قوستاناي. 9 قاڭتار. قوستاناي وبلىستىق قىلمىستىق ىستەر جونىندەگى مامانداندىرىلعان سوتتا جەتى جاسار ۆيكتوريا گانيانىڭ ولىمىنە بايلانىستى قىلمىستىق ءىستى الدىن الا تىڭداۋ ءوتتى. بۇل تۋرالى ng.kz حابارلادى.
60 تومنان تۇراتىن ءىستىڭ العاشقى تىڭداۋى جابىق جاعدايدا ءوتتى. رۋدنىي قالاسىنداعى 7 جاسار ۆيكا گانيانى زورلاپ, ودان كەيىن ولتىرگەن دەنيس لەسيكوۆتى سوت زالىنا كۇشەيتىلگەن كۇزەتپەن الىپ كىردى. ونىڭ جاسى 31-دە, اقىل-ەسى دۇرىس, قوستاناي قالاسىنىڭ تۇرعىنى. ادەتتە, سوتتالۋشىنىڭ ءىستى القا بيلەردىڭ قاتىسۋىمەن جۇرگىزۋدى سۇراۋعا مۇمكىندىگى بار. بىراق لەسنيكوۆ ونى سۇراعان جوق. قىلمىستىق ءىس سۋديا ەرلىك سەراليننىڭ توراعالىق ەتۋىمەن جۇرگىزىلەدى. سوتتىڭ العاشقى ءماجىلىسى 26 قاڭتارعا بەلگىلەندى.
ەسكە سالا كەتسەك, 2014 جىلى 24 ساۋىردە رۋدنىي قالاسىنداعى 7 جاسار ۆيكتوريا گانيا ءىز-ءتۇزسىز جوعالىپ, ءبىر ايدان كەيىن ونىڭ ءمايىتى تابىلعان بولاتىن. ءبۇلدىرشىن قىزدىڭ جوعالۋى بۇكىل وبلىس حالقىن ابىرجىتتى. ونى ىزدەۋگە مىڭداعان ۆولونتەرلەر, پوليتسەيلەر, تۇرعىندار, توتەنشە جاعداي دەپارتامەنتى قىزمەتكەرلەرى مەن اسكەريلەر قاتىستى. بۇكىل ەلدى شۋلاتقان بۇل قىلمىسقا قاتىستى قوستانايلىق پوليتسەيلەردىڭ كاسىبي بىلىكتىلىگىنە سىن ايتىلعانى بەلگىلى. قىز بالانىڭ ءمايىتىن ۆولونتەر ۆلاديمير رادچەنكو تاۋىپ العان بولاتىن. مەديتسينالىق ساراپتاۋدان كەيىن ۆيكانىڭ باسىنا تيگەن سوققىدان قازا بولعانى انىقتالدى. ءبۇلدىرشىندى ولتىرگەن قىلمىسكەر وسى كۇنگە دەيىن ءىزىن جاسىرىپ كەلدى. ونى ىزدەۋ بارىسىندا 19 جاسار مۇگەدەك ۆلاديمير پىجوۆ ۇستالعان بولاتىن. وبلىستىق پروكۋراتۋرانىڭ مالىمەتىنشە, مۇگەدەك جىگىتتىڭ بۇل وقيعاعا قاتىسى بولماي شىقتى.
ايىپتالۋشى دەنيس لەسيكوۆقا ءتورت رەت ادام ءولتىردى, ەكى رەت جاسوسپىرىمدەردى زورلادى دەگەن ايىپ تاعىلىپ وتىر. ول ءجاسوسپىرىم قىمبات مۇقاتوۆانى, قوستاناي قالاسىنىڭ تۇرعىندارى ءابدىلدينا مەن پوليانيچكونى ولتىرگەن. مۇقاتوۆا مەن پوليانيچكو ءىز-ءتۇزسىز جوعالىپ كەتكەن, ءابدىلدينانىڭ ءىسى اشىلماعان. ازعىننىڭ سوڭعى قۇربانى رۋدنىي قالاسىنداعى 7 جاسار ۆيكتوريا گانيا بولىپتى. دەنيس لەسيكوۆتى كۋالاردىڭ بارلىعى دا تانىماعان, بىراق دنك ونىڭ قىلمىسقا قاتىستىلىعىن بۇلتارتپاي وتىر.
ءنازيرا جارىمبەتوۆا.
دەرەك, سۋرەت: ng.kz.