اسكەري الەۋەت – الەم ەلدەرى ءۇشىن ماڭىزدى ولشەم. تىنىشتىق پەن تۇتاستىقتىڭ قالقانى – قارۋلى كۇشتەر. شەكارا شەبىن شەگەندەپ, اۋە – تەڭىز تورابىن تابان اۋدارماي تورۋىلداپ, قورعاۋ – بەيبىتشىلىك بەسىگى شايقالىپ تۇرعان جاھان جاعدايىندا سالماقتى مىندەت.
ۇلى دالا باتىرلارىنىڭ ەنشىسىنە بۇيىرعان ەرلىك ءىس پەن وتانعا قورعان بولۋ ەركىن قازاق ەرلەرى ەڭسەرىپ كەلەدى. بيىل قارۋلى كۇشتەردىڭ قۇرىلعانىنا – 31 جىل. ءۇش ون جىلدىقتان اسا ۋاقىتتا قازاقستان قارۋلى كۇشتەرى ماتەريالدىق-بازالىق, اسكەري-الەۋمەتتىك, قۇرىلىمدىق ءارى يدەولوگيالىق تۇرعىدا نىق ادىمدار جاسادى. بيىل Global Firepower الەمدىك اسكەري كۇشتى انىقتايتىن رەيتينگتە ەل اسكەرى 138 ەلدىڭ ىشىندە 63 ورىنعا تۇراقتادى. بۇل ءتىزىمدى ساراپشىلار 60 ءتۇرلى فاكتوردى, ونىڭ ىشىندە, مەملەكەتتىڭ قورعانىسقا جۇمسالاتىن شىعىندار دەڭگەيىن, تەحنيكالار جانە جابدىقتار ارسەنالىن, ارميا سانىن, تانكتەر, كورابلدەر مەن ۇشاقتار سانىن, ارميانىڭ جاۋىنگەرلىك قابىلەتتىلىگىنە اسەر ەتەتىن رەسۋرستاردى باعالادى.
قازاقستان قارۋلى كۇشتەرى اسكەري قىزمەتكە تەلىنگەن ستەوروتيپتەردى سىندىرىپ, شىنايى وتان قورعاۋعا بەيىلدى ازاماتتاردىڭ ارتۋىنا دەن قويىپ جاتىر. وسى قاتارداعى قوعامنان قولداۋ تاپقان وڭ وزگەرىس مەرزىمدى قىزمەتتى وتەۋگە شاقىرتۋ ناۋرىز-ماۋسىم, قىركۇيەك-جەلتوقسان ايلارىندا ەكى رەت جۇزەگە اسىرىلادى. مىندەتىن وتەۋشى ساربازدار قىزمەتى تولىق اياقتالعان سوڭ, كەلەسى لەك پارىزىن ورىنداۋعا شاقىرىلادى. بۇل شەشىم اسكەردەگى الىمجەتتىك تۋرالى كەلەڭسىز ويلاردىڭ تارالۋىن تۇساۋلايدى. سونداي-اق جىگىتتەردىڭ وتان الدىنداعى بورىشىن وتەۋگە دەگەن ىنتاسىن ارتتىرۋ ماقساتىندا ولاردىڭ بانك الدىنداعى بەرەشەگىن ۋاقىتشا توقتاتۋ, تەمىردەي ءتارتىپ, ۇلگىلى مىندەت اتقارۋشىعا جوو-عا گرانت ۇسىنۋ قاعيدالارى دا قاتارداعى ساربازداردىڭ ساپىن قالىڭداتۋعا سەپ بولىپ وتىر.
ءبىز مەملەكەت مەجەلەگەن وسى ميسسيالاردىڭ ورىندالۋ بارىسىن قر قورعانىس مينيسترلىگى 68 665 ەرەكشە ماقساتتاعى اسكەري بولىمگە بارىپ بايقاپ قايتتىق.
68 665 ەرەكشە ماقساتتاعى اسكەري ءبولىمنىڭ نەگىزگى مىندەتتەرىنىڭ ءبىرى – استانا قالاسىنداعى قوعامدىق ءتارتىپتى ساقتاۋ.
ەرەكشە ماقساتتاعى بريگادانىڭ قۇرىلۋ تاريحىن بولىمشە كومانديرىنىڭ تاربيە جانە يدەولوگيالىق جۇمىس جونىندەگى ورىنباسارى, پودپولكوۆنيك تالعات قۇلمانوۆ بايانداپ بەردى.
«ەرەكشە ماقساتتاعى بريگادا 2003 جىلى جەكە دەسانتتىق شابۋىلداۋشى باتالون بولىپ قۇرىلدى. ەلوردانىڭ اكىمشىلىك-اۋماقتىق ۇلعايۋىنا, قارۋلى كۇشتەردەگى شتاتتىق وزگەرىستەرگە سايكەس بريگادا كەيىننەن دەسانتتىق شابۋىلداۋشى بريگادا بولىپ قۇرىلدى. 2023 جىلى دەسانتتىق شابۋىلداۋشى اسكەرلەرىنىڭ قۇرلىق اسكەرلەرى قۇرامىنان شىعۋىنا بايلانىستى اسكەري ءبولىم ەرەكشە ماقساتتاعى بريگادا بولىپ قايتا اتاۋىن وزگەرتتى», دەدى تالعات قۇلمانوۆ.
68 665 ەرەكشە ماقساتتاعى اسكەري ءبولىم قۇرامىندا - مينومەتتىك باتارەيا, بارلاۋ روتاسى, اۋە-قورعانىس باتارەياسى, قۇرمەت قاراۋىل روتاسى بار.
«ارناساي» شابۋىلداۋشى باتالونى 2 اپتا بۇرىن جاس ساربازدارمەن تولىعىپتى. ولار اسكەري مىندەتىن ورىنداۋعا استانا قالاسىنان بولەك 3 وبلىستان شاقىرىلعان. جاس ساربازداردى اسكەري ومىرگە بەيىمدەۋ پروتسەسى قارقىندى جۇرگىزىلىپ جاتىر.
ءبىز اسكەري بولىمگە بارعان كۇنى جاس ساربازدار قولدارىنداعى قارۋلارىن العاش رەت قولدانىپ, قارۋدان نىسانانى كوزدەۋ بويىنشا اتۋ وقۋ-جاتتىعۋىن وتكىزدى.
قاتارداعى جاۋىنگەر ءبىرجان قۇتتىباي العاشقى جاتتىعۋدا-اق دالدىگىمەن كوزگە ءتۇستى.
«قولىمداعى قارۋ اكس -74-تەن بۇگىن ءبىرىنشى رەت اتۋ جاتتىعۋىن جاسادىم. اتۋ بارىسىندا بىزگە 9 وق بەرىلدى, ونىڭ تورتەۋىن ءدوپ تيگىزدىم. بويىمدا ەشقانداي قورقىنىش بولمادى, ەلدىڭ تىرەگى بولاتىن ەر ازاماتتاردىڭ وسى سەزىمدى جەڭۋى ماڭىزدى دەپ ويلايمىن», دەدى جاس سارباز.
68 665 ەرەكشە ماقساتتاعى اسكەري ءبولىم كازارماسىنا كەلگەندە تالعات جولدىباي ۇلى ساربازداردىڭ كۇن ءتارتىبىن تانىستىردى. پودپولگوۆنيكتىڭ ايتۋىنشا, اسكەرگە جاڭا كەلگەن جىگىتتەردى وزگەرىسكە بەيىمدەۋ ىسىنە ءمان بەرۋ ماڭىزدى.
«جاس ساربازداردى اسكەري ومىرگە تەز ۇيرەتۋ ماقساتىندا 1 اي كولەمىندە جيىن وتكىزىلەدى. جيىننىڭ باستىعى بولىپ ءوزىم تاعايىندالدىم, بريگادا كومانديرىنىڭ ورىنباسارى. باتالون كومانديرى ءبىر ساتىعا تومەندەتىلىپ روتا كومانديرى بولدى, روتا كومانديرلەرى دە وسى ۇردىسپەن ۆزۆود كومانديرلەرى بولدى. بۇل جاس ساربازدارمەن تىعىز قارىم-قاتىناستا بولا وتىرىپ اسكەرگە تەزىرەك قالىپتاسۋىنا ىقپال ەتەدى», دەدى تالعات قۇلمانوۆ.
68 665 ەرەكشە ماقساتتاعى اسكەري ءبولىم قاتارىنا ءوز ەركىمەن كەلگەن سارباز ەلدار ءسۇيىنباي دا بار. ول اسكەرگە كەلىپ وسى باعىتتا ايتىلىپ جۇرگەن سىن-پىكىرلەر ءىس-جۇزىندە قاراما-قايشىلىق تۋدىراتىنىن ايتتى.
«اسكەردەن العان اسەرىم باستاپقى ويلاعانىمداي ەمەس. قوعامدا قالىپتاسقان ستەوروتيپتەرگە سەنە بەرۋگە بولمايتىنا كوزىم جەتتى. ەرەكشە ماقساتتاعى بريگادا اسكەري دايىندىق جۇمىسىن ناقتى ءتۇسىندىرىپ جاتىر. مەنى قاتارلاستارىمنىڭ بارلىعى ءوز ەركىمەن كەلگەنى تاڭداندىرماي قويمادى. قازىر اسكەري انت قابىلداۋعا دايىندىق جۇمىستارى جۇرگىزىلىپ جاتىر. ارناۋلى دەمالىس ۋاقىتتارى بار. بۇل كەزدە ءبىز, جاس ساربازدار ۇستەل ۇستىندە وينايتىن ينتەللەكتۋالدىق ويىندارمەن شۇعىلدانىپ, ءتىپتى, ءان سالامىز, گازەت تە وقيمىز, سپورتتىق تەلەباعدارلاما دا كورەمىز», دەدى ەلدار ءسۇيىنباي.
ەلدار اسكەرگە دەيىن استانا قالالىق قۋىرشاق تەاترىندا ءارتىس بولىپ قىزمەت اتقارعان. ونەرلى جىگىتتەر قالىپتى ومىردەگى كۇندەرىن ەسكە الىپ, مەرەكە قارساڭىندا ءان-سالەم جولدادى.
68 665 ەرەكشە ماقساتتاعى اسكەري ءبولىم ساربازدارىنا اپتانىڭ سەنبى-جەكسەنبى كۇندەرى ارنايى پلانشەتپەن اتا-انالارىمەن بەينەبايلانىس ورناتۋعا رۇقسات ەتىلگەن.