Amicorp كومپانيالار توبى ءوڭىردىڭ باس قارجى حابى – «استانا» حالىقارالىق قارجى ورتالىعىندا (احقو) ءوز كەڭسەسىن اشتى. Amicorp – كورپوراتيۆتىك باسقارۋ, قارجى نارىقتارى جانە قورلاردى اكىمشىلەندىرۋ قىزمەتتەرىنىڭ العاشقى جاھاندىق جەتكىزۋشىسى, دەپ جازادى Egemen.kz.
استاناداعى Amicorp كەڭسەسى ەندى شىعىس پەن باتىس, كاۆكاز بەن ەاەو, تاياۋ شىعىس پەن ەۋروپا قيىلىسىندا ورنالاسقان ستراتەگيالىق ماڭىزدى ءبىزدىڭ ەلدە تۇراقتاپ, جۇمىس ىستەۋگە نيەت بىلدىرگەن كاسىپكەرلەر مەن كاسىپورىندارعا جەرگىلىكتى قولداۋدى كوزدەپ وتىر. Amicorp ەندى حالىقارالىق دەڭگەيگە شىعۋدى قالايتىن قازاقستاندىق كومپانيالارعا ترانسشەكارالىق قىزمەتتى جولعا قويۋعا جانە ءتيىمدى زاڭ قۇرىلىمدارىن قۇرۋعا كومەكتەسىپ, قولداۋ كورسەتە الادى دەپ كۇتىلۋدە.
«استانادا كەڭسەنىڭ اشىلۋى Amicorp ءۇشىن ماڭىزدى كەزەڭ بولىپ سانالادى, وسىندا بولا وتىرىپ ءبىز قارقىندى دامىپ كەلە جاتقان ورتالىق ازيا ەكونوميكاسىنىڭ ينۆەستيتسيالىق مۇمكىندىكتەرىن پايدالانعىسى كەلەتىن تۇتىنۋشىلارعا جاقسىراق قولداۋ كورسەت الاتىن بولامىز», دەپ پىكىر ءبىلدىردى Amicorp كومپانيالار توبى, تمد بويىنشا ساتۋ ءبولىمىنىڭ باسشىسى سەرحيو حيرونەللا .
ونىڭ ايتۋىنشا, قازاقستان جاڭا جىبەك جولى باستاماسىنىڭ باسىندا تۇر, ويتكەنى قازىرگى ۋاقىتتا قىتاي مەن ورتالىق ازيادان ەۋروپاعا ەكسپورتتالاتىن تاۋارلاردىڭ 80%-دان استامى وسى ەل ارقىلى وتەدى.
«بۇل ۇلكەن ينۆەستيتسيالىق مۇمكىندىكتەردى ۇسىناتىن ارتىقشىلىعى بار يۋريسديكتسيا رەتىندە ينفراقۇرىلىمنىڭ, نورماتيۆتىك-قۇقىقتىق بازانىڭ جانە ەكونوميكالىق امبيتسيانىڭ ايتارلىقتاي دامۋىنا اكەلدى», دەيدى سەرحيو حيرونەللا.
قازاقستان تابيعي رەسۋرستارعا, اسىرەسە مۇناي مەن تابيعي گازعا, كومىر سەكىلدى پايدالى قازبالارعا باي ەل بولا وتىرىپ, ورتالىق ازياداعى ەڭ جوعارى ەكونوميكالىق وسىمگە جەتىپ قانا قويماي, تىكەلەي شەتەلدىك ينۆەستيتسيالاردى دا قىزىقتىردى. ونىڭ ايماقتىق جانە جاھاندىق كوممەرتسيالىق ورتالىق رەتىندە ءوسۋى اۋىل شارۋاشىلىعى, تەحنولوگيا جانە اسىرەسە قارجى سياقتى باسقا سەكتورلاردى ءارتاراپتاندىرىپ, دامىتۋعا اكەلدى.
ەلدە الەمدىك دەڭگەيدە دامىپ جاتقان قارجى حابى – «استانا» حالىقارالىق قارجى ورتالىعى بار, ول ارنايى سالىق رەجيمدەرى مەن تاۋەلسىز قارجىلىق ەرەجەلەردەن باستاپ جەڭىلدىكتى ۆيزالار مەن ەڭبەك جاعدايلارىنا دەيىن شەتەلدىك ينۆەستيتسيالاردى تارتۋعا جانە ەلگە حالىقارالىق كاپيتال نارىقتارىمەن ينتەگراتسيالانۋعا كومەكتەسۋ ءۇشىن قور نارىعىن قۇرۋعا باعىتتالعان بىرقاتار ىنتالاندىرۋلاردى ۇسىنادى.
Amicorp كومانداسى استاناداعى جاڭا كەڭسەسىنەن ءارتۇرلى اكىمشىلىك قىزمەتتەردى, سونىڭ ىشىندە زاڭدى قىزمەتتەردى قۇرۋ, كورپوراتيۆتىك حاتشى قىزمەتتەرى, سالىق جانە بۋحگالتەرلىك قىزمەتتەر, بانكتىك شوتتار اشۋ جانە باسقا دا اكىمشىلىك مىندەتتەردى قوسا العاندا, كورپوراتيۆتىك باسقارۋمەن بايلانىستى اكىمشىلىك قىزمەتتەردى ۇسىنادى. كوماندا الداعى ايلاردا باسقا قىزمەتتەردى قوسۋدى جوسپارلاپ وتىر.
استاناداعى جاڭا كەڭسە قازاقستاندىق كومپانيالارعا Amicorp كەڭسەلەرىنىڭ حالىقارالىق جەلىسىن پايدالانۋعا جانە ولاردىڭ جەرگىلىكتى نارىقتار تۋرالى بىلىمدەرىن الۋعا مۇمكىندىك بەرەدى.ء«بىزدىڭ ماقساتىمىز — قازاقستاننىڭ ءار قالاسىندا ورنالاسپاساق تا, بۇكىل ەل بويىنشا بيزنەستى قولداۋ جانە احقو-نىڭ جەتەكشى قارجى ورتالىعى رەتىندە دامي بەرۋىنە ءوز ىقپالىمىزدى تيگىزۋ», - دەدى حيرونەللا مىرزا.