ەلىمىزدىڭ وزگە وڭىرلەرىندە بۇرىنىراق قولدانىسقا بەرىلگەن امەريكالىق ستيلدەگى مەكتەپ اۆتوبۋستارى ماڭعىستاۋعا دا جەتتى. ولار ماڭعىستاۋ اۋدانىنداعى بەرەكەت جۇماليەۆ اتىنداعى, مەكەريا اتىموۆ اتىنداعى مەكتەپتەرگە, شەتپەدەگى № 7 مەكتەپ-ليتسەيگە جانە ساي-وتەس اۋلىنىڭ وقۋ ورىندارىنا بەرىلدى.
بۇگىنگە دەيىن قوعامدىق كولىكتەر ارقىلى مەكتەپكە قاتىناپ كەلگەن شەتپە اۋىلىندا 4 289 وقۋشىنىڭ 559-ى, ساي-وتەس اۋلىندا وقۋ ورىندارىنداعى 479 وقۋشىنىڭ 175-ءى ەندى ءوز كولىكتەرىمەن باراتىن بولدى.
زامان تالابىنا ساي جاراقتاندىرىلعان جارىق ءارى جايلى, جانارماي باگىنىڭ ورتكە قارسى فۋنكتسياسىمەن, جۇرگىزۋشىگە ارنالعان اينالانى شولۋ جۇيەسىمەن جانە قاۋىپسىزدىك بەلدىكتەرىمەن قامتىلعان كولىكتەر وقۋشىلاردىڭ قاۋىپسىز ءارى ىڭعايلى تاسىمالىن جۇزەگە اسىرادى دەگەن سەنىم بار. پوليتسيا قىزمەتكەرلەرى قارقىندى جول قوزعالىسى جاعدايىندا سارى ءتۇستى اۆتوبۋستاردىڭ كوزگە بىردەن ءتۇسۋىنىڭ ماڭىزىن ايتادى.
«پرەزيدەنت قاسىم-جومارت توقاەۆ «ورتا ءبىلىم بەرۋ ساپاسى – تابىستى ۇلتتىڭ تاعى ءبىر شارتى. ءار وقۋشىنىڭ جان-جاقتى دامۋى ءۇشىن قولايلى جاعدايلار جاسالۋى كەرەك» دەگەن ەدى. وسىعان بايلانىستى اۋداننىڭ ءبىلىم سالاسىندا ۇلكەن جۇمىس جۇرگىزىلىپ جاتىر. مەكتەپتىڭ ماتەريالدىق-تەحنيكالىق بازاسى «قازاقستان حالقىنا» قولداۋ قورىنىڭ قاراجاتىمەن تولىعىمەن جاڭارتىلدى. ءبىز وقۋشىلاردى تاسىمالداۋعا جاڭا اۆتوبۋستاردى تابىستادىق. يگى ىستەر جالعاساتىن بولادى», دەدى ماڭعىستاۋ اۋدانىنىڭ اكىمى عالىمجان نيازوۆ.
اۋدان اكىمىنىڭ ايتۋىنشا, بيىل سەگىز جانە بەس بالاباقشا جوندەلەدى. ماڭعىستاۋ اۋدانى بويىنشا 22 مەكتەپ مىڭنان استام پارتا, STEM زەرتحانالار, روبوتتەحنيكا, ينفورماتيكا كابينەتتەرىنە ارنالعان جابدىقتار ساتىپ الىنىپ, 19 مەكتەپتە تەحنولوگيا كابينەتتەرى جابدىقتالادى.
ماڭعىستاۋ وبلىسى