عالىمدار ۇزاق ۋاقىت بويى ادام ويىن وقيتىن تەحنولوگيالاردىڭ سوڭىنان قۋىپ كەلەدى. بۇل ىزدەنىستەر قانشاما عىلىمي جاڭالىق اشقانىمەن, تولىققاندى ناتيجەگە جول تابا المادى. دەگەنمەن سيدنەي تەحنولوگيالىق ۋنيۆەرسيتەتى ءبىرتابان جاقىنداعان سىندى. ولار ويىڭدى وقىپ, بىردەن ماتىنگە اينالدىراتىن جاساندى ينتەللەكتىنى ىسكە قوستى.
بۇل سالادا بەلگىلى ءبىر جەتىستىكتەرگە جەتكەن عالىمدار تۋرالى وسىعان دەيىن بىرنەشە رەت جازدىق. مىسالى, يلون ماسكتىڭ «Neuralink» كومپانياسى مي مەن كومپيۋتەر اراسىنداعى دەرەكتەر الماسۋ ءۇشىن ادام ميىنا چيپتەردى يمپلانتاتسيالادى. سولاي گادجەتتەردى وي كۇشىمەن باسقارۋعا مۇمكىندىك بەردى.
بىراق سيدنەي تەحنولوگيالىق ۋنيۆەرسيتەتىنىڭ قىزمەتكەرلەرى ماسكتان دا بيىك شىڭعا شىقتى. ولار ويدى وقىپ, ماتىنگە اينالدىراتىن قۇرىلعى جاسادى.
ەڭ عاجابى, بۇل ءۇشىن ميعا قانداي دا ءبىر قۇرىلعى ەنگىزۋ قاجەت ەمەس. تولىق تۇسىندىرەتىن بولساق, وي وقۋ ميدىڭ بەلسەندىلىگىن تىركەيتىن ەلەكتروەنتسەفالوگرامما كومەگىمەن جۇزەگە اسادى. ياعني ەلەكترودتارى بار قالپاق كيۋ جەتكىلىكتى. «DeWave» الگوريتمى مي تول-
قىندارىن سالىستىرادى. الىنعان مالىمەتتەردى جاساندى ينتەللەكت وڭدەيدى جانە ونى سوزگە اينالدىرادى. ازىرگە جۇيەنىڭ تيىمدىلىگى ماشينالىق اۋدارمانىڭ دالدىگىن ولشەيتىن BLEU شكالاسى بويىنشا شامامەن 40 پايىزدى قۇراپ تۇر. ازىرلەۋشىلەر ونى 90 پايىزعا دەيىن كوتەرەمىز دەپ ۋادە بەردى. بۇل تۋرالى «وسى قۇرىلعى – مي تولقىندارىن تىكەلەي تىلگە اۋدارۋدىڭ يننوۆاتسيالىق جەتىستىگى. ۇدەرىس ديسكرەتتى كودتاۋ ادىستەرى مەن مي تولقىندارىن ماتىنگە اۋدارۋدان تۇرادى. قۇرىلعىنى تاعى دا جەتىلدىرە تۇسەمىز», دەدى جوبا جەتەكشىسى پروفەسسور ك.ت.لين.
«NeurIPS» كونفەرەنتسياسىندا قۇرىلعىنى تەكسەرەتىن ەكسپەريمەنت ءوتتى. قاتىسۋشىلاردىڭ مي تولقىندارىن تالداپ, بىردەن ەكرانعا ءماتىن شىعارىلدى. ءبىر قىزىعى, جۇيە زات ەسىمدەرگە قاراعاندا ەتىستىكتەردى جاقسى تانىعان. زات ەسىمدەرگە كەلەتىن بولساق, تەحنولوگيا كوبىنەسە تۇپنۇسقا سوزدەردى ەمەس, سينونيمدەردى قولدانعان. زەرتتەۋشىلەردىڭ پىكىرىنشە, مۇنداي قاتەلىك ميدىڭ سەمانتيكالىق ۇقساس سوزدەردى وڭدەۋىندەگى ۇدەرىسكە بايلانىستى بولعان.
ەگەر عالىمدار تەحنولوگيانى ءارى قاراي جەتىلدىرسە, ول ادامزات يگىلىگىنە قىزمەت ىستەيدى. قانداي دا ءبىر سەبەپتەرگە بايلانىستى سويلەي المايتىن ادامدارعا ورتامەن بايلانىسۋعا كومەكتەسەدى.