جاقىندا جاڭاوزەن قالاسىندا اشىق فۋتبولدان العاش رەت جارىس ءوتىپ, ماڭعىستاۋدىڭ «كاسپي» فۋتبول كلۋبى جەڭىسكە جەتكەنىن حاباردار ەتكەن ەدىك. اۋىل تۇرعىندارىنىڭ, اسىرەسە جاستاردىڭ فۋتبولعا دەگەن قىزىعۋشىلىعى, «كاسپي» فۋتبول كلۋبىنا دەگەن ىقىلاسى قاراقيا اۋدانىنىڭ جەتىباي اۋلىندا اتالعان كلۋب فيليالىنىڭ اشىلۋىنا نەگىز بولدى.
بۇل – ءوڭىر اۋداندارى اراسىندا العاش اۋداندا اشىلعان فيليال. اۋدانداعى فۋتبول سپورتىن ودان ءارى دامىتۋ, جاسوسپىرىمدەردىڭ سپورتقا دەگەن قىزىعۋشىلىعىن ارتتىرۋ ماقساتىندا اشىلعان كلۋبتا 2013–2015 جىلى تۋعان جەتىبايلىق جاسوسپىرىمدەردەن قۇرالعان 3 توپ جاتتىعۋ جۇمىستارىن باستاپ كەتتى. الداعى ۋاقىتتا سپورتتىق نورماتيۆتەردى ءساتتى تاپسىرعان وقۋشىلار كاسىبي قۇرامعا الىنىپ, اقتاۋ قالاسىنا اۋىستىرىلادى.
«ۇلكەن ۇيگە نە كەرەك – كىشى ۇيگە دە سول كەرەك» دەگەندەي, فيليالعا قاجەتتى قۇرالدار مەن سپورتتىق كيىمدەردى «كاسپي» فۋتبول كلۋبى قامتاماسىز ەتەدى. ال قاتىسۋشىلار ءۇشىن فيليال ەسىگى اشىق, ياعني تەگىن. سونداي-اق فۋتبول سپورتىنا قىزىعىپ, كلۋبقا تىركەلگەندەر سانى كوبەيسە, قوسىمشا توپتار اشۋ جوسپارلانىپ وتىر.
ماڭعىستاۋ وبلىسى