قۇلسارى قالاسىن قۇرساۋعا العان تاسقىننىڭ حابارى ەستىلىسىمەن ماڭعىستاۋدا قوزعالىس باستالدى. بۇل كورشى اعايىنعا كومەك قولىن سوزۋ كۇبىنىسى ەدى.
الدىمەن ماڭعىستاۋدىڭ اتىراۋ جاق شەتىندە ورنالاسقان بەينەۋ اۋدانىنىڭ اقان داۋىستى ۇلى مەن جاندوس بەكتىلەۋ باستاعان ازاماتتارى دەرەۋ جينالىپ, قاپشىق, كۇرەكتەرىن الىپ قۇلسارىعا اتتاندى. الايدا سۋ ەكپىنى ەڭسەرتپەي قۇلسارىلىقتار ءۇشىن ەۆاكۋاتسيا جاريالاندى. سودان بەينەۋلىكتەر شۇبىرىپ جولعا شىعىپ قيىن جاعدايدا قالعان قۇلسارىلىقتارعا تەگىن تاكسي قىزمەتىن كورسەتىپ, لەك-لەك ادامدى سارعا مەن بەينەۋگە, بورانقۇلعا تاسىپ الدى. قيىن كەزدە پسيحولوگتەر ەۆاكۋاتسيالانعانداردىڭ قاسىنان تابىلدى. اتالعان اۋىلداردا مەكتەپ, سپورتزالدار شۇعىل جاساقتالىپ, قۇلسارىلىقتاردى قابىلدادى, اۋىل تۇرعىندارى تاماق, كيىم تاسىپ قىزمەت ەتىپ ءجۇر.
قۇلسارى قالاسىنىڭ تۇرعىندارىنا كومەك بەرۋ ءۇشىن ارنايى ەسەپشوتتار اشىپ, ءتۇرلى توپتار قۇرىلدى. جاستار, ەرىكتىلەر, بلوگەرلەر, مۇعالىمدەر, دارىگەرلەر, سپورتشىلار, پوليتسەيلەر مەن تەڭىز جاياۋ اسكەرلەرى حالىقپەن بىرگە جۇمىلدى.
قازىرگى تاڭدا قۇلسارى قالاسىنىڭ 21 مىڭ تۇرعىنى ماڭعىستاۋ وبلىسىنا كەلگەن. ولاردىڭ بىرقاتارى اعايىن-تۋىستارىنىڭ ۇيىنە ورنالاسسا, ءبىرازى – ارنايى دايىندالعان ورىنداردا. اياقاستى مال-مۇلكىن سۋعا اعىزىپ جىبەرىپ, بالا-شاعاسىن ارقالاپ جانساۋعالاپ قاشۋ ەشكىمگە وڭاي ەمەس. وسى جاعدايدى جاقسى تۇسىنگەن ماڭعىستاۋلىقتار قۇلسارىدان كەلگەن باۋىرلارعا قولدا بار كومەگىن اياپ جاتقان جوق. اعىلىپ جاتقان ازىق-ت ۇلىكتىڭ ەسەبى جوق, ءتىپتى ءىرى قارا مال سويىپ قوناقاسى بەرىپ, ىستىق سورپا ىشكىزىپ, ەتپەن قامتاماسىز ەتىپ جاتقان اۋىلدار دا بار.
كومەككە باستاماشى بولعان بەينەۋ ازاماتتارىنىڭ جاقسى ءىسىن بۇكىل ماڭعىستاۋ جالعاستىردى. اقتاۋدان, قاراقيا, مۇنايلى, تۇپقاراعان اۋداندارىنان, ماڭعىستاۋ اۋدانىنىڭ الىس تۇكپىردەگى اۋىلدارىنان ەرىكتى تۇردە توپ-توپ جىگىتتەر اتتاندى. جاڭاوزەن قالاسى اكىمدىگىنىڭ قولداۋىمەن «وزەنمۇنايگاز» مەكەمەسى, «وزەنينۆەست», «وزەنجىلۋ», «وزەنەنەرگوسەرۆيس» مك, «KazPetroDrilling», «بۇرعىلاۋ», «مۇنايفيلدسەرۆيس», «قازگوز», «كەن-قۇرىلىس سەرۆيس» جشس جۇمىسشىلارىنان قۇرالعان توپ بەكىتۋ جۇمىستارىنا قاجەتتى 16 مىڭ دانا قاپ پەن 400 كۇرەك, سۋ ەتىك, قولعاپتاردى تيەگەن 30-عا تارتا تەحنيكامەن كومەككە ۇمتىلدى. سونداي-اق ماڭعىستاۋلىقتار شۇعىل 3 توننا جانارمايدى قۇلسارىعا جەتكىزدى. جانارمايدىڭ 1 تونناسىن «سۇڭقار» جانارماي بەكەتى تەگىن بەرسە, 1 توننا جانارمايدى ازاماتتار جيناپ بەرگەن, ال 1 توننا حالىقتان جيىلعان اقشاعا ساتىپ الىنعان.
قۇلسارىدان ماڭعىستاۋعا كەلگەن 1 678 وقۋشى وڭىردەگى ءبىلىم بەرۋ ورىندارىنا تىركەلدى. اتاپ ايتساق, اقتاۋ قالاسىنا – 374 وقۋشى, بەينەۋ اۋدانىنا – 1 098 وقۋشى, جاڭاوزەن قالاسىنا – 65 وقۋشى, قاراقيا اۋدانىنا – 38 وقۋشى, ماڭعىستاۋ اۋدانىنا – 41 وقۋشى, مۇنايلى اۋدانىنا – 53 جانە تۇپقاراعان اۋدانىنا 9 وقۋشى تىركەلگەن. بۇل وقۋشىلاردىڭ 351-ءى – مەكتەپكە, 326-ى – كوللەدجدەرگە, 992-ءى – تۋىستارىنىڭ جانە وبلىس تۇرعىندارىنىڭ ۇيىنە, 9-ى اتا-انالارىمەن بىرگە قوناقۇيلەرگە ورنالاسقان.
دارىگەرلەر ەۆاكۋاتسيالانعان تۇرعىندارعا تەگىن قىزمەت كورسەتىپ جاتىر. 2 ايەل اقتاۋ قالاسىنداعى پەريناتالدىق ورتالىققا جىبەرىلسە, 6 ايەل بەينەۋدەگى اۋرۋحانانىڭ گينەكولوگيا جانە پاتولوگيا بولىمدەرىنە ورنالاستىرىلدى. ەۆاكۋاتسيالانعاندار اراسىنان قازىرگى تاڭدا 11 ايەل بوسانسا, ونىڭ التاۋى بەينەۋ اۋداندىق اۋرۋحاناسىندا بوساندى. جاس بوسانعان انالاردىڭ بىرقاتارىن بەينەۋلىك انالار اۋرۋحانادان شىعارىپ الىپ, ءسابيدىڭ قالجاسىن جاساپ, بەسىككە سالىپ كومەك كورسەتتى.
قۇلسارىلىقتاردى قابىلداۋعا ش.ەسەنوۆ اتىنداعى كمتۋ جايلى جاتاقحاناسىن ءبولىپ قامقورلىق كورسەتتى, سونداي-اق «بەكەت اتا» مەشىتى جانىنداعى مەدرەسە, جەكە تۇرعىندار بەلسەندى اتسالىستى. بەينەۋلىك ىرىسبيكە ۋربيشەۆا 3 وتباسىنى قابىلداپ, بارلىق جاعدايمەن قامتاماسىز ەتتى.
ماڭعىستاۋ وبلىسى