«اقتوبە» ساۋدا ورتالىعىندا اسكەري كوميسساريات قىزمەتكەرلەرى اسكەرگە شاقىرىلعاندارعا رەيد ۇيىمداستىردى. جەلىدە اسكەريلەر اقتوبەلىك ازاماتتى كۇشتەپ اسكەرگە الماق بولعان ۆيدەو قىزۋ تالقىلانىپ جاتىر, دەپ حابارلايدى Egemen.kz.
بەينەجازبادا ەكى ەر ادام جاس جىگىتتى ۇستاپ, ەسىككە قاراي سۇيرەگەن. جاس جىگىتكە قالانىڭ تۇرعىندارى كومەككە كەلگەن.
«بۇگىن ەكى ەر ادام ءبىر جىگىتتى اسكەرگە كۇشتەپ اكەتپەك بولعان. بۇل قانشالىقتى زاڭدى؟ جاس جىگىتكە سول جەردە جۇرگەن ادامدار كومەكتەستى», دەپ جازدى ۆيدەو اۆتورى.
وبلىستىق قورعانىس ىستەرى دەپارتامەنتى قىزمەتتىك تەكسەرىس جۇرگىزىلىپ جاتقانىن حابارلادى.
«وسى جاعدايعا بايلانىستى اقتوبە وبلىسىنىڭ قورعانىس ىستەرى جونىندەگى دەپارتامەنتى قىزمەتتىك تەكسەرۋ جۇرگىزىپ جاتىر. تەكسەرۋ ناتيجەلەرى قوسىمشا حابارلانادى», دەپ جاۋاپ بەردى دەپارتامەنت وكىلدەرى.