باتىس قازاقستان وبلىسىنداعى سۋ تاسقىنى قاۋىپتى شەگىنە جەتىپ, ەندى اقىرىن قايتا باستادى. جايىق وزەنى جاعاسىنداعى ەلدى مەكەندەر, ورال قالاسى ازىرگە تاسقىننان زارداپ شەككەن جوق. الدىن الا تۇرعىزىلعان بوگەتتەر سۋدى ۇستاپ تۇر.
ورال قالاسىنىڭ تۇسىندا جايىق وزەنىنىڭ دەڭگەيى قاۋىپتى مەجەدەن 13 سم اسىپ كەتسە دە, قورعانىس بوگەندەردىڭ سەپتىگى ءتيىپ, شاھارعا سۋ وتە المادى. ماماندار وزەننىڭ جوعارعى بولىگىندە سۋ دەڭگەيى تۇراقتى تۇردە تومەندەپ جاتقانىن ايتادى. وزەن دەڭگەيىنەن الدەقايدا تومەن جاتقان كەيبىر ساياجاي بولىكتەرى دە قورعاۋشىلاردىڭ ارقاسىندا امان قالدى. قازىر حالىق وسى ناتيجەنى ساقتاپ قالۋ ءۇشىن كۇرەسىپ جاتىر.
ءساۋىر ايىنىڭ باسىنان بەرى توتەنشە جاعداي رەجىمىندە ءومىر ءسۇرىپ جاتقان باتىس قازاقستان وبلىسىندا ءومىر بىرتە-بىرتە ءوز قالىبىنا ءتۇسىپ كەلەدى. ءساۋىردىڭ 15-ىنەن باستاپ ورال قالاسى مەن جايىق جاعالاۋىنداعى 4 اۋداندا مەكتەپتەگى وقۋ ۇدەرىسى قاشىقتان وقىتىلا باستاعان ەدى. 24 ساۋىردەن باستاپ قالىپتى جاعدايعا اۋىساتىن بولدى.
بۇعان دەيىن تاسقىننان زارداپ شەككەن تۇرعىندار دا مەملەكەتتەن ءتيىستى جاردەم الىپ, شىعىننىڭ ورنىن تولتىرا باستادى. ءساۋىردىڭ 22-ءسى كۇنى قاراتوبە اۋدانىنا پرەزيدەنت اپپاراتى ىشكى ساياسات ءبولىمى باسشىسىنىڭ ورىنباسارى داۋرەن بابامۇراتوۆ پەن وبلىستىق قوعامدىق دامۋ باسقارماسىنىڭ باسشىسى گۇلجانار شوكەەۆا ارنايى بارىپ, تۇرعىندارمەن كەزدەستى. تاسقىننان باسپاناسى, مال-مۇلكى زارداپ شەككەن تۇرعىندارمەن وسىنداي كەزدەسۋ بارلىق دەڭگەيدە ءوتىپ جاتىر. ورال قالاسىنىڭ اكىمى ميرجان ساتقانوۆ كەشە ساياجاي تۇرعىندارىمەن كەزدەسىپ, شىعىندى وتەۋ, بىرجولعى الەۋمەتتىك كومەك بەرۋ, نەسيە تولەۋ ۋاقىتىن شەگەرۋ سياقتى وزەكتى ماسەلەلەرگە بايلانىستى ساۋالدارعا جاۋاپ بەردى.
باتىس قازاقستان وبلىسى اكىمىنىڭ ورىنباسارى تىلەپبەرگەن كايۋپوۆتىڭ ايتۋىنشا, وڭىردە زارداپ شەككەندەرگە 100 اەك كولەمىندە بىرجولعى الەۋمەتتىك كومەك كىدىرىسسىز تولەنىپ جاتىر. بۇگىنگە دەيىن 1 490 وتباسى 547,3 ملن تەڭگە كولەمىندە كومەك الىپ ۇلگەرگەن. ارنايى كوميسسيالار 1 150 ۇيگە تەحنيكالىق تەكسەرۋ جۇرگىزىپ, 397 ءۇيدى تۇرۋعا جارامسىز دەگەن شەشىمگە كەلگەن. ياعني قاراتوبە اۋدانىندا – 98, سىرىم اۋدانىندا – 114, تەرەكتى اۋدانىندا – 60, بايتەرەك اۋدانىندا – 4, ءبورلى اۋدانىندا – 121 ءۇي قايتادان سالىنادى. بۇل ءالى تۇپكىلىكتى سان ەمەس, كوميسسيا جۇمىسى جالعاسادى.
ورال قالاسىندا 15 ەۆاكۋاتسيالىق بەكەت دايىندالعان ەدى. سونىڭ 10-ىنا ادامدار ورنالاستى. ستۋدەنتتەر ونلاين وقۋعا كەتكەلى 8 جاتاقحانا بوساپ, ءۇيىن سۋ باسقان مىڭنان اسا تۇرعىن كوپشىلىك جاتاقحاناعا كوشىرىلدى. سپورت عيماراتىندا ۋاقىتشا ورنالاسقان كوپبالالى وتباسىلار مەن مۇمكىندىگى شەكتەۋلى ازاماتتار جەرگىلىكتى مەتسەناتتاردىڭ كومەگىمەن پاتەرگە شىعارىلدى. قازىر 2 326 ادام ەۆاكۋاتسيالىق بەكەتتەردە جاتىر. جاعداي قيىندايتىن بولسا, 2 700 ورىن رەزەرۆتە تۇر.
سۋ باسقان ساياجاي تۇرعىندارىنا سۋ ورتاسىندا قالعان ۇيلەرىنە كەدەرگىسىز كىرىپ شىعۋعا بارىنشا جاعداي جاسالدى. جالپى, 20 كۇن ىشىندە ورال قالاسىنىڭ وزىندە 45 شاقىرىم بوگەت تۇرعىزىلدى.
وسى كۇندەرى قازاقستاننىڭ 11 وبلىسىنان, رەسپۋبليكالىق ماڭىزى بار ءۇش قالادان اقجايىق وڭىرىنە 4 مىڭداي ادام كومەككە كەلدى. ولار جەرگىلىكتى قۇرىلىمدارمەن تىزە قوسىپ قيمىلداپ جاتىر. كەشە تۇركىستان وبلىسى جانە قىزىلوردا وبلىسى توتەنشە جاعدايلار دەپارتامەنتىنىڭ قۇتقارۋشىلارى باتىسقازاقستاندىق ارىپتەستەرىمەن بىرگە اقجايىق اۋدانىنا قاراستى بۋدارين, كولوۆەرتنوە جانە جاڭابۇلاق اۋىلى ماڭىندا جايىق وزەنىنەن دالاعا جايىلعان سۋ ورتاسىنان شامامەن 137 جىلقى, ونىڭ ىشىندە 3 ق ۇلىندى ايداپ شىعارىپ, يەسىنە تابىس ەتكەن. ال ساياجاي اۋماعىنان قۇتقارىلعان يت پەن مىسىقتىڭ سانىندا ەسەپ جوق.
سۋ تاسقىنى تالاي جۇرتتى ابىگەرگە سالىپ, ءبىراز ماتەريالدىق شىعىنعا ۇشىراتقانىمەن, حالىقتىڭ بىرلىگىن نىعايتىپ, ىنتىماعىن كۇشەيتكەن كەزەڭ بولدى. بۇل كۇندەر دە تاريح قازىناسىنا اينالعان ساتتە جايىق بويىنداعى حالىق ەرلىگىنىڭ جىلناماسى جازىلاتىن شىعار.
باتىس قازاقستان وبلىسى