. حالىقارالىق كونفەرەنتسيا شەڭبەرىندە ەتنوسارالىق جانە كونفەسسياارالىق كەلىسىمنىڭ قازاقستاندىق مودەلىنە ارنالعان ارنايى پانەلدىك سەسسيا وتكىزىلدى. ونىڭ جۇمىسىنا قازاقستاندىق جانە شەتەلدىك عالىمدار قاتىستى. قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ جەتەكشىسى ا.سادۋاقاسوۆا قازاقستان حالقى اسسامبلەياسى مىسالىندا مەملەكەت پەن كوپەتنوستى قوعام اراسىندا سۇحبات قۇرۋدىڭ قازاقستاندىق تاجىريبەسىن تانىستىردى. سونىمەن قاتار, قازاقستان رەسپۋبليكاسى ءبىلىم جانە عىلىم مينيسترلىگى فيلوسوفيا, ساياساتتانۋ جانە ءدىنتانۋ ينستيتۋتىنىڭ ءبولىم مەڭگەرۋشىسى م. شايكەمەلەۆ, قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى «مەملەكەتتىڭ ساياسي ستراتەگياسى» كافەدراسىنىڭ پروفەسسورى ج.ءجۇنىسوۆا, قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ عىلىمي قىزمەتكەرى د.احاتوۆا ءسوز سويلەدى. ساۋلەبەك ءبىرجان.قولدا باردى باعالاۋ كەرەك
وسى ەلدىڭ تۇرعىنى رەتىندە قازاق ۇلتىنىڭ بۇرىنعى تاريحىنان حابارىم بار. ءوزىنىڭ سان عاسىرلىق تاريحىندا قازاقتىڭ تالاي تەپەرىشتى باستان كەشىرگەنى بەلگىلى. ونىڭ ىشىندە وتكەن عاسىرداعى جاپپاي تاركىلەۋ, سۇمدىق اشتىق جىلدارى دا, 1986 جىلعى الماتى قالاسىنداعى وقيعا دا بار. سوعان قاراماستان, قازاق حالقى عاسىرلار بويى ازاتتىقتى اڭسادى. اقىرى 1991 جىلدىڭ 16 جەلتوقسانى كۇنى اسىل ارمانىنا قول جەتكىزدى دە. قوسىمشا ايتارىم, ۇلى وتان سوعىسى جىلدارىندا ءبىر ەلدىڭ قۇرامىندا بولعان قازاق پەن بەلورۋس, باسقا دا ۇلتتار ناتسيزم سىندى قانقۇيلى ورتاق جاۋعا قارسى ءيىن تىرەسە كۇرەستى. سول ءۇشىن باسقالارمەن بىرگە قازاقتىڭ دا سان بالاسى جانىن قيدى. بىزدەر, بەلورۋستار, ەلىمىزدىڭ بوستاندىعى ءۇشىن كۇرەسكەن بارلىق ۇلت وكىلدەرىنىڭ, سونىڭ ىشىندە قازاقتاردىڭ دا ەرلىگىن ۇمىتپايمىز. مەنىڭ پايىمداۋىمشا, ەلباسىمىز نۇرسۇلتان نازارباەۆ – قازاقستان رەسپۋبليكاسىنىڭ ەگەمەندىگى مەن تاۋەلسىزدىگىنىڭ بەرىك كەپىلدىگى. وسى 23 جىل ىشىندەگى ەلىمىزدەگى اتقارىلعان جانە جۇزەگە اسىرىلىپ جاتقان بارلىق جاسامپاز ىستەردىڭ باستاۋىندا نۇرسۇلتان ءابىش ۇلى تۇر. ول ءوزىنىڭ كورەگەندىگى مەن قايسارلىعى, بىلىمدارلىعى مەن پاراساتىنىڭ كۇشىمەن ەلدىڭ ەڭسەسىن كوتەردى, ساياسي جانە ەكونوميكالىق تىعىرىقتان شىعاردى. قازىرگىدەي كۇردەلى كەزەڭدە دە ەلباسىنىڭ الار ورنى ەرەكشە. وسىنداي دانا كوشباسشىنى سىيعا تارتقانى ءۇشىن قازاق ۇلتى دا, ءبارىمىز دە ءوز تاعدىرىمىز الدىندا قارىزدارمىز. وتانىمىزداعى ۇلتارالىق جانە دىنارالىق كەلىسىم مەن تاتۋلىقتى قامتاماسىز ەتكەن مۇنداي كورنەكتى ساياسي قايراتكەر بۇگىنگى الەمدە تىم سيرەك. تاماشا تۇلعانىڭ كەلەشەكتە ادامي-تاريحي پارىزىن ابىرويمەن اتقارا بەرۋىنە تىلەكتەسپىز. ميحايل بەلياەۆ, «گرامادا» بەلورۋس ەتنومادەني بىرلەستىگىنىڭ توراعاسى, قازاقستان حالقى اسسامبلەياسى باتىس قازاقستان وبلىستىق بولىمشەسىنىڭ مۇشەسى. ورال.ىنتىماق – ءبىزدىڭ تىلەۋىمىز
وڭتۇستىك قازاقستان وبلىسىندا 3 ملن.-عا جۋىق حالىق تۇرسا, ونىڭ ىشىندە 100-دەن اسا ۇلتتار مەن ۇلىستاردىڭ وكىلى بار. سولاردىڭ ءبىرى – كورەيلەر. ءبىز قازاق حالقىنا قارىزدارمىز. ءبىزدىڭ اتا-بابالارىمىز ستاليندىك رەپرەسسيا كەزىندە قۋعىن-سۇرگىنگە ۇشىراپ, ازاپ ۆاگونىنا تيەلىپ, قازاقستانعا كەلگەنىن ۇمىتقان جوق. قازاق حالقىنا رازى ەكەندىكتەرىن بىزگە دە ايتىپ وتىراتىن. ءبىز وسىندا وتباسىن قۇردىق, تاتۋ-ءتاتتى تۇرىپ جاتىرمىز. قازاقستاننىڭ نۇرلى كەلەشەگى ءۇشىن كۇش-جىگەرىمىزدى اياماق ەمەسپىز. ەلباسى نۇرسۇلتان نازارباەۆ الەمدىك ساياساتكەر, دارا تۇلعا رەتىندە حالىق سۇيىسپەنشىلىگىنە بولەنىپ, ومىرلىك مۇراتىمەن بارىمىزگە ۇلگى بولىپ كەلەدى. مەملەكەت باسشىسىنىڭ قاشاندا وڭتۇستىكقازاقستاندىقتارعا دەگەن ىقىلاس-پەيىلى ەرەكشە. بۇل ول كىسىنىڭ وڭىرىمىزگە جاساعان ءاربىر ساپارىنان انىق بايقالادى. پرەزيدەنت وتكەن جىلدىڭ كۇزىندە, ۋاقىتىنىڭ تىعىزدىعىنا قاراماستان, وڭتۇستىككە كەلدى. شىمكەنتتىڭ كوركىنە كورىك قوسقان قوس بىردەي جاڭا مادەني نىساننىڭ اشىلۋ سالتاناتىنا قاتىسىپ, قۋانىشىمىزبەن ءبولىستى. ءوڭىرىمىزدىڭ زيالى قاۋىم وكىلدەرى, ونەر ادامدارى جانە ەتنومادەني بىرلەستىكتەرىنىڭ توراعالارىمەن پىكىر الماستى. وسى جولى ەلباسىمەن كەزدەسىپ, اڭگىمەلەسۋ باقىتىنا مەن دە يە بولدىم. ەلباسى جۇرگىزىپ وتىرعان سارابدال ساياساتتىڭ ارقاسىندا قازاقستاندا الەمگە ۇلگى بولارلىقتاي قوعامدىق كەلىسىم مەن ۇلتارالىق تاتۋلىقتىڭ ەرەكشە ءمودۋلى قالىپتاسقان. بىرلىگىمىزدىڭ ارقاسىندا ۇلكەن جەتىستىكتەرگە جەتتىك دەۋگە بولادى. سوندىقتان وسى جولى مۇمكىندىكتى پايدالانىپ, نۇرسۇلتان ءابىش ۇلىنا ەلىمىزدەگى بەيبىتشىلىك پەن بەرەكە ءۇشىن شىنايى ريزاشىلىعىمدى ءبىلدىردىم. ەلىمىز بويىنشا العاش بولىپ شىمكەنتتە ادەپ-عۇرىپ جانە سالت-ءداستۇر ورتالىعى اشىلدى. ارينە, بۇل كەزدەيسوقتىق ەمەس. ويتكەنى, بۇگىندە وڭىرىمىزدە جۇزدەن استام ەتنوس وكىلى تاتۋ-ءتاتتى ءومىر سۇرۋدە. باستىسى, ءاربىر ەتنوستىڭ ءتىلىن, ءدىلىن, سالت-ءداستۇرىن ساقتاۋ مەن وركەندەتۋگە بار جاعداي جاسالىپ وتىر. اتالعان ورتالىق وبلىسىمىزداعى ۇلتارالىق ىنتىماقتى نىعايتا تۇسەدى دەپ ويلايمىز. ءبىزدىڭ ءومىرىمىزدىڭ ءمانى – قازاقستان, ويتكەنى, ول – ءبىزدىڭ وتانىمىز. جاڭا جىل بارىمىزگە قۇت-بەرەكە اكەلسىن! روزا پاك, №45 مەكتەپ-گيمنازياسىنىڭ ديرەكتورى, شىمكەنت قالالىق ءماسليحاتىنىڭ دەپۋتاتى. وڭتۇستىك قازاقستان وبلىسى.تۇسىنىستىك – تاتۋلىقتىڭ تىرەگى
قازاقستان رەسپۋبليكاسىنىڭ تاۋەلسىزدىگىن دۇنيەجۇزىندە ەڭ ءبىرىنشى بولىپ تۇركيا مەملەكەتى تانىدى. بۇل ءبىزدەر, ياعني تاعدىردىڭ جازۋىمەن اتامەكەنىمىزدەن اۋىپ, قازاق جەرىندە تۇراقتاپ قالعان تۇرىكتەر ءۇشىن زور قۋانىش ءارى ماقتانىش. سەبەبى, ءتۇبىمىز ءبىر تۇركى حالىقتارى ەكەندىگىمىزدى سول ءبىر ۇرىمتال ساتتە مەملەكەتتەر باسشىلارى ءىس جۇزىندە دالەلدەپ بەردى. بۇگىندە سۇلەيمەن دەميرەل اتىنداعى ۋنيۆەرسيتەتتە قازاق-تۇرىك بالالارىنىڭ تەڭ ءبىلىم الىپ, ق ۇلىن-تايداي جاراسىپ جۇرگەنىن كورىپ, ەرەكشە قۋانامىن. ىشكى جان دۇنيەم تەبىرەنىپ, تولقيتىن دا ساتتەرىم بولادى. ول زاڭدى قۇبىلىس شىعار. قازاقتار ءبىزدى جاتسىنبادى. سۋىقتان توڭساق, جىلى ۇيىنە كىرگىزىپ ءبىر ءتىلىم نانىن تەڭ ءبولىپ بەردى. مۇنى قازاقتاردىڭ دارحاندىعى, باۋىرمالدىعى, قامقورلىعى دەپ ساناۋمەن شەكتەلمەي, بالالارىما, تۋىستارىما ۇنەمى ايتىپ, ارامىزداعى تاتۋلىقتىڭ دانەكەرى بولۋ داعدىعا اينالدى. قاي جەردە مەشىت اشىلسا, الدىمەن بارىپ, مۇسىلماندىق پارىزىمدى وتەيمىن. ەڭ باستىسى, قۇدايدىڭ جەردەگى ءۇيى بولىپ تا سانالاتىن ۇلكەندى-كىشىلى مەشىت قۇرىلىسى باستالعاندا اعايىندارىمنىڭ شاما-شارقىنشا كومەكتەسۋىنە مۇرىندىق بولۋ دا قالىپتاسقان ادەتىم. اللاعا شۇكىر, قازاقستان حالقى اسسامبلەياسى تۇرىك ەتنومادەني بىرلەستىگىن 20 جىلدان بەرى باسقارىپ كەلەمىن. نەگىزگى ۇستانىمىم – تاتۋلىقتى ساقتاۋ. تاعى ءبىر ايتا كەتەر جايت جەتىسۋ جەرىندە 103 ەتنوس وكىلى تاتۋ-ءتاتتى تۇرامىز. زامانداستارىممەن سىرلاسا قالسام, اركىمنىڭ تاعدىرى ارقيلى. ءبارى دە ارىپ-اشىپ الىستان كەلگەندە قازاقتاردىڭ كورسەتكەن قامقورلىعىنا ريزا. سوندىقتان قازاقتىڭ «قۋانىشتى بولىسسە كوبەيەدى» دەگەن جاقسى ءسوزىن تىلگە تيەك ەتە وتىرىپ, قازاقستان رەسپۋبليكاسىنىڭ بارشا ازاماتىن جاقىندا عانا تابالدىرىقتان اتتاعان جاڭا جىلمەن قۇتتىقتايمىن! شاحيسمايل اسيەۆ, قازاقستان حالقى اسسامبلەياسى الماتى وبلىستىق تۇرىك ەتنومادەني بىرلەستىگىنىڭ توراعاسى. الماتى وبلىسى.قابىلەت پەن مۇمكىندىككە ءورىس كەڭ
مەنىڭ تۇيسىك قابىلداۋىمدا, قازاقستان تاۋەلسىزدىگىنىڭ تىرەگى ەلباسى نۇرسۇلتان نازارباەۆتىڭ حالقىمىزعا ارناعان جولداۋلارىنان قۋات الادى. مەملەكەتتىڭ الدىنا ۇلان-عايىر ءارى ورىندالۋى كۇمانسىز مىندەتتەر قويىلاتىن وسىناۋ قۇندى قۇجاتتاردىڭ كەز كەلگەنى ەلدەگى تۇراقتىلىق, حالىق دوستىعى, كوپۇلتتى قوعامنىڭ الاڭسىز تىرشىلىگى, ورتاق بولاشاق يدەيالارىن اسپەتتەۋدەن باستالاتىنى عانيبەت. بيىلعى جولداۋدا: «قاجىرلى ەڭبەكتى قاجەت ەتەتىن, كەلەشەگى كەمەل نۇرلى جولدا بىرلىگىمىزدى بەكەمدەپ, ايانباي تەر توگۋىمىز كەرەك. ماڭگىلىك ەل – ەلدىڭ بىرىكتىرۋشى كۇشى, ەشقاشان تاۋسىلماس قۋات كوزى», دەپ اتاپ كورسەتىلدى. ويعا قالدىردى, جىگەر تاسىتتى. ويتكەنى, مۇنداي مىندەتتەردى العا قويۋ – ادامزاتتىڭ ارمانى. ەڭ باستىسى – ۇلى ماقساتىمىز بار. مەنىڭ اكەم ءالي قازاق جەرىنە, وزىمەن مۇڭداس باۋىرلارىمەن بىرگە 1944 جىلدىڭ 23 اقپانىندا كۇشتەپ قونىس اۋدارىلعان ەكەن. 1 ماي كولحوزىندا قاراپايىم جۇمىسشى بولدى. وسىندا ۇيلەنىپ, انامىز ەكەۋى 12 بالا تاربيەلەدى. «ءبىز بەرىك دوستىقتى, ادال ەڭبەكتى باعالايتىن ەلدە ءومىر سۇرۋدەمىز. وسىنى ۇنەمى ەستە ساقتاڭدار. قازىرگى ەڭبەكتەرىڭ – جاقسى وقۋ», – دەپ وتىراتىن اكەمىز. اكە اماناتىن ورىنداعاندايمىز, ءبارىمىز جوعارى ءبىلىم الدىق. ەل تاۋەلسىزدىگىنىڭ كۋاسى بولدىق, ونىڭ تۇعىرلانۋىنا ۇلەس قوسۋدى مۇرات سانادىق. تاۋەلسىزدىك ەل ازاماتتارىنىڭ قابىلەتىن ۇشتاپ, قارىمىن تانىتۋعا ءمۇمكىندىك جاسادى. الدىمەن «ءالي» دەگەن دۇكەن اشتىق. بىرتە-بىرتە قۋاتتانىپ, شارۋاشىلىق كووپەراتيۆىن ۇيىمداستىردىق. ىنتىماقتى ەڭبەكتىڭ, مەملەكەتتىڭ تىلەكتەستىك نيەتى مەن كومەگىنىڭ ارقاسىندا قازاقتىڭ اق باس سيىرلارىن وسىرەتىن «بالقاشىن» اسىل تۇقىمدى مال زاۋىتى» جشس اتى ەلىمىزگە كەڭىنەن ءمالىم بولدى. ءىنىم ءشارىپ باسقاراتىن شارۋاشىلىقتا 2000 باس ءىرى قارا كۇتىمگە الىنىپ, ەكسپورتقا «ءمارمار ەت» شىعارىلۋدا. بيىلعى جىلى تابىنىمىز 580 باس كانادالىق جوعارى ونىمدىلىكتەگى «انگۋس» تۇقىمدى مالمەن تولىقتى. شەتەلدىك سيىرلاردان ءتول الىنىپ, ارقا جاعدايىنا جەرسىنىپ ۇلگەرىلدى. تاۋلىگىنە 1300 گرامنان سالماق قوساتىن تولدەردى 21 ايدان كەيىن 750-800 كەلى سالماقپەن اۋكتسيوندىق ساۋداعا قوسۋدامىز. ءبىزدىڭ كومپانيانىڭ قاراۋىنداعى «ساندىقتاۋ-استىق» جشس ەگىنشىلىكپەن قاتار, ءونىمدى كوپسالالى وڭدەۋمەن اينالىسادى. مۇنداعى جۇمىسقا ءوزىم جاۋاپتىمىن. سەرىكتەستىك ديىرمەنى تاۋلىگىنە 70 توننا استىقتى وڭدەپ, 50 توننا ساپالى ۇن اقتايدى. ونىمدەرىمىز رەسپۋبليكامىزدان تىسقارى جەرلەرگە دە ەكسپورتتالۋدا. قازىرگى ناۋبايحانامىز تاۋلىگىنە 3000 بولكە ناندى تۇتىنۋشىلارعا ۇسىنادى. ەندى ءوندىرىستى قۋاتتاندىرۋ ماقساتىمەن, جاڭا ناۋبايحانا سالۋدامىز. وعان 48 ميلليون تەڭگە ينۆەستيتسيا قۇيىلدى. سونداي-اق, اتباسار قالاسىندا 850 ميلليون تەڭگەگە باعالانعان جوبامەن ەلەۆاتور قۇرىلىسىنا كىرىسىپ وتىرمىز. ەڭبەكتىڭ ءورىس كەڭەيتەتىنىنە مىسال رەتىندە ىنىلەرىم دوگا ءالي ۇلىنىڭ «جاباي», گيلانيدىڭ «اگروشانس» جاۋاپكەرشىلىگى شەكتەۋلى سەرىكتەستىكتەرىن, تاعى ءبىر باۋىرىم يۋنادي اۆتوسەرۆيس جانە تەحنيكالىق باقىلاۋ ستانساسىن ۇستاپ وتىرعانىن, ۇلىم بيسلان ەكسپورتتىق جۇمىستاردى ۇيلەستىرەتىنىن, زايىبىم تويتا يساقىزى ناۋبايحانا ىسىمەن اينالىساتىنىن ايتۋعا بولادى. اۋدانىمىزدىڭ چەشەن-ينگۋش ەتنوسىندا 1500-گە جۋىق ادام بار. بىراق, ءبىز كاسىپورىندارىمىز ورنالاسقان اۋىلدار تۇرعىندارىنىڭ شات-شادىمان تۇرمىسىنا مۇددەلىمىز. ول جىل سايىن الەۋمەتتىك سالاعا 100 ميلليون تەڭگەدەن استام قارجى بولىنەتىندىگىنەن دە كورىنەدى. ءسوز سوڭىندا, ەلىمىزدىڭ باس گازەتى ارقىلى بارشا وتانداستارىمدى ەندى عانا ەسىك اشقان جاڭا جىلمەن قۇتتىقتاپ, ماڭگىلىك ەلگە بىرگە جەتەيىك!» دەگەن تىلەگىمدى بىلدىرگىم كەلەدى. اتلان دوكاەۆ, سەرىكتەستىكتەر توبىنىڭ قۇرىلتايشىسى. اقمولا وبلىسى, ساندىقتاۋ اۋدانى. سۋرەتتى تۇسىرگەن ەرمۇرات دوسىموۆ.