«دەنەسىن چەمودانعا سالىپ, ءشول دالاعا اپارىپ تاستاعان». دۋبايدا قايتىس بولعان قازاق ايەلىنە قاتىستى سوت وتىرىسى باستالدى

سوت تەرگەۋى جابىق تۇردە ءوتىپ جاتقانىن ەسكەرە وتىرىپ, وقيعانىڭ قىسقاشا مازمۇنىن ۇسىنىپ وتىرمىز. زاڭ بويىنشا كەيبىر مالىمەتتەر جاريا ەتۋگە جاتپايدى. 

2017 جىلدىڭ سوڭىندا الماتىلىق انەل (اتى وزگەرتىلدى) كورپوراتيۆتىك كەشتە ارىپتەسىمەن تانىسادى. زاڭگەردىڭ ايتۋىنشا, ولار ءارتۇرلى ۇيىمداردا جۇمىس ىستەگەنىمەن, ءبىر عيماراتتا جۇرگەن. قىز بەن جىگىتتىڭ اراسىندا دوستىق قارىم-قاتىناس باستالعان. ەر ادام ۇيلەنگەن بولىپ شىعادى. اقىرىندا, ۇزاق قارىم-قاتىناستان كەيىن ول قىزدى سەرۋەندەۋ ءۇشىن تاۋعا الىپ كەتەدى جانە سول جەردە جىنىستىق زورلىق جاسايدى. وسىدان كەيىن قىز جىگىتتىڭ ۇستىنەن ارىز جازىپ, وقيعاعا بايلانىستى قىلمىستىق ءىس قوزعالادى.

وسى وقيعالاردان كەيىن انەل بىرىككەن اراب امىرلىكتەرىنە كەتەدى. بويجەتكەن دۋبايداعى بەس جۇلدىزدى قوناقۇيلەردىڭ بىرىنە جۇمىسقا ورنالاسادى. 

«قىز وتە ءبىلىمدى, ەكى جوعارى ءبىلىمى بار, اعىلشىن ءتىلىن جوعارى دەڭگەيدە مەڭگەرگەن. ول جۇمىسقا ورنالاسۋ تۋرالى اڭگىمەلەسۋدەن وڭاي ءوتتى, ونىمەن كەلىسىمشارت جاسالدى. قىزمەت كورسەتۋ سالاسىندا جۇمىس ىستەۋ ءۇشىن مەديتسينالىق كوميسسيادان, مەديتسينالىق تەكسەرۋدەن, اڭگىمەلەسۋدەن, تەستىلەۋدەن ءوتتى. مىنە, ول سوندا جۇمىسقا ورنالاستى, كەتىپ قالدى بىراق ودان كەيىن بايلانىسقا شىقپادى», دەيدى ادۆوكات.

كەيىنىرەك انەل Instagram جەلىسىندە ءوزىنىڭ گەولوكاتسياسىن بەلگىلەپ, سۋرەتىن جاريالايدى. ناتيجەسىندە ەر ادام قىزدىڭ ىزىنە تۇسەدى. 

عالىم نۇرپەيىسوۆتىڭ ايتۋىنشا, 2019 جىلى ەر ادام انەلدى الەۋمەتتىك جەلىدە گەولوكاتسيا ارقىلى باقىلاپ, وعان قوقان-لوققى حابارلامالار جازا باستاعان.

«ەر ادام قىزدى ولتىرگىسى كەلگەن, ول Instagram-دا: «نە سەن قايتىپ كەلەسىڭ, نە ارى قاراي ءومىر سۇرمەيسىڭ» دەپ جازكدى, قىز ورالۋدان باس تارتقاننان كەيىن ول ءوزى ءباا-عا بارعان», دەدى ادۆوكات.

ەسكى تانىسىنىڭ ىزىنە تۇسكەنىن بىلگەن بويجەتكەن تۋىستارى مەن ءباا-دەگى قازاقستان كونسۋلدىعىنا حابارلاسقان.

«ول قازاقستان كونسۋلدىعىنا بۇل ادامنىڭ قاۋىپ توندىرەتىنىن ايتىپ, قورقاتىنىن ايتتى»,  دەدى.

ادۆوكاتتىڭ ايتۋىنشا, قۋعىنشى دۋبايعا ۇلكەن بوس چەمودانمەن ۇشىپ كەلگەن.

«ەر ادام قىزدىڭ ىزىنە ءتۇسىپ, ول جۇمىس ىستەيتىن قوناقۇيدەگى پاتەرىنە كىرىپ قىزدى ولتىرەدى. ءمايىتتى چەمودانعا سالىپ, جالدامالى كولىكپەن ءشول دالاعا اپارىپ تاستاعان», دەدى ادۆوكات.

قىزدىڭ دەنەسىن جەرگىلىكتى تۇرعىندار 2019 جىلدىڭ 18 ساۋىرىندە تاۋىپ الىپ, پوليتسياعا حابارلاعان.

«وسىدان كەيىن پوليتسيا كەلىپ, ساراپتاما جۇرگىزىلدى, ءولىمنىڭ سەبەبى انىقتالدى. بىرىككەن اراب امىرلىكتەرىنىڭ تەرگەۋشىلەرى قىلمىستىڭ قاساقانا جاسالعانىن انىقتادى», دەدى ادۆوكات.

ول مارقۇمنىڭ دەنەسىن تاسىمالداۋ ءۇشىن شامامەن 25 مىڭ دوللار قاجەت بولعانىن اتاپ ءوتتى. انەلدىڭ تۋىستارىندا قاجەتتى سوما بولماعاندىقتان, ونى كرەماتسيالاپ, ك ۇلى قازاقستانعا جەتكىزىلدى. سوندىقتان سوت-مەديتسينالىق ساراپتامانى ءباا-ءنىڭ جەرگىلىكتى بيلىگى عانا جۇرگىزە الدى.

تەرگەۋشىلەردىڭ ايتۋىنشا, قىلمىس جاسالعاننان كەيىن كەلەسى كۇنى ايىپتالۋشى قازاقستانعا ورالىپ, جاسىرىنىپ ۇلگەرگەن. ءتارتىپ ساقشىلارى ونى ۇزاق ىزدەدى. وسى ۋاقىت بويى بۇل ءىستى دۋباي پوليتسياسى تەرگەپ جاتقان.

زارداپ شەككەن تاراپتىڭ ادۆوكاتى عالىم نۇرپەيىسوۆتىڭ ءوزى دۋبايعا بارىپ, وقيعا ورنىنا جانە قازا تاپقان قازاقستاندىق ايەلدىڭ دەنەسى تابىلعان جەرگە بارىپ, جەرگىلىكتى تەرگەۋشىلەرمەن سويلەسكەن.

كۇدىكتىنى ۇزاق ىزدەستىرۋ جانە تەرگەۋ ارەكەتتەرىنەن كەيىن 2024 جىلدىڭ ناۋرىز ايىنىڭ سوڭىندا دۋبايدا قازاقستاندىق ايەلدى ءولتىرۋ ءىسى الماتى سوتىنا جىبەرىلدى. 

«مارقۇمنىڭ اناسىنىڭ مالىمدەمەسى جانە كونسۋلدىق قىزمەتتىڭ راستاۋىنىڭ نەگىزىندە ادام ءولتىرۋ فاكتىسى بويىنشا قىلمىستىق ءىس قوزعالدى, ۇزاق حات الماسۋدان كەيىن ءباا ءىس ماتەريالدارىن اعىلشىن جانە ورىس تىلدەرىندە قازاقستانعا جىبەردى. قازىرگى قىلمىستىق ءىستىڭ نەگىزىن قۇراعان ماتەريالدار ءبىرىنشى زورلاۋ ءىسىن قامتىدى», دەدى عالىم نۇرپەيىسوۆ.

قىلمىستىق كودەكستىڭ 120-بابى «زورلاۋ» بابى بويىنشا سوت وتىرىسىن جابىق وتكىزۋ تۋرالى شەشىم قابىلداندى. 

سونداي-اق كۇدىكتىگە قىلمىستىق كودەكستىڭ 99-بابى 2-بولىگىنىڭ 5-تارماعى «اسا قاتىگەزدىكپەن كىسى ءولتىرۋ» بويىنشا ايىپ تاعىلىپ وتىر.

ءوز كەزەگىندە ادۆوكات قىلمىسكەردى ءومىر بويىنا باس بوستاندىعىنان ايىرۋ ءۇشىن قولدان كەلگەننىڭ بارلىعىن جاسايتىنىن اتاپ ءوتتى. 

ايتا كەتەيىك, قىلمىستىق ىسكە قاتىستى اقپاراتتى قازاقستاننىڭ جوعارعى سوتى راستادى.

«دۋبايدا ء(باا) قازاقستاندىق ايەلدى ولتىرۋگە قاتىستى قىلمىستىق ءىس قىلمىستىق كودەكستىڭ 120-بابىنىڭ 1-بولىگى «زورلاۋ» جانە 99-بابى 2-بولىگىنىڭ 5-تارماعى «اسا قاتىگەزدىكپەن جاسالعان كىسى ءولتىرۋ» بويىنشا قارالىپ جاتىر. سوت وتىرىسى "جاريالىلىق" تالاپتارىنا سايكەس جابىق رەجيمدە جۇرگىزىلەدى», دەپ حابارلادى جوعارعى سوت.

عالىم نۇرپەيىسوۆ ءباا قازاقستان ازاماتىن سول جەردە سوتتاۋى ءۇشىن ونى ەكستراديتسيالاۋدى سۇراعانىن ايتتى. امىرلىكتەردە مۇنداي قىلمىس جاساعاندار ءولىم جازاسىنا كەسىلەدى. بىراق زاڭ بويىنشا قازاقستان ءوز ازاماتتارىن باسقا ەلدە سوتتا قاراۋ ءۇشىن ەكستراديتسيالامايدى.