استانادا جوعارى ءبىلىم سالاسىنا قاتىستى اكادەميالىق ادالدىق تۋرالى سەمينار ءوتتى. جوعارى ءبىلىم بەرۋدى دامىتۋدىڭ ۇلتتىق ورتالىعى اتانعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى بازاسى ءبىلىم ساپاسىن ارتتىرۋ ءۇشىن بىرقاتار ءىس اتقارىپ ءجۇر. سونىڭ ءبىرى – «اكادەميالىق ادالدىق» تاقىرىبىنداعى سەمينار.
ءىس-شارا عىلىم جانە جوعارى ءبىلىم مينيسترلىگىنىڭ قولداۋىمەن ۇيىمداستىرىلىپ, «زاڭ جانە ءتارتىپ» قاعيداتىن ىلگەرىلەتۋگە باعىتتالعان. جيىنعا گيبريدتى فورماتتا وتاندىق جوعارى وقۋ ورىندارىنىڭ 300-دەن استام وكىلى, ونىڭ ىشىندە وقۋ ءىسى جونىندەگى پرورەكتورلار, وقۋ ءىسى جونىندەگى باسقارما باسشىلارى جانە ۋنيۆەرسيتەتتىڭ پروفەسسورلىق-وقىتۋشىلىق قۇرامى قاتىستى. ءبىلىم سالاسىنىڭ جۇگىن كوتەرگەندەر كەلەلى وي ايتىپ, ءوز پىكىرلەرىن ءبىلدىردى. سەميناردى ءبىلىم كوميتەتى توراعاسىنىڭ ورىنباسارى جاننا ەسىنباەۆا اشتى.
– اكادەميالىق ادالدىق بۇگىنگى تاڭدا وتە وزەكتى تاقىرىپ. تالقىلاۋدى قاجەت ەتەتىن, ءالى شەشىمى تابىلماعان بىرنەشە ماسەلە بار. بۇل باعىتتا مينيسترلىك بىرقاتار قۇجات, ونىڭ ىشىندە تۇجىرىمداما مەن ادىستەمەلىك قۇرالدار قابىلداعانى بەلگىلى. سونداي-اق ەلىمىزدىڭ 18 جوعارى وقۋ ورنى كىرەتىن اكادەميالىق ادالدىق ليگاسى جۇمىس جاساپ وتىر. سەميناردىڭ ناتيجەسى رەتىندە ناقتى ۇستانىمدار مەن ۇسىنىستار كۇتەمىز, – دەدى ول.
سونداي-اق عىلىم جانە جوعارى ءبىلىم سالاسىنداعى ساپانى قامتاماسىز ەتۋ كوميتەتىنىڭ سىرتقى باعالاۋ جانە تالداۋ باسقارماسىنىڭ باسشىسى قارلىعاش ساكەنوۆا «اكادەميالىق ادالدىق – نورماتيۆتىك قامتاماسىز ەتۋ اسپەكتىلەرى» اتتى بايانداما وقىدى. Maqsut Narikbayev University پروۆوستى سەرگەي پەن ستۋدەنتتەردىڭ اكادەميالىق ادالدىعىنىڭ نەگىزگى ۇستانىمدارى تۋرالى ايتتى. تاۋەلسىز اككرەديتتەۋ جانە رەيتينگ اگەنتتىگىنىڭ باس ديرەكتورىنىڭ كەڭەسشىسى ولگا يانوۆسكايا جوعارى ءبىلىم ساپاسى مەن اكادەميالىق ادالدىعىن قامتاماسىز ەتۋ مادەنيەتىن ىلگەرىلەتۋ تاقىرىبىندا قىزىقتى بايانداما جاسادى.
سەمينار بارىسىندا سونداي-اق ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ پرورەكتورى اسحات چۋكۋروۆ ماگيسترلىك ديسسەرتاتسيانى قورعاۋ مىسالىندا اكادەميالىق ادالدىقتى ساقتاۋ ماسەلەلەرى, ل.ن.گۋميلەۆ اتىنداعى ەۇۋ تسيفرلىق دامۋ جانە قاشىقتىقتان وقىتۋ دەپارتامەنتىنىڭ ديرەكتورى گۇلميرا بەكمانوۆا اكادەميالىق ادالدىقتى ساقتاۋ جولىنداعى زاماناۋي تاسىلدەر جانە جاساندى ينتەللەكت داۋىرىندەگى اكادەميالىق ادالدىق تاقىرىبىندا استانا IT ۋنيۆەرسيتەتى پروفەسسورىنىڭ اسسيستەنتى بەيبىت ابدىكەنوۆ بايانداما جاسادى. مودەراتور جوعارى ءبىلىم ساپاسىن قامتاماسىز ەتۋدىڭ ۇلتتىق جۇيەسىن رەينجينيرينگ ارقىلى قازاقستانداعى ۋنيۆەرسيتەتتەردىڭ باسەكەگە قابىلەتتىلىگىن ارتتىرۋ جونىندەگى باعدارلامالىق-ماقساتتىق قارجىلاندىرۋ جوباسىنىڭ عىلىمي جەتەكشىسى ايدوس مۇقاتاەۆ بولدى.
ۇسىنىلعان باياندامالاردى تالقىلاۋ ناتيجەلەرى بويىنشا سەمينارعا قاتىسۋشىلار وتاندىق جوعارى وقۋ ورىندارىنا ءبىرشاما ۇندەۋ جاسادى. ستۋدەنتتەر, پروفەسسورلىق-وقىتۋشىلىق قۇرام جانە ۋنيۆەرسيتەت قىزمەتكەرلەرى اراسىنداعى قۇقىق ەرەجەلەرىن قاتاڭ ساقتاۋعا شاقىردى. ىمىراسىز قاتىناستى جانە زاڭدى قۇرمەتتەۋ مادەنيەتىن قالىپتاستىرۋ, كۇندەلىكتى ومىردە ادالدىقتى دامىتۋ, سونىمەن قاتار اكادەميالىق ادالدىق كودەكسىنىڭ قاعيدالارىنا ءمان بەرىپ, ەرەكشە نازار اۋدارۋدى ۇسىندى. جالپىلاما العاندا, ساراپشىلاردىڭ ۇسىنىستارى جوعارى ءبىلىم بەرۋ جۇيەسىندە «زاڭ جانە ءتارتىپ» قاعيداتىن نىعايتۋعا باعىتتالعان.